ប្រទេសចិន ៖ ការលក់ផ្ទះថ្មីក្នុងរយៈពេល៧ថ្ងៃបានកើនឡើងសម្រាប់សប្តាហ៍ទី៣ជាប់គ្នាក្នុងទីក្រុងសៀងហៃ ដោយសារសន្ទុះនៃការទិញដ៏រឹងមាំចំពោះផ្ទះមានតម្លៃមធ្យម និងទាប ។ នេះបើយោងតាមទិន្នន័យទីផ្សារចុងក្រោយ ។
ក្រុមហ៊ុនប្រឹក្សាយោបល់អចលនទ្រព្យសៀងហៃ Centaline បាននិយាយក្នុងរបាយការណ៍ថា តំបន់ផ្ទះថ្មីដែលបានដាក់លក់ (មិនរាប់បញ្ចូលផ្ទះមានតម្លៃសមរម្យដែលគ្រប់គ្រងដោយរដ្ឋាភិបាល) បានកើនឡើង៣៤,១% ឬស្មើនឹង១២ម៉ឺន៥ពាន់ម៉ែត្រការ៉េកាលពីសប្តាហ៍មុន ។
ផ្ទះថ្មីដែលបានដាក់លក់នេះ ជាមធ្យមមានតម្លៃ៤៣.០៤៨យន់ (៦.២៤៨ដុល្លារអាមេរិក) ក្នុង១ម៉ែត្រការ៉េ ពោលគឺធ្លាក់ចុះ១២%ពីសប្តាហ៍មុន ។
Nanhui នៅក្នុងតំបន់ថ្មីនៃ Pudong និងស្រុក Songjiang មានផ្ទះពាក់កណ្តាលនៃគម្រោងដែលលក់ដាច់បំផុត ។ ទីតាំងទាំងពីរនេះបានលក់ផ្ទះថ្មីអស់ជាង២ម៉ឺនម៉ែត្រការ៉េប្រចាំសប្តាហ៍ ។ នេះបើយោងតាមទិន្នន័យក្រុមហ៊ុន Centaline ។
លោក Lu Wenxi អ្នកគ្រប់គ្រងជាន់ខ្ពស់នៃផ្នែកស្រាវជ្រាវក្រុមហ៊ុន Centaline ថ្លែងថា ៖ « ទោះបីជាតំបន់ទាំងពីរមានចម្ងាយឆ្ងាយក្តី ប៉ុន្តែតម្លៃលក់ជាមធ្យមនៃលំនៅឋានថ្មីក្នុងតំបន់ Nanhui និង Songjiang មានតម្លៃលើសពី៣៧ពាន់យន់ក្នុង១ម៉ែត្រការ៉េរួចទៅហើយកាលពីសប្តាហ៍មុន » ។
លោក Lu ឲ្យដឹងថា ការកើនឡើងនៃតម្លៃជាមធ្យមនេះ ដោយសារតែតម្រូវការរបស់រដ្ឋាភិបាលត្រូវការឲ្យក្រុមហ៊ុនអភិវឌ្ឍន៍វិស័យអចលនទ្រព្យសាងសង់អាផាតមិនដែលមានការតុបតែងច្រើនបន្ថែមទៀត ។
គម្រោងលំនៅឋានក្នុងតំបន់ដាច់ស្រយាលនៃស្រុក Fengxian គឺជាទីតាំងពេញនិយមបំផុត បន្ទាប់ពីលក់បានចំនួន១១៣យូនីតកាលពីសប្តាហ៍មុន ដោយតម្លៃជាមធ្យមស្មើ២០.០៤៥យន់ក្នុង១ម៉ែត្រការ៉េ ។
ផ្ទះថ្មីប្រហែល៣ម៉ឺន៩ពាន់ម៉ែត្រការ៉េ ត្រូវបានដាក់លក់នៅក្នុងទីក្រុងកាលពីសប្តាហ៍មុន ដោយធ្លាក់ចុះ៦៧% ពីសប្តាហ៍មុនមួយទៀត។ នេះបើតាមទិន្នន័យរបស់ក្រុមហ៊ុន Centaline ៕
ចែករំលែកព័តមាននេះ