ព្រឹទ្ធសភាអនុម័តជាឯកច្ឆ័ន្ទលើសេចក្តីស្នើ វិសោធនកម្មច្បាប់ស្ដីពីគណបក្សនយោបាយ
រាជធានីភ្នំពេញ ៖ សមាជិកព្រឹទ្ធសភាចំនួន៤៤រូបមកពីគណបក្សប្រជាជនកម្ពុជាបានលើកដៃអនុម័តសេចក្តីស្នើវិសោធនកម្មច្បាប់ស្តីពីគណបក្សនយោបាយ
រាជធានីភ្នំពេញ ៖ សមាជិកព្រឹទ្ធសភាចំនួន៤៤រូបមកពីគណបក្សប្រជាជនកម្ពុជាបានលើកដៃអនុម័តសេចក្តីស្នើវិសោធនកម្មច្បាប់ស្តីពីគណបក្សនយោបាយ
រាជធានីភ្នំពេញ ៖ សមាជិកព្រឹទ្ធសភាចំនួន៤៤រូបមកពីគណបក្សប្រជាជនកម្ពុជាបានលើកដៃអនុម័តសេចក្តីស្នើវិសោធនកម្មច្បាប់ស្តីពីគណបក្សនយោបាយបន្ទាប់ពីរដ្ឋសភាផ្ញើមកកាលពីពេលថ្មីៗនេះនៅព្រឹកថ្ងៃទី២៨ កុម្ភៈ ឆ្នាំ២០១៧ ។ ជាមួយគ្នានេះ ក្រុមសមាជិកព្រឹទ្ធសភាមកពីគណបក្ស សម រង្ស៊ី បានប្រកាសមិនទទួលស្គាល់។
ការអនុម័តច្បាប់ដែលត្រូវបានបក្សប្រឆាំងថាជាច្បាប់គាបសង្កត់ពួកគេនោះធ្វើឡើងក្នុងសម័យប្រជុំវិសាមញ្ញនីតិកាលទី៣ ព្រឹទ្ធសភា ក្រោមអធិបតីភាពសម្តេចវិបុលសេនាភក្តីសាយ ឈុំ ប្រធានព្រឹទ្ធសភា។
លោក ម៉ម ប៊ុននាង អ្នកនាំពាក្យព្រឹទ្ធសភាបានឲ្យដឹងក្រោយសម័យប្រជុំព្រឹទ្ធសភាថា ក្នុងសម័យប្រជុំសភាមានការពិភាក្សាយ៉ាងហ្មត់ចត់ដោយបានលើកឡើងពីទិដ្ឋភាពនយោបាយ និងច្បាប់ផងដែរ ។ លោកបញ្ជាក់ថា៖«យើងមើលចំណុចពីរដែលជាចំណុចសំខាន់គឺទី១-ច្បាប់នេះរក្សាបានស្ថេរភាពនយោបាយ ទី២-ដើម្បីទប់ស្កាត់មិនឲ្យមានសង្គ្រាមកើតឡើង ។
ច្បាប់នេះបានធ្វើឡើងដោយដកស្រង់ពីចំណុចសំខាន់ៗដែលមាននៅក្នុងរដ្ឋធម្មនុញ្ញ ។ យើងអត់មានយកពីច្បាប់ឬអ្វីផ្សេងនោះទេគឺយកពីរដ្ឋធម្មនុញ្ញ ហើយច្បាប់នេះនឹងបម្រើផលប្រយោជន៍ឲ្យគណបក្សនយោបាយទាំងអស់»។
ការអនុម័តសេចក្តីស្នើសុំវិសោធនកម្មច្បាប់ស្ដីពីគណបក្សនយោបាយនេះ ទោះបីជាមិនមានការចូលរួមពីសមាជិកព្រឹទ្ធសភាមកពីគណបក្សសម រង្ស៊ី ក្តី ប៉ុន្តែក្នុងកិច្ចប្រជុំគណៈកម្មាធិការអចិន្ត្រៃយ៍កន្លងទៅ លោកម៉ម ប៊ុននាង ឲ្យដឹងថា សមាជិកអចិន្ត្រៃយ៍ព្រឹទ្ធសភាគណបក្ស សម រង្ស៊ី បានចូលរួមពិភាក្សាយ៉ាងផុសផុល ។ លោកបញ្ជាក់ថា៖ «សមាជិកបក្សសម រង្ស៊ី អត់បានចូលរួមទេ ប៉ុន្តែគាត់ចូលរួមពេលប្រជុំអចិន្ត្រៃយ៍ ។ ការអនុម័តច្បាប់នេះត្រូវការសំឡេង៥០%បូក១ តែសមាជិកព្រឹទ្ធសភាថ្ងៃនេះចូលរួម៤៤រូបហើយ បានលើកដៃទាំង៤៤រូបអនុម័តច្បាប់នេះ »។
ជាមួយគ្នានោះដែរ អ្នកនាំពាក្យព្រឹទ្ធសភាក៏បានឲ្យដឹងថា រាល់ច្បាប់ទាំងអស់ពេលព្រឹទ្ធសភាអនុម័តហើយនឹងបញ្ជូនទៅក្រុមប្រឹក្សាធម្មនុញ្ញពិនិត្យ ហើយដាក់ថ្វាយព្រះមហាក្សត្រឡាយព្រះហស្តលេខា ដើម្បីដាក់ឲ្យប្រជាពលរដ្ឋប្រើប្រាស់ និងអនុវត្ត ។ ចំពោះការមិនចូលរួមពិភាក្សា និងអនុម័តរបស់សមាជិកព្រឹទ្ធសភាគណបក្ស សម រង្ស៊ី ជាសិទ្ធិរបស់គេ ប៉ុន្តែអ្វីដែលគាត់មិនចូលរួមនោះបង្ហាញឲ្យឃើញថា គាត់បានបោះបង់នូវអ្វីដែលជាចំណុចសំខាន់ៗដែលប្រជាពលរដ្ឋបានផ្តល់សិទ្ធិឲ្យគាត់ធ្វើជាតំណាងក្នុងការជជែកគ្នា ។
ទោះបីជាមានមតិមួយចំនួនលើកឡើងថា ការធ្វើវិសោធនកម្មច្បាប់ស្ដីពីគណបក្សនយោបាយនេះហាក់មានការប្រញាប់ និងដាក់គំនាបទៅលើគណបក្សប្រឆាំងយ៉ាងណាក្តី លោក ម៉ម ប៊ុននាង បានអះអាងថា មិនមានការប្រញាប់ប្រញាល់នោះទេ ។ លោកថា ក្នុងការស្នើច្បាប់ បើសិនជារដ្ឋសភាស្នើមកចាត់ទុកជាការប្រញាប់ នៅក្នុងរដ្ឋធម្មនុញ្ញបានចែងយ៉ាងច្បាស់ថា ទុកពេលវេលារយៈពេលតែ៥ថ្ងៃប៉ុណ្ណោះ ដោយមិនឲ្យលើសពី៥ថ្ងៃដើម្បីទុកពេលវេលាពិភាក្សាច្បាប់ដែលបានផ្ញើមកពីរដ្ឋសភា ។ នេះបើយើងយោងទៅតាមរដ្ឋធម្មនុញ្ញ យើងធ្វើអ្វីមួយយើងផ្អែកលើច្បាប់ទាំងអស់ អ៊ីចឹងយើងឃើញហើយថា ពេលច្បាប់ចូលមកភ្លាម អចិន្ត្រៃយ៍បានប្រជុំពិភាក្សា លើទម្រង់ច្បាប់ និងគតិច្បាប់មុននឹងដាក់ទៅគណៈកម្មការជំនាញសិក្សាស្វែងយល់ពីគតិច្បាប់ និងទម្រង់ច្បាប់។
អ្នកនាំពាក្យព្រឹទ្ធសភារូបនេះក៏បានអំពាវនាវដល់គណបក្សនយោបាយ និងអង្គការសង្គមស៊ីវិលទាំងអស់កុំគិតថា មានការព្រួយបារម្ភ និងគាបសង្កត់ឲ្យសោះ ។ លោកថា ច្បាប់គេធ្វើឡើងដើម្បីអនុវត្តសម្រាប់មនុស្សដែលប្រព្រឹត្តខុសនិងល្មើសច្បាប់នោះទេ ។ លោកជឿជាក់ថា ទាំងរូបលោក និងអស់លោកមួយចំនួនគ្មានការព្រួយបារម្ភនោះទេ ព្រោះថាយើងបង្កើតឡើងដើម្បីផលប្រយោជន៍ជាតិ ស្ថេរភាព និងអភិវឌ្ឍន៍ មិនមែនធ្វើច្បាប់ឡើងដើម្បីបែកបាក់ ឬប្រះស្រាំជាតិនោះទេ។
ទោះបីយ៉ាងណានៅថ្ងៃដដែល ក្រុមសមាជិកព្រឹទ្ធសភាគណបក្ស សម រង្ស៊ី បានចេញសេចក្ដីថ្លែងការណ៍មិនគាំទ្រលើសំណើធ្វើវិសោធនកម្មច្បាប់ស្តីពីគណបក្សនយោបាយដែលសមាជិកព្រឹទ្ធសភាគណបក្សប្រជាជនកម្ពុជាអនុម័តទេ ។ មិនគាំទ្រដោយសារ ខ្លឹមសារក្នុងសេចក្តីស្នើច្បាប់នេះមានលក្ខណៈផ្ទុយពីគោលការណ៍នៃលទ្ធិប្រជាធិបតេយ្យសេរីពហុបក្ស ផ្ទុយពីឆន្ទះប្រជាពលរដ្ឋខ្មែរ។ សេចក្តីស្នើច្បាប់នេះនឹងបង្កឲ្យមានការបែកបាក់ឯកភាពជាតិ និងធ្វើឡើងដោយប្រញាប់ប្រញាល់ដើម្បីគាបសង្កត់គណបក្សគូប្រជែង ។
នៅក្នុងសេចក្តីថ្លែងការណ៍នោះ ក្រុមសមាជិកព្រឹទ្ធសភាគណបក្សសម រង្ស៊ី បានទទូចឲ្យគណបក្សឈ្នះឆ្នោតមានអាសនៈក្នុងរដ្ឋសភា នីតិកាលទី៥ទាំងពីរគណបក្ស បញ្ចប់ការខ្វែងគំនិតគ្នា ដើម្បីឲ្យរដ្ឋសភាពហុបក្សដំណើរការត្រឹមត្រូវតាមខ្លឹមសារនៃរដ្ឋធម្មនុញ្ញ និងចូលរួមចំណែកពង្រឹងលទ្ធិប្រជាធិបតេយ្យឲ្យកាន់តែប្រសើរឡើងនៅកម្ពុជា។
គួរបញ្ជាក់ថា សេចក្តីស្នើវិសោធនកម្មច្បាប់ស្ដីពីគណបក្សនយោបាយធ្វើឡើង៩ជំពូកនិង២២មាត្រា ត្រូវបានសមាជិករដ្ឋសភាមកពីគណបក្សប្រជាជនកម្ពុជា លើកដៃអនុម័តចំនួន៦៦សំឡេងកាលពីថ្ងៃទី២០ កុម្ភៈ ។ សេចក្តីស្នើសុំចំនួន៩ជំពូកនិង២២មាត្រារួមមាន៖ ជំពូកទី១ មាត្រា៦ថ្មី, ជំពូកទី៣ មាត្រា១២ថ្មី, ជំពូកទី៤ថ្មីមាត្រា១៧ថ្មី មាត្រា១៨ថ្មី, ជំពូកទី៥ មាត្រា១៩ថ្មី មាត្រា២៥ថ្មី មាត្រា២៦ថ្មី, ជំពូកទី៦ មាត្រា២៩ថ្មី, ជំពូកទី៨ មាត្រា៣៤ថ្មី, ជំពូកទី៩ថ្មី មាត្រា៣៨ថ្មី មាត្រា៣៩ថ្មី មាត្រា៤០ថ្មី មាត្រា៤១ថ្មី មាត្រា៤២ថ្មី មាត្រា៤៣ថ្មី មាត្រា៤៤ថ្មី មាត្រា៤៥ថ្មី មាត្រា៤៦ថ្មី មាត្រា៤៧ថ្មី, ជំពូកទី១០ មាត្រា៤៨ថ្មី និងជំពូកទី១១មាត្រា ៤៩ថ្មី និងមាត្រា៥០ថ្មី ៕
ចែករំលែកព័តមាននេះ