ចង់ធ្វើជានគរបាលបានត្រឹមតែក្តីស្រមៃ ជួយសម្រួលចរាចរណ៍ដល់សិស្សរាល់ថ្ងៃ ដើម្បីសង្គម
ខេត្តមណ្ឌលគិរី ៖ ជីវិតមនុស្សរស់នៅលើភពផែនដីនេះ ជនណាក៏ចង់រស់នៅក្នុងសភាពមានបាន មានមុខរបរ មានការងារ មានកេរ្តិ៍ឈ្មោះ បុណ្យសក្តិ ក្នុងសង្គមដែរ
ខេត្តមណ្ឌលគិរី ៖ ជីវិតមនុស្សរស់នៅលើភពផែនដីនេះ ជនណាក៏ចង់រស់នៅក្នុងសភាពមានបាន មានមុខរបរ មានការងារ មានកេរ្តិ៍ឈ្មោះ បុណ្យសក្តិ ក្នុងសង្គមដែរ
ខេត្តមណ្ឌលគិរី ៖ ជីវិតមនុស្សរស់នៅលើភពផែនដីនេះ ជនណាក៏ចង់រស់នៅក្នុងសភាពមានបាន មានមុខរបរ មានការងារ មានកេរ្តិ៍ឈ្មោះ បុណ្យសក្តិ ក្នុងសង្គមដែរ ហើយមនុស្សតែងមានក្តីស្រមៃ និងបំណងប្រាថ្នាផ្សេងៗពីគ្នា ។ ប៉ុន្តែមនុស្សគ្រប់រូបមិនមែនសុទ្ឋតែអាច សម្រេចនូវក្តីស្រមៃរបស់ខ្លួនបានទាំងអស់នោះដែរ ជាក់ស្តែងបុរសម្នាក់រស់នៅស្រុកកែវសីមា ដែលមានបំណងប្រាថ្នាតាំងពីនៅកុមារភាពចង់ធ្វើជានគរបាល ប៉ុន្តែបំណងនោះបានត្រឹមក្តីស្រមៃប៉ុណ្ណោះ ។
នៅកណ្តាលថ្ងៃត្រង់ និងនៅពេលល្ងាច ជារៀងរាល់ថ្ងៃ ចាប់ពីថ្ងៃចន្ទរហូតដល់ថ្ងៃសៅរ៍ ពេលធ្វើដំណើរតាមបណ្តោយផ្លូវជាតិលេខ៧៦ ដល់មុខសាលារៀនស្រុកកែវសីមា គេនឹងឃើញបុរសម្នាក់ ស្លៀកពាក់ស្រដៀងគ្នាជាមួយឯកសណ្ឋាននគរបាល ហើយឈរសម្រួលចរាចរណ៍ឲ្យសិស្សានុសិស្ស ពេលចេញពីសាលារៀន ។
បុរសដែលស្លៀកពាក់ស្រដៀងឯកសណ្ឋាននគរបាលនោះ បានបញ្ជាក់ថា លោកមិនមែនជានគរបាលអ្វីទេ តែលោកកំពុងបំពេញកាងារឲ្យនគរបាល ក្នុងតួនាទីជាប្រជាកាពារភូមិ ។ គាត់មានឈ្មោះស្រឿន ស្រស់ អាយុ៣៧ឆ្នាំ មានទីលំនៅភូមិឡាប៉ាខេ ឃុំស្រែខ្ទុម ស្រុកកែវសីមា ជាប្រចាំថ្ងៃ ចាប់ពីថ្ងៃចន្ទដល់ថ្ងៃសៅរ៍ គាត់ត្រូវទៅសម្រួលចរាចរណ៍ ឲ្យសិស្សានុសិស្សចេញពីសាលាក្នុងមួយថ្ងៃ២វេន ។
លោក ស្រឿន ស្រស់ បន្តថា លោកជាប្រជាការពារភូមិហើយត្រូវបានលោកអធិការស្រុកកែវសីមា ជ្រើសរើសយកទៅជួយសម្រួលចរាចរណ៍ ដោយឲ្យប្រាក់ក្នុង១ខែម្ភៃម៉ឺនរៀល ។
រាល់ថ្ងៃនេះគាត់ត្រូវប្រឈម និងបញ្ហាជីវភាព លើការចិញ្ចឹមបីបាច់កូនតូចៗចំនួន០៤នាក់ ក្នុងនោះប្រពន្ធជាអ្នកលក់បន្លែកំប៉ិកកំប៉ុកក្នុងផ្សារ ហើយគាត់ក្រៅពីការងារប្រជាកាពារ ក៏ទៅជួយលក់ប្រពន្ធ និងមើលថែកូនតូចៗ ។
លោក ស្រឿន ស្រស់ បន្តទៀតថា ប្រាក់ខែម្ភៃម៉ឺនរៀលនោះ គឺមិនអាចជួយឲ្យជីវភាពលោកបានធូរស្រាលនោះទេ ប៉ុន្តែដោយឆន្ទៈស្នេហាលើការងារ លោកត្រូវតែបំពេញតួនាទីឲ្យបានល្អប្រសើរ ។
នៅក្នុងការធ្វើចរាចរណ៍ជាប្រចាំថ្ងៃនោះលោកស្រឿន ស្រស់ បានទទួលក្តីអាណិតអាសូរ ពីសិស្សសាលាក៏ដូចជាលោកគ្រូអ្នកគ្រូ ហើយពួកគេតែងតែផ្តល់ជាទឹក ឬភេសជ្ជៈដល់លោក ហូបបន្ថយភាពនឿយហត់ និងតែងផ្តល់ជាកម្លាំងចិត្តជានិច្ចដល់លោក ។
លោកស្រឿន ស្រស់ បានបង្ហាញក្តីប្រាថ្នាកាលពីនៅក្មេងថា លោកនឹងចូលបម្រើការងារជានគរបាល ដើម្បីបម្រើប្រជាពលរដ្ឋ ប៉ុន្តែក្តីស្រមៃរបស់លោក មិនអាចសម្រេចបាននោះទេ ។ ព្រោះនៅពេលនេះ អាយុកាន់តែច្រើនហើយ នគរបាលគេមិនទទួលពាក្យឡើយ អ៊ីចឹងមានតែធ្វើប្រជាកាពារ ក៏បានបម្រើប្រជាពលរដ្ឋដែរ ។
លោកស៊ុន ប៊ុនធឿន អធិការនគរបាលស្រុកកែវសីមា បានឲ្យដឹងថា លោកស្រឿន ស្រស់ ហៅ តាស៊ីស ជាប្រជាការពារ ដែលលោកស្នើពីឃុំ ឲ្យជួយសម្រួលចរាចរណ៍មុខសាលាពេលសិស្សចេញពីរៀន ជារៀងរាល់ថ្ងៃ ។
លោកអធិការបន្តថា ប្រជាការពារខាងលើ ជាមនុស្សគោរពម៉ោងការងារណាស់ ឧស្សាហ៍ព្យាយាម និងមានទំនួលខុសត្រូវលើការងារខ្លួនជានិច្ច ។ សម្រាប់ប្រាក់ម្ភៃម៉ឺនរៀល ដែលជួនគាត់ប្រចាំខែនោះ មិនមែនជាប្រាក់បៀវត្តន៍ អ្វីនោះទេ តែជាប្រាក់របស់លោកផ្ទាល់ សម្រាប់ជួយលើកទឹកចិត្តដល់លោកស្រឿន ស្រស់ តែប៉ុណ្ណោះ។
លោកអធិការបន្តថា ក្នុងនាមលោកជាអធិការនគរបាលស្រុក លោកពិតជាកោតសរសើរចំពោះទឹកចិត្តលោកស្រឿន ស្រស់ ខ្លាំងណាស់ ដែលបានចំណាយពេលវេលាផ្ទាល់ខ្លួន សម្រាប់សិស្សសាលា និងសង្គមទាំងមូល ។
លោកអធិការបញ្ជាក់ថា ខែខ្លះលោកមានប្រាក់មិនគ្រប់ម្ភៃម៉ឺនផ្តល់ជួនលោកស្រឿន ស្រស់ នោះទេ ។ ក្នុងនោះក៏ស្នើសុំខាងរដ្ឋបាលសាលាស្រុក បញ្ជាការអាវុធហត្ថ តំបន់សឹករង ឬសប្បុរសជន មេត្តាជួយបន្ថែមប្រាក់ឧបត្ថម្ភ ដល់លោកស្រឿន ស្រស់ បន្ថែមទៀតផង ដើម្បីជួយជម្រុញទឹកចិត្ត នឹងសម្រួលដល់ជីវភាពរបស់គាត់ ដែលកំពុងជួបបញ្ហាខ្វះខាត នាពេលបច្ចុប្បន្ននេះ៕
ចែករំលែកព័តមាននេះ