រាជធានីភ្នំពេញ ៖ ផ្លូវលំមួយខ្សែប្រវែងជាង១.០០០ម៉ែត្រ បានបើកការដ្ឋានស្ថាបនាចាក់ក្រាលក្រួសក្រហមតាមគំរោងអភិវឌ្ឍន៍ខណ្ឌសាកល្បង ដើម្បីសំរួលដល់ការធ្វើដំណើររបស់ប្រជាពលរដ្ឋក្នុងរដូវបុណ្យភ្ជុំបិណ្ឌនេះ ។ ពិធីបើកការដ្ឋានធ្វើឡើងកាលពីវេលាព្រឹកថ្ងៃទី២៧ កញ្ញា ឆ្នាំ២០១០ ក្រោមអធិបតីភាពលោកគិត សុផា អភិបាលនៃគណៈអភិបាលខណ្ឌដង្កោ និងមានការអញ្ជើញចូលរួមពីអាជ្ញាធរសង្កាត់ ភូមិ និងប្រជាពលរដ្ឋជាច្រើនរូបទៀត ។
លោកអភិបាលខណ្ឌដង្កោ បានថ្លែងថា ផ្លូវមួយខ្សែនេះជាអតីតផ្លូវលំ មានប្រវែង១.៥៣០ម៉ែត្រ ត្រូវស្ថាបនាចាក់ក្រាលក្រួសក្រហម មានទទឹង៥ម៉ែត្រ តាមគំរោងអភិវឌ្ឍន៍អន្តរសង្កាត់របស់ខណ្ឌសាកល្បង ហើយត្រូវចំណាយអស់ថវិកាចំនួន២០.២៥០ដុល្លារ ។
លោកអភិបាលខណ្ឌបន្តថា ផ្លូវនេះបំរើ និងសំរួលដល់ការធ្វើដំណើររបស់ប្រជាពលរដ្ឋចំនួន៤ភូមិ គឺភូមិជំរៅ និងភូមិអណ្តូង របស់សង្កាត់គោករកា និងភូមិគោកពេជ្រ ភូមិចំការស្បែង របស់សង្កាត់សំរោងក្រោម ខណ្ឌដង្កោ ។ ផ្លូវនេះមានសារសំខាន់ណាស់ចំពោះប្រជាពលរដ្ឋក្នុងភូមិ និងជាអំណោយសំរាប់ពួកគាត់នារដូវបុណ្យភ្ជុំបិណ្ឌ ។
លោកអភិបាលខណ្ឌបន្តទៀតថា ការស្ថាបនានឹងរួចរាល់ជាស្ថាពរក្នុងរយៈពេលប៉ុន្មានថ្ងៃខាងមុខដែលអាចឱ្យប្រជាពលរដ្ឋប្រើប្រាស់ដោយស្រួល ។ ទន្ទឹមនេះលោកសំណូមពរដល់ប្រជាពលរដ្ឋទាំងអស់ជួយតាមដានការស្ថាបនា ជាពិសេសជួយថែរក្សាផ្លូវទាំងអស់គ្នា ដើម្បីប្រើប្រាស់បានយូរអង្វែង ។ ដោយឡែកគណៈកម្មការគ្រប់គ្រងគំរោងអន្តរសង្កាត់ត្រូវតាមដានពិនិត្យជាប្រចាំលក្ខណៈបច្ចេកទេស ដោយមានសៀវភៅតាមដានសំរាប់ជាទិសដៅណែនាំមិនឱ្យខុសពីនីតិវិធី ហើយប្រជាពលរដ្ឋក៏មានសិទ្ធិតាមដានគំរោងនេះដែរ ប្រសិនបើមានការខុសឆ្គង ឬខុសបច្ចេកទេសត្រូវរាយការណ៍ជូនគណៈកម្មការគ្រប់គ្រងគំរោងដើម្បីកែលំអជាបន្ទាន់ ៕
ចែករំលែកព័តមាននេះ