កាលពីថ្ងៃសុក្រ កន្លងទៅ សារព័ត៌មានអេស្ប៉ាញ Mundo Deportivo បានចេញផ្សាយថា ក្លិប Real Madrid មានភាពចម្រូងចម្រាសផ្ទៃក្នុងបន្តិចបន្តួច ខណៈពេលជួបជុំកីឡាករ ដើម្បីហ្វឹកហាត់មុនពេលប្រកួតប៉ះក្រុម Eibar ។ ក្នុងនោះដែរ កីឡាករ Real Madrid មួយចំនួនបានសម្តែងនូវការមិនពេញចិត្តចំពោះអាកប្បកិរិយារបស់កំពូលខ្សែប្រយុទ្ធ Ronaldo ព្រមទាំងចោទថា ជាកីឡាករអាត្មានិយមថែមទៀតផង ។
កីឡាករមួយចំនួនក៏បានលើកឡើងទាំងមិនសប្បាយចិត្តចំពោះ Ronaldo ផងដែរថា នៅពេលដែលយើងឈ្នះ គេតែងតែសរសើរពីគាត់ ប៉ុន្តែនៅពេលដែលក្រុមចាញ់ វាបែរជាកំហុសរបស់អ្នកដទៃទៅវិញ ។
គួរបញ្ជាក់ថា ក្នុងជំនួបរវាងក្រុម Real Madrid និងក្រុម Eibar កាលពីថ្ងៃសៅរ៍កន្លងទៅ ពុំមានវត្តមានកីឡាករ Ronaldo និង Gareth Bale នោះទេ ។ ទោះជាយ៉ាងណា ក្រុម Real Madrid នៅតែអាចយកឈ្នះក្រុមម្ចាស់ផ្ទះ Eibar បានដដែល ក្នុងលទ្ធផល 4 ទល់នឹង 1 ដោយកីឡាករ Benzema រកបាន 2គ្រាប់ និង2គ្រាប់ផ្សេងទៀត ដោយកីឡាករ James Rodriguez និង Marco Asensio ។ ចំណែក 1គ្រាប់របស់ម្ចាស់ផ្ទះ Eibar រកបានដោយកីឡាករ Rubén Peña ។
ចែករំលែកព័តមាននេះ