កុំខ្លាចពួកចក្រពត្តិ ប្រទេសដែលឈ្លានពានគេបានបង្កើតសោកនាដកម្មទៅលើកុមារ
ខេត្តសៀមរាប ៖ សម្តេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានកិតិ្តយសគណៈកម្មាធិការជាតិគាំពារនិងអភិវឌ្ឍន៍
ខេត្តសៀមរាប ៖ សម្តេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានកិតិ្តយសគណៈកម្មាធិការជាតិគាំពារនិងអភិវឌ្ឍន៍
ខេត្តសៀមរាប ៖ សម្តេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានកិតិ្តយសគណៈកម្មាធិការជាតិគាំពារនិងអភិវឌ្ឍន៍កុមារតូច បានមានប្រសាសន៍អំពាវនាវស្នើឲ្យយើងទាំងអស់គ្នារួមបង្កើនសំឡេងឲ្យបានច្រើន ជាពិសេសអង្គការយូនីសេហ្វនៅក្នុងពេលប្រារព្ធសន្និសីទអន្តរជាតិទាក់ទងទៅនឹងការគាំពារកុមារនិងអភិវឌ្ឍន៍កុមារតូច គួរថ្កោលទោសប្រទេសណា ដែលឈ្លានពាន គេគិតតែពីសម្លាប់មនុស្ស និងកុមារនៅលើពិភពលោកនេះ បង្កើតសោកនាដកម្មទៅលើកុមារ ។
សម្តេចតេជោនាយករដ្ឋមន្ត្រី ហ៊ុន សែន មានប្រសាសន៍បែបនេះនាព្រឹកថ្ងៃទី១ ខែមីនា ឆ្នាំ២០១៧ នៅសណ្ឋាគារអង្គរអេរាក្រុងសៀមរាបខណៈអញ្ជើញជាអធិបតីក្នុងពិធីបើកសន្និសីទអន្តរជាតិថ្នាក់តំបន់អាស៊ីប៉ាស៊ីហ្វិកស្តីពីការអភិវឌ្ឍកុមារតូចសំដៅបម្រើបុព្វហេតុដល់ការយកចិត្តទុកដាក់ ការគាំពារ និងអភិវឌ្ឍកុមារតូចដោយជំរុញឲ្យមានការចូលរួមដ៏ទូលំទូលាយពីគ្រប់ភាគីពាក់ព័ន្ធ ។
ពាក់ព័ន្ធនឹងបញ្ហានេះ សម្តេចបានមានប្រសាសន៍ថា ប្រទេសណាដែលនាំកងទ័ពទៅឈ្លានពានប្រទេសគេច្រើនជាងគេ គឺប្រទេសនោះឯងដែលធ្វើការសម្លាប់កុមារច្រើនជាងគេ។ មិនត្រឹមតែធ្វើបាបកុមារនៅក្នុងប្រទេសដែលខ្លួននាំកងទ័ពទៅឈ្លានពានគេទេ ក៏ប៉ុន្តែធ្វើបាបទាំងកុមារដែលជាប្រទេសរបស់ខ្លួនផងដែរ។ ព្រោះអ្វី? ព្រោះនាំប្តីគេ នាំកូនគេទៅច្បាំងនៅប្រទេសក្រៅដល់ពេលស្លាប់ទៅធ្វើឲ្យស្ត្រីជាប្រពន្ធក្លាយជាស្ត្រីមេម៉ាយ សល់កូនកំព្រា ។
ឥឡូវយើងពិនិត្យមើលនិយាយត្រឹមតែពលកម្មកុមារ អំពីការថែទាំកុមារ ប៉ុន្តែយើងមិនសូវបាននិយាយទៅលើបញ្ហាសិទ្ធិរស់រានមានជីវិតរបស់កុមារតាមរយៈការសម្លាប់នោះទេ គួរពិនិត្យមើលការស្លាប់របស់គេក្នុងមួយថ្ងៃៗមានប៉ុន្មាន ? នៅអ៊ីរ៉ាក់ នៅលីប៊ី នៅស៊ីរី តើអ្នកណាជាអ្នកធ្វើរឿងនេះ ?
សម្តេចតេជោបានគូសបព្ជាក់ថា យើងគួរតែហ៊ាននិយាយត្រង់ៗ កុំខ្លាចពួកចក្រពត្តិនិយមដែលដើរតែឈ្លានពានគេ ។ សម្តេចក៏បានលើកឧទាហរណ៍មកបញ្ជាក់ថា កាលពីដើមកាលខ្ញុំនៅកុមាររងគ្រោះម្នាក់នៅក្នុងអតីតកាលដែលបារាំងត្រួតត្រា តាមឪពុកខ្ញុំនិយាយ ឪពុកម្តាយខ្ញុំទាញដៃទម្លាក់ក្នុងលេណដ្ឋានរៀងរាល់ពេល ដែលកងទ័ពបារាំងចាប់វ៉ៃគ្នា ។ បន្ទាប់មកនៅពេលដែលអាមេរិកឈ្លានពានកម្ពុជា តើមានកុមារកម្ពុជាប៉ុន្មានទៅដែលស្លាប់ របួស ពិការ និងបង្កើតនូវស្ថានភាពខ្វះអាហារូបត្ថម្ភ ។ កុមារនៅឥណ្ឌូចិនច្រើនណាស់ រហូតមកដល់ឥឡូវមិនទាន់អស់នូវផលវិបាករបស់វាដែលប៉ះពាល់ជាតិគីមី បានធ្វើឲ្យកុមារទាំងនោះក្លាយទៅជាអ្នកពិការមិនគ្រប់លក្ខណៈ។ ត្រង់នេះហើយមកពីអ្វី តើយើងមានបាននិយាយដល់ត្រង់នេះទេ ?
យើងគួរតែមានសំឡេងរួមមួយដើម្បីថ្កោលទោសពួកឈ្លានពាន ពួកដែលដើរសម្លាប់គេ ។ សព្វថ្ងៃនេះគេដើរឆែកតាមរោងចក្រគ្រប់អាយុឬនៅ ហ្នឹងរឿងមួយហើយ ប៉ុន្តែគេយករឿងនេះដើម្បីបន្ធូរបន្ថយរឿងផ្សេងទេ ។ ក៏ប៉ុន្តែគេមានបានដើរទៅឆែកនៅប្រទេសស៊ីរី ទៅប្រទេសលីប៊ី ទៅប្រទេសអុីរ៉ាក់ដែលពួកឈ្លានពានចូលទៅឈ្លានពានផ្តួលរំលំគេ ឬក៏គាំទ្របដិវត្តន៍ពណ៌នៅទីនោះយើងមានបានធ្វើកន្លែងហ្នឹងទេ ?
ខ្ញុំគិតថា អង្គការយូនីសេហ្វ គួរដំឡើងសំឡេងឲ្យខ្លាំងជាងគេបន្តិចឲ្យបានខ្លាំងជាងគេបន្តិច ។ នៅលើពិភពលោកនេះ ខ្ញុំសូមជម្រាបបន្តិច គ្រាន់តែមន្ទីរពេទ្យកម្រិត២របស់កម្ពុជា ដែលបោះទីតាំងនៅស៊ូដង់ខាងត្បូង នៅពេលដែលកងទ័ពប្រធានាធិបតីស៊ូដង់ខាងត្បូង និងអនុប្រធានាធិបតីស៊ូដង់ខាងត្បូងវ៉ៃគ្នា ស្ត្រីដែលទៅឆ្លងទន្លេនៅក្នុងមន្ទីរពេទ្យកម្ពុជានៅស៊ូដង់ខាងត្បូង គឺមានចំនួនដល់ទៅរាប់ពាន់នាក់ ហ្នឹងហើយជាផលពិបាកនៃសង្គ្រាម ។ ដូច្នេះខ្ញុំគិតថា យើងគួរកុំខ្លាច កុំខ្លាចនឹងនិយាយចំៗឈ្មោះជាមួយនឹងប្រទេសដែលដើរឈ្លានពានគេ បើមិនដូច្នោះយើងគ្រាន់តែបន្ទោសតែខ្លួនឯងហ្នឹង បន្ទោសតែគ្នាឯងហ្នឹង ។ ប៉ុន្តែអ្នកបង្កហេតុយើងអត់ហ៊ានបន្ទោសទេ ។ កម្ពុជានៅសល់គ្រាប់បែកច្រើនណាស់ ហើយជាបន្តបន្ទាប់ក្មេងស្លាប់ច្រើនណាស់ព្រោះក្មេងគ្នាអត់ស្គាល់គ្រាប់ឯណា តើនឹងជាអ្នកណា គឺអាមេរិកាំង គ្រាប់បែកអាមេរិក ។
សម្តេចមានប្រសាសន៍ថា ល្មមដល់ពេលហ៊ាននិយាយការពិតហើយ។ ខ្ញុំគិតថាយូនីសេហ្វ កុំខ្លាចជាមួយអាមេរិក ។ អាមេរិកបង់វិភាគទានឲ្យអង្គការសហប្រជាជាតិជារឿងរបស់អាមេរិកទេតើ ។ ប៉ុន្តែអាមេរិកដើរឈ្លានពានគេ គឺគួរតែហ៊ាននិយាយការពិត ។ ខ្ញុំគិតថា បរទេសទាំងឡាយមកកាន់ទីនេះ ក៏សុទ្ធតែជាបណ្តាប្រទេសរងគ្រោះ ដោយការឈ្លានពាន និងការរំលោភបំពានពីប្រទេស ក្រោមការមាក់ងាយពីប្រទេសដទៃទៀត ដែលជាប្រទេសសម្លាប់យើងហើយមកប្រដៅយើងទៀត ។ រឿងនេះហើយបានជាពួកអាមេរិកមិនចូលចិត្តខ្ញុំទេ ចូលចិត្តឬមិនចូលចិត្តខ្ញុំនិយាយត្រង់ថា អ្នកឯងឈ្លានពានខ្ញុំ នេះជារឿងពិត គ្រាប់បែក២លាន៥សែនតោនទម្លាក់នៅក្នុងប្រទេសកម្ពុជា ។
កុមាររបស់ខ្ញុំមួយឆ្នាំត្រូវស្លាប់ប៉ុន្មាន និងកុមារនៅវៀតណាម នៅឡាវក៏មិនទាន់បានដោះស្រាយ និងប្រទេសផ្សេងៗទៀតក៏កំពុងរងគ្រោះ ។ ប្រទេសណាដែលនាំកងទ័ពចេញទៅក្រៅឈ្លានពានច្រើនជាងគេ ប្រទេសនោះធ្វើបាបកុមារច្រើនជាងគេ ហើយមកតាំងខ្លួនឯងជាអ្នកដើរប្រដៅគេពីសិទ្ធិនេះ សិទ្ធិនោះរួចហើយយកទៅថ្លឹងមួយឆ្នាំៗចេញរបាយការណ៍ពលកម្មកុមារនៅក្នុងប្រទេសនេះប៉ុណ្ណេះៗ ។ ប៉ុន្តែអត់បាននិយាយថាខ្ញុំបានសម្លាប់កុមារនៅក្នុងប្រទេសនេះប៉ុណ្ណេះៗគឺអត់បាននិយាយផង! គួរនិយាយឲ្យត្រង់ៗតែម្តងទៅ ។ នេះខ្ញុំគ្រាន់តែរំឭកបើយើងនិយាយអំពីអាហារូបត្ថម្ភ អ្វីៗកុំភ្លេចនិយាយពីសិទ្ធិរស់រានមានជីវិតរបស់កុមារផង ។
សម្តេចតេជោបានមានប្រសាសន៍ថា នៅក្នុងកិច្ចការគាំពារកុមាររាជរដ្ឋាភិបាលបានដាក់ចេញនូវគោលនយោបាយជាតិ និងផែនការសកម្មភាពជាតិស្តីពីការគាំពារ និងអភិវឌ្ឍកុមារតូចឆ្នាំ២០១៤-២០១៨ សំដៅបុព្វហេតុផ្តល់ការយកចិត្តទុកដាក់ដល់ការគាំពារនិងអភិវឌ្ឍកុមារតូច ដោយជំរុញឲ្យមានការចូលរួមដ៏ទូលំទូលាយពីគ្រប់ភាគីពាក់ព័ន្ធ ៕
ចែករំលែកព័តមាននេះ