ក្រុងប៉េកាំង ៖ ប្រទេសចិន និងរុស្ស៊ីបានឯកភាពគ្នាបង្កើនការប្រឆាំងរបស់ពួកគេថែមទៀត ដើម្បីទប់ស្កាត់ការដាក់ពង្រាយប្រព័ន្ធមីស៊ីលការពាររបស់សហរដ្ឋអាមេរិកនៅ
ក្រុងប៉េកាំង ៖ ប្រទេសចិន និងរុស្ស៊ីបានឯកភាពគ្នាបង្កើនការប្រឆាំងរបស់ពួកគេថែមទៀត ដើម្បីទប់ស្កាត់ការដាក់ពង្រាយប្រព័ន្ធមីស៊ីលការពាររបស់សហរដ្ឋអាមេរិកនៅក្នុងប្រទេសកូរ៉េខាងត្បូង នេះបើតាមក្រសួងការបរទេសចិនបាននិយាយ នៅថ្ងៃពុធទី១ មិនា ២០១៧ នេះ ។
ប្រទេសកូរ៉េខាងត្បូង បានសម្រេចចិត្តកាលពីឆ្នាំមុន បង្កើតស្ថានីយដើម្បីដាក់ពង្រាយប្រព័ន្ធការពារមីស៊ីលធុន(THAAD) របស់សហរដ្ឋអាមេរិក នៅក្នុងការឆ្លើយតបទៅនឹងការគំរាមកំហែងពីគ្រាប់មីស៊ីលរបស់កូរ៉េខាងជើង ។ ទាំងនេះជាមូលហេតុធ្វើអោយចិននិងរុស្ស៊ីភ័យខ្លួនដែរមែនទេ ?
អាចជាមូលហេតុមួយដែរ ព្រោះធ្វើអោយប្រទេសចិន និងប្រទេសរុស្ស៊ី មានការព្រួយបារម្ភថា ប្រព័ន្ធរ៉ាដានៃប្រព័ន្ធការពាររបស់សហរដ្ឋអាមេរិក មានឥទ្ធិពល អាចជ្រាបចូលទឹកដីរបស់ខ្លួន និងធ្វើឱ្យប៉ះពាល់ដល់សន្តិសុខរបស់ពួកគេបាន ហើយបានបង្អាក់ដល់តុល្យភាពនៃអំណាចនៅក្នុងតំបន់ ខណៈពេលដែលស្ថានភាពតានតឹងនៅលើឧបទ្វីបកូរ៉េក៏កំពុងឡើងកំដៅ ។
ប៉ុន្តែមន្ត្រីកូរ៉េខាងត្បូងបាននិយាយថា THAAD គឺជាវិធានការមួយការពារជាតិ ដើម្បីប្រឆាំងនឹងការគម្រាមសុទ្ធសាធពីកូរ៉េខាងជើង ហើយក៏មិនបានកំណត់គោលដៅទៅប្រទេសផ្សេងទៀតនោះដែរ ។
មន្ត្រីកូរ៉េខាងត្បូងបាននិយាយទៀតថា ពួកគេរំពឹងថា ប្រព័ន្ធកាំជ្រួចមីស៊ីលដែលត្រូវបានដាក់ពង្រាយ និងចាប់ផ្តើមប្រតិបតិ្តការនៅក្នុងឆ្នាំនេះ ។
ប្រទេសចិនបានជំរុញឱ្យមានការបន្តកិច្ចពិភាក្សាទាំង៦ភាគី រួមមានប្រទេសកូរ៉េខាងជើង កូរ៉េខាងត្បូង, ជប៉ុន, រុស្ស៊ី និងសហរដ្ឋអាមេរិក រិះរកមធ្យោបាយដើម្បីដោះស្រាយពាក់ព័ន្ធទៅនឹងមហិច្ឆតានុយក្លេអ៊ែររបស់កូរ៉េខាងជើង ។
ប្រធានាធិបតីចិន លោក Xi Jin ping បានធ្វើការជំទាស់ជាថ្មី ដោយខឹងសម្បារយ៉ាងខ្លាំង លើការដាក់ពង្រាយប្រព័ន្ធការពារមីស៊ីលអាមេរិក THAAD នៅលើទឹកដីប្រទេសកូរ៉េខាងត្បូង ។
ងាកមកមើលលើការដាក់ពង្រាយប្រព័ន្ធការពារមីស៊ីលនេះគេអាចសន្ឋិដ្ឋានថា វាអាចនឹងប៉ះពាល់ដល់តំបន់សេដ្ឋកិច្ចចិន ហើយប្រសិនបើប្រព័ន្ធ THAAD ត្រូវបានដាក់ពង្រាយនៅកូរ៉េខាងត្បូងពិតប្រាកដនោះ ចំណងទំនាក់ទំនងចិន-កូរ៉េខាងត្បូង នឹងកាត់ផ្តាច់ជាមិនខាន ។
គួររលឹកផងដែរថា រដ្ឋាភិបាលទីក្រុងប៉េកាំងធ្លាប់បានប្រឆាំងជាច្រើនដងមកហើយ លើការដាក់ប្រព័ន្ធ THAAD នេះ ដោយសារតែ នៅពេលដែលវាមានការប៉ះទង្គិចរវាងមីស៊ីលកូរ៉េខាងជើង គឺអាចជះឥទ្ធិពលដល់តំបន់នៅជុំវិញនោះជាពិសេសប្រទេសចិន ។ ទោះបីជាមានការជំទាស់យ៉ាងណាក្តី ក៏អាមេរិក និងកូរ៉េខាងជើង មិនព្រមពន្យារពេលការងាររបស់ពួកគេនោះឡើយ ៕
ចែករំលែកព័តមាននេះ