ទំនិញប្រើប្រាស់របស់ជប៉ុនវាយលុកទីផ្សារនៅប្រទេសឡាវ
ប្រទេសឡាវ ៖ ឡាវកំពុងក្លាយជាគោលដៅគួរឱ្យចាប់អារម្មណ៍មួយសម្រាប់វិនិយោគិនបរទេស ដែលកំពុងសម្លឹងមើលឱកាសដើម្បីទាញយកប្រយោជន៍ពីពាណិជ្ជកម្ម និងជាពិសេស តម្រូវការកើនឡើងនៃផលិតផល
ប្រទេសឡាវ ៖ ឡាវកំពុងក្លាយជាគោលដៅគួរឱ្យចាប់អារម្មណ៍មួយសម្រាប់វិនិយោគិនបរទេស ដែលកំពុងសម្លឹងមើលឱកាសដើម្បីទាញយកប្រយោជន៍ពីពាណិជ្ជកម្ម និងជាពិសេស តម្រូវការកើនឡើងនៃផលិតផលប្រើប្រាស់ក្នុងប្រទេសនេះ ។
វិនិយោគិន និងក្រុមហ៊ុនបរទេសជាច្រើន បានបើកហាងលក់ និងផ្សារខ្នាតតូចថ្មីៗនៅទីក្រុងវៀងចន្ទន៍ ក្នុងគោលបំណងផ្តល់ជូនដល់អ្នករស់នៅក្នុងស្រុក និងបរទេសនូវទំនិញប្រើប្រាស់ជាមួយម៉ាកទំនើបៗពីអន្តរជាតិ ។
ទំនិញនាំចូលដែលមានគុណភាពខ្ពស់ និងតម្លៃសមរម្យកំពុងមានការពេញនិយមក្នុងចំណោមប្រជាជនក្នុងតំបន់ និងបរទេស ។
ផលិតផលគ្រឿងទេសរបស់អឺរ៉ុប និងអាស៊ីជាច្រើន ឥឡូវនេះអាចរកទិញបាននៅក្រុងវៀងចន្ទន៍ និងក្រុងដទៃទៀតនៅទូទាំងប្រទេសឡាវ ។
ហាងលក់ទំនិញខ្នាតតូចដែលនាំចូលផលិតផលជប៉ុន និងកូរ៉េ មានដូចជា ផ្សារទំនើប J-mart និង K-mart ។ ហាងទាំងនេះមានលក់ទំនិញប្រើប្រាស់ជាច្រើនប្រភេទសម្រាប់អតិថិជនរបស់ខ្លួន ។
Moong Pattana International Public Co ជាក្រុមហ៊ុនចែកចាយផ្តាច់មុខមានមូលដ្ឋាននៅប្រទេសថៃ គឺស្ថិតក្នុងចំណោមក្រុមហ៊ុនបរទេសជាច្រើនដែលបានបង្ហាញពីចំណាប់អារម្មណ៍របស់ខ្លួន ក្នុងការនាំផលិតផលជប៉ុនចូលទៅកាន់ទីផ្សារឡាវ ។ ក្រុមហ៊ុននេះបានចែកចាយផលិតផលទារកជាច្រើនប្រភេទ ចាប់ពីម្សៅ រហូតដល់សាប៊ូបោកគក់សម្រាប់ទារក ម៉ាក Pigeon របស់ជប៉ុន ។
សប្តាហ៍នេះ គឺជាសប្តាហ៍នៃការបើកហាង Pigeon នាយកប្រតិបត្តិក្រុមហ៊ុន Moong Pattana International Public លោកស្រី Suwanna Chokdee-anand និយាយថា វាជាហាងដំបូងនៅក្នុងប្រទេសឡាវ ដែលមានសិទ្ធិលក់ផលិតផលម៉ាក Pigeon នាំចូលពីជប៉ុន ។
បច្ចុប្បន្ន មានផលិតផលជាច្រើនប្រភេទសម្រាប់កុមារដែលបានដាក់លក់នៅតាមហាង និងផ្សារទំនើបតូចៗនានាក្នុងក្រុងវៀងចន្ទន៍ ។ ទំនិញនាំចូលទាំងនោះ គឺមកពីប្រទេសផ្សេងគ្នាក្នុងតំបន់ និងអន្តរជាតិ ។
ទោះជាយ៉ាងណា ផលិតផលមកពីប្រទេសជប៉ុនត្រូវបានគេចាត់ទុកថា មានគុណភាពខ្ពស់បំផុតនៅលើពិភពលោក ។ ដូច្នេះ ពាណិជ្ជកម្មទ្វេភាគីរវាងប្រទេសជប៉ុន និងឡាវ ត្រូវបានគាំទ្រយ៉ាងពេញលេញក្នុងរយៈពេលប៉ុន្មានឆ្នាំកន្លងមកនេះ ៕
ចែករំលែកព័តមាននេះ