ប្រទេសជប៉ុន ៖ ប្រតិភូបាននិយាយកាលពីថ្ងៃចន្ទ ជាថ្ងៃដំបូងនៃការចរចារយៈពេល៥ថ្ងៃថា កិច្ចព្រមព្រៀងដៃគូសេដ្ឋកិច្ចយោគយល់ក្នុងតំបន់ (RCEP) ដែលនឹងរាប់បញ្ចូលប្រជាជនពាក់កណ្តាលនៃចំនួនប្រជាជនពិភពលោក បានមកកាន់ចំណុចដ៏សំខាន់មួយ ។
សន្និសីទ RCEP Kobe គឺជាការចរចាដំណាក់កាលទីមួយក្នុងឆ្នាំនេះ និងជាការចរចាដំបូងតាំងពីលោកប្រធានាធិបតី Donald Trump របស់សហរដ្ឋអាមេរិកប្រកាសថា នឹងដកអាមេរិកចេញពីកិច្ចព្រមព្រៀងដៃគូពាណិជ្ជកម្មឆ្លងសមុទ្រប៉ាស៊ីហ្វិក (TPP) ។
ការចរចានេះកើតមានឡើង ខណៈគំនិតលើកិច្ចព្រមព្រៀងពហុភាគីបានធ្លាក់នៅក្រោមការរិះគន់ពីសាធារណៈ ព្រោះតែមានការកើនឡើងនៃភាពព្រួយបារម្ភពីផលប៉ះពាល់អាចកើតមានដូចជា សុខភាពសាធារណៈ សិទ្ធិមនុស្ស និងបរិស្ថាន ។
លោក Iman Pambagyo ប្រធានគណៈកម្មាធិការចរចាពាណិជ្ជកម្ម RCEP ឥណ្ឌូណេស៊ី ថ្លែងថា ៖ « ពួកយើងពិតជាបានមកដល់ចំណុចគ្រោះថា្នក់មួយហើយ ។ កិច្ចប្រជុំ Kobe នេះនឹងមានសារសំខាន់ណាស់សម្រាប់ការចរចាដែលនៅសល់ក្នុងឆ្នាំនេះ » ។
ដោយមានការកត់សម្គាល់ពីការកើនឡើងនៃគំនិតការពារនិយមលើពិភពលោក លោកបន្ថែមថា អ្នកចរចាមិនអាចមិនទទួលស្គាល់ពីភាពព្រួយបារម្ភលើការធ្វើសកលភាវូបនីយកម្មទេ ហើយ RCEP ត្រូវតែព្យាយាមស្វែងរកលំនឹងរវាងប្រទេសអភិវឌ្ឍន៍ និងប្រទេសកំពុងអភិវឌ្ឍន៍ទាំងអស់ដែលចូលរួមក្នុងការចរចា ។
នាយករងរបស់ក្រសួងការបរទេសជប៉ុន លោក Keiya Iida បានថ្លែងពីភាពចាំបាច់នៃការធានាថា នឹងមានកិច្ចព្រមព្រៀងមានគុណភាពខ្ពស់, កិច្ចព្រមព្រៀងមានភាពទូលំទូលាយ និងធានាតួនាទីសម្រាប់រាល់អ្នកចូលរួមមានសហគ្រាសធុនតូច និងមធ្យមក្នុងតំបន់អាស៊ីប៉ាស៊ីហ្វិក ហើយត្រូវងាកទៅមើលភាពព្រួយបារម្ភរបស់សង្គមស៊ីវិល។
ប៉ុន្តែការដួលរលំរបស់ TPP នឹងប៉ះពាល់ដល់ការចរចា Kobe ឬអត់ គឺមិនទាន់ដឹងច្បាស់នៅឡើយទេ ។
អ្នកតំណាង NGO កត់សម្គាល់ថា TPP នឹងត្រូវបានលើកយកមកនិយាយក្នុងបន្ទប់ចរចាជាពិសេសដោយសមាជិក RCEP មួយចំនួនដូចជាជប៉ុន ក៏ចូលរួមក្នុង TPP ហើយកំពុងព្យាយាមលេបការពិតថា RCEP រួមមាន ប្រទេសចិន និងឥណ្ឌា ដោយគ្មានការចូលរួមពីសហរដ្ឋអាមេរិក បានក្លាយជាកិច្ចព្រមព្រៀងពហុភាគីធំជាងគេសម្រាប់ប្រទេសអាស៊ីហើយ ៕
ចែករំលែកព័តមាននេះ