ចែកអំណោយជួយអ្នករងគ្រោះឆេះផ្ទះ
ខេត្តកោះកុង ៖ នៅព្រឹកថ្ងៃទី28 ខែកុម្ភៈ ឆ្នាំ២០១៧ លោក ប៊ុន លើត អភិបាលខេត្តកោះកុង ក្នុងនាមជាប្រធានកិត្តិយសសាខាកាកបាទខេត្តផងនោះ បានដឹកនាំប្រធានមន្ទីរ និងប្រធានស្ថាប័ននានាជុំវិញខេត្ត មន្ត្រី
ខេត្តកោះកុង ៖ នៅព្រឹកថ្ងៃទី28 ខែកុម្ភៈ ឆ្នាំ២០១៧ លោក ប៊ុន លើត អភិបាលខេត្តកោះកុង ក្នុងនាមជាប្រធានកិត្តិយសសាខាកាកបាទខេត្តផងនោះ បានដឹកនាំប្រធានមន្ទីរ និងប្រធានស្ថាប័ននានាជុំវិញខេត្ត មន្ត្រី អាជ្ញាធរមូលដ្ឋាន ព្រមទាំងមានព្រះសង្ឃចូលរួមផងដែរ បានចុះចែកអំណោយដល់គ្រួសារពលរដ្ឋដែលត្រូវភ្លើងឆេះផ្ទះចំនួន5គ្រួសារ កាលពីថ្ងៃទី27 កុម្ភៈ កន្លងទៅ នៅចំណុចចំការកៅស៊ូ ស្ថិតក្នុងភូមិត្រពាំង ឃុំស្រែអំបិល ស្រុកស្រែអំបិល ។
អំណោយជាបឋមដែលទៅចែកជូនដល់ក្រុមគ្រួសារពលរដ្ឋរងគ្រោះទាំង5គ្រួសារ ដោយអគ្គីភ័យនេះ សាខាកាកបាទក្រហមខេត្តបានឧបត្ថម្ភដូចជា អង្ករ 50 kg, មី 2កេស, ត្រីខកំប៉ុង 1ឡូ និងសម្ភារជាច្រើនមុខទៀត ដូចជា ធុងចំរុះទឹក, កៅស៊ូតង់, ប្រេងឆា, ទឹកត្រី, ចង្ក្រាន, ឆ្នាំងបាយ, ឆ្នាំងសម្ល, ខ្ទះឆា, វែកបាយ, វែកសម្ល, វែកឆា, ចានបាយ, ចានសម្ល, ស្លាបព្រា, ជ្រុញ, កាំបិត, ទឹកស៊ីអ៊ីវ, ទឹកបរិសុទ្ធ និងឃីតមួយកញ្ចប់ ក្នុងនោះមាន ភួយ មុង ក្រមា សារុង និង ថវិកាចំនួន20ម៉ឺនរៀល សម្រាប់3គ្រួសារត្រូវអគ្គីភ័យឆេះអស់ទាំងស្រុង និង10 ម៉ឺនរៀល សម្រាប់2គ្រួសារដែលឆេះ 50% ។ ចំណែកសាលាខេត្តបានឧបត្ថម្ភក្នុង1គ្រួសារថវិកាចំនួន4សែនរៀលបន្ថែមទៀត ។
លោក ប៊ុន លើត បានលើកឡើងថា ការផ្តល់អំណោយពេលនេះ ជាអំណោយបឋមសម្រាប់ដោះទាល់ពេលបងប្អូនកំពុងជួបការខ្វះខាត ហើយក្រៅពីអំណោយខាងលើនេះ ក៏នៅមាន សប្បុរសជន មានទាំងព្រះសង្ឃផង ក៏បានចូលរួមក្នុងសកម្មភាពមនុស្សធម៌នេះដែរ ៕
ចែករំលែកព័តមាននេះ