ខេត្តកំពង់ឆ្នាំង ៖ ដើមឈើតូចធំរាប់ពាន់ដើមត្រូវបានគេកា.ប់ចេញពីក្នុងព្រៃក្នុងដែនជម្រកសត្វព្រៃភ្នំឱរ៉ាល់ យកកាត់ជាកង់ៗធ្វើជាអុសស្ទែរ ដាក់តាំងលក់ដោយមិនខ្លាចសមត្ថកិច្ច
ខេត្តកំពង់ឆ្នាំង ៖ ដើមឈើតូចធំរាប់ពាន់ដើមត្រូវបានគេកាប់ចេញពីក្នុងព្រៃក្នុងដែនជម្រកសត្វព្រៃភ្នំឱរ៉ាល់ យកកាត់ជាកង់ៗធ្វើជាអុសស្ទែរ ដាក់តាំងលក់ដោយមិនខ្លាចសមត្ថកិច្ច ឬជំនាញណាឡើយ។ ការដាក់តាំងអុសស្ទែ ច្រើនរយម៉ែត្រគូប នេះ មានក្នុងភូមិសាស្ត្រឃុំជៀប ក្នុងស្រុកទឹកផុស ខេត្តកំពង់ឆ្នាំង ។ កន្លងទៅ ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង បានប្រតិកម្មខ្លាំងៗ ជាមួយមន្ត្រីបរិស្ថាន ពិសេសអ្នកទៅការពារដែនជម្រកសត្វព្រៃភ្នំឱរាល់ ថា បានបណ្តោយឲ្យគេចូលកាប់ព្រៃ ទន្ទ្រានយកដីធ្វើកម្មសិទ្ធិ និងធ្វើឡធ្យូងជាដើម ជាថ្នូនឹងការយកប្រាក់ដាក់ខែពីគេ។
ឯកឧត្តមអភិបាលខេត្តក៏បានព្រមានថា ចាប់ពីពេលនេះទៅ រណាយន្ត ឡធ្យូង កាប់អុស កាប់ឈើ កាប់ទន្ទ្រានយកដី គឺហាមដាច់ខាត លែងឲ្យមានទៀតហើយ ។ ក្រោយមានការប្រតិកម្មធ្ងន់ៗបែបនេះ គេសង្កេតឃើញមាន ការទប់ស្កាត់បទល្មើសទាំងនេះបានថយចុះមួយរយៈធំ។ ប៉ុន្តែថ្មីៗនេះបទល្មើសកាប់ដើមឈើយកមកធ្វើអុសដាក់លក់បានចាប់ផ្តើមកក្រើកវិញហើយ គ្មានសមត្ថកិច្ចណាបង្ក្រាបឡើយ។ អុសស្ទែទាំងនោះត្រូវបាគេដឹកតាមរថយន្ត តាមគោយន្តយកទៅដាក់តាមឡឥដ្ឋ ក្នុងស្រុករលាប្អៀរ និងស្រុកកំពង់ត្រឡាច ខ្លះទៀតដាក់តាមរោងចក្រ និងមួយចំនួនទៀតយកទៅលក់នៅក្នុងខេត្តកណ្តាល។
ជុំវិញបញ្ហានេះលោក ប៊ឿ ប៊ុនថន នាយកដែនជម្រកសត្វព្រៃភ្នំឱរ៉ាល់ ខេត្តកំពង់ឆ្នាំង បានឲ្យដឹងថា លោកទទួលស្គាល់ថា ពិតជាមានការដាក់តាំងលក់អុសស្ទែទាំងនោះមែន ប៉ុន្តែអុសទាំងនោះមិនមែនកាប់ចេញពីដែនជម្រកសត្វព្រៃ ដែលការពារដោយក្នុងរបស់លោកទេ។ អុសទាំងនោះមួយចំនួនកាប់ចេញពីតំបន់វិនិយោគរបស់ ក្រុមហ៊ុនភាវីម៉ិច តែបច្ចុប្បន្ន បានប្រគល់មកឲ្យរដ្ឋគ្រប់គ្រងវិញ។ មួយចំនួនចេញពីតាមភូមិ និងមួយចំនួនតូចណាខ្លះទៀត ក៏អាចចេញពីតំបន់ដែនអភិរក្សខ្លះដែរ ដែលយើងមើលមិនបានដិតដល់ តែលោកនឹងព្យាយាម ការពារឲ្យបាន មិនឲ្យមានបញ្ហានេះទេ។
ទោះយ៉ាងនេះក្តី ក្រៅពីបទល្មើសខាងលើនេះ ក្នុងដែនជម្រកសត្វព្រៃដែលមានដាក់ស្លាកហាមចូលក្នុងដែនជម្រកសត្វព្រៃភ្នឱរ៉ាល់ បច្ចុប្បន្ននេះ គេកំពុងឃើញមានបទល្មើសមួយទៀតគឺការកាប់ទន្ទ្រានយកដីព្រៃក្នុងដែនជម្រកមួយនេះ ព័ត៌មាននេះយើងនឹងធ្វើបច្ចុប្បន្នភាពនៅពេលក្រោយ៕
ចែករំលែកព័តមាននេះ