រាជធានីភ្នំពេញ ៖ អ៊ុដុង(Udon) ជាមីប្រពៃណីរបស់ជប៉ុនមួយប្រភេទ ដែលមានប្រវត្តិយូរលង់ណាស់មកហើយ ប្រៀបដូចនឹងនំបញ្ចុករបស់ខ្មែរដែរ ។ វាជាមីដែលផ្សំពីម្សៅស្រូវសាលី លាយជាមួយអំបិលនិងទឹក ។ ចំណែក
រាជធានីភ្នំពេញ ៖ អ៊ុដុង(Udon) ជាមីប្រពៃណីរបស់ជប៉ុនមួយប្រភេទ ដែលមានប្រវត្តិយូរលង់ណាស់មកហើយ ប្រៀបដូចនឹងនំបញ្ចុករបស់ខ្មែរដែរ ។ វាជាមីដែលផ្សំពីម្សៅស្រូវសាលី លាយជាមួយអំបិលនិងទឹក ។ ចំណែកការធ្វើគឺមានលក្ខណៈងាយស្រួលផងដែរ ដោយគ្រាន់តែមានការណែនាំបន្ដិចបន្ដួចពីអ្នកជំនាញប៉ុណ្ណោះ គ្រប់គ្នាអាចធ្វើបាន ។
មានការលើកឡើងផ្សេងៗគ្នាទាក់ទងទៅនឹងមីប្រពៃណីជប៉ុនមួយនេះ ដោយអ្នកខ្លះលើកឡើងថា មានប្រភពពីប្រទេសចិន និងខ្លះទៀតថា មានប្រភពពីប្រទេសកម្ពុជាតាំងពីសម័យឧដុង្គមកម្ល៉េះ ។ តើរឿងរ៉ាវប្រវត្តិមីអ៊ុដុងនេះ មានប្រភពពីណាឲ្យពិតប្រាកដ ?
នៅក្នុងមហោស្រពគីហ៊្សូណាលើកទី៦ ដែលបានប្រារព្ធធ្វើរយៈពេល៤ថ្ងៃនៅសាកលវិទ្យាល័យភូមិន្ទភ្នំពេញ ចាប់ពីថ្ងៃទី២៣ ដល់ថ្ងៃទី២៦ ខែកុម្ភៈកន្លងមក ប្រធានផ្នែកធនធានមនុស្សនៃភោជនីយដ្ឋានម៉ារឹហ្គាមិ អ៊ុដុង (MARUGAME UDON) បានឲ្យដឹងដោយផ្អែកលើឯកសារថា មីអ៊ុដុងនេះមានប្រភពពីប្រទេសចិនតាំងពី១ពាន់ឆ្នាំមុនមកម្ល៉េះ ដែលកាលនោះ មានសម្ដេចសង្ឃជនជាតិជប៉ុនព្រះនាម Kobou-daishi បាននាំមកពីប្រទេសចិន។ គ្រានោះ អ៊ុដុង គ្រាន់តែជាអាហារសម្រន់បំបាត់ភាពហេវហត់បន្ទាប់បន្សំប៉ុណ្ណោះ តែដោយឆ្លងកាត់ជាច្រើនសម័យកាលមក ប្រជាជនជប៉ុនក៏បានកែច្នៃមីអ៊ុដុងជាច្រើនប្រភេទ ។
កញ្ញា សុខ សូដា ប្រធានផ្នែកធនធានមនុស្សនិយាយថា ៖ «បច្ចុប្បន្ន មីអ៊ុដុងមាន៣ប្រភេទ គឺ Sanuki ដែលប្រជាជនជប៉ុនស្គាល់ជាទូទៅ Inaniwa និង Mizusawa ជាប្រភេទមីអ៊ុដុងដែលពុំសូវមានគេស្គាល់នោះទេ ព្រោះមីទាំងពីរប្រភេទនេះកម្រនឹងគេធ្វើណាស់ ល្គឹកណាមានពិធីធំៗ និងសំខាន់ៗទើបគេធ្វើ »។
កញ្ញា សុខ សូដា បានលើកឡើងថា ទាក់ទងនឹងមីអ៊ុដុងនេះ ភាគច្រើនប្រជាជនយល់ច្រឡំថា ជប៉ុនមកនៅខ្មែរ ហើយហូបនំបញ្ចុកខ្មែរ លុះនៅពេលត្រឡប់ទៅប្រទេស
ខ្លួនវិញ ក៏ធ្វើមីនេះឡើង ប៉ុន្តែជាក់ស្ដែងវាមិនមែនបែបនេះទេ ។ កញ្ញានិយាយថា៖«យើងមានប្រវត្តិបញ្ជាក់ គឺសម្ដេចសង្ឃជប៉ុនមួយអង្គបាននិមន្ដទៅប្រទេសចិនកាលពី១ពាន់ឆ្នាំមុន ហើយក៏បាននាំនូវមីមួយប្រភេទដែលជំនាន់នោះគេមិនហៅថា អ៊ុដុងនោះទេ គឺគេហៅSakube ប៉ុន្ដែឆ្លងកាត់ជាច្រើនជំនាន់ ប្រជាជនជប៉ុនបានអភិវឌ្ឍន៍មីប្រភេទនេះជាបន្ដបន្ទាប់ និងចុងក្រោយគឺឲ្យឈ្មោះថា អ៊ុដុង តែម្ដង ហើយបន្ដរហូតមកដល់សព្វថ្ងៃ » ។
ផ្ទុយពីការលើកឡើងនេះ មន្ត្រីទទួលបន្ទុកផ្នែកវប្បធម៌និងសិល្បៈនៃស្ថានទូតជប៉ុនប្រចាំកម្ពុជា បានឲ្យដឹងដោយផ្អែកតាមឯកសារដែលលោកស្រីធ្លាប់ដឹងថា មីអ៊ុដុង គឺមានប្រភពពីប្រទេសកម្ពុជាមែន ។
លោកស្រី កាអូរិ តាណាបេ លេខាទី២ស្ថានទូតជប៉ុន ថ្លែងថា ៖ «ជាយូរលង់ណាស់មកហើយ មានប្រជាជនជប៉ុនប្រមាណ៣០០ទៅ៤០០គ្រួសារ បានរស់នៅក្នុងភូមិមួយនៃស្រុកពញាឮ ក្បែរប្រាសាទឧដុង្គ ។ កាលណោះ ពួកគេបានហូបនំបញ្ចុកខ្មែរ ហើយដោយសារឆ្លងកាត់សម័យកាលជាច្រើន មានអ្នកខ្លះក៏ត្រឡប់ទៅរស់នៅប្រទេសជប៉ុនវិញ ហើយក៏បានធ្វើមីម្យ៉ាងដែលស្រដៀងនឹងនំបញ្ចុកខ្មែរ ដោយដាក់ឈ្មោះថា អ៊ុដុង និងជាប់ឈ្មោះនេះរហូតដល់សព្វថ្ងៃ ។
លោកស្រីថែមទាំងបញ្ជាក់ថា សម័យកាលនោះក៏មានជនជាតិជប៉ុនយកគ្រាប់ល្ពៅពីស្រុកខ្មែរទៅដាំនៅប្រទេសជប៉ុនដែរ ហើយបានដាក់ឈ្មោះល្ពៅថា ផ្លែ kabocha រហូតដល់សព្វថ្ងៃ ។
យោងតាមឯកសារដែលចងក្រងនៅក្នុងគេហទំព័រ Wikipedia បានលើកឡើងថា មានរឿងរ៉ាវជាច្រើនដែលបានពន្យល់ផ្សេងៗគ្នាអំពីប្រភពនៃមីអ៊ុដុងនេះ ។ ការពន្យល់មួយក្នុងចំណោមទាំងអស់នោះ បាននិយាយថា ក្នុងសម័យកាល Heian អំឡុងឆ្នាំ៧៩៤ដល់១១៨៥ មានព្រះសង្ឃព្រះពុទ្ធសាសនាមួយអង្គ ព្រះនាម Kukai បានណែនាំមីអ៊ុដុងនេះនៅខេត្ត Shikoku បន្ទាប់ពីព្រះអង្គបានធ្វើដំណើរទៅប្រទេសចិននៅអំឡុងដើមសតវត្សរ៍ទី៩ ដើម្បីសិក្សា ។ តាំងពីពេលនោះមក ខេត្ត Shikoku ក៏បានទាមទារឲ្យមានការទទួលស្គាល់ថាខ្លួនជាអ្នកផលិតមីអ៊ុដុងដំបូងគេ ដែលណែនាំដោយព្រះសង្ឃនាម Kukai ៕
ចែករំលែកព័តមាននេះ