វីដេអូកាមេរ៉ាសុវត្ថិភាពនឹងត្រូវបញ្ចាំងក្នុងសវនាការសំណុំរឿងបា.ញ់សម្លា.ប់បណ្ឌិត កែម ឡី
រាជធានីភ្នំពេញ ៖ ដូចការគ្រោងទុកសាលាដំបូងរាជធានីភ្នំពេញ នៅព្រឹកថ្ងៃទី១ មីនានេះ បានលើកយកសំណុំរឿងករណីឃាតក.ម្មបា.ញ់សម្លា.ប់លោកបណ្ឌិត
រាជធានីភ្នំពេញ ៖ ដូចការគ្រោងទុកសាលាដំបូងរាជធានីភ្នំពេញ នៅព្រឹកថ្ងៃទី១ មីនានេះ បានលើកយកសំណុំរឿងករណីឃាតកម្មបាញ់សម្លាប់លោកបណ្ឌិត កែម ឡី មកបើកសវនាការជំនុំជម្រះទោស ។ តាមប្រភពព័ត៌មានបានឲ្យដឹងថា សវនាការនេះគឺធ្វើឡើងជាសាធារណៈដែលមានលោក លាង សំណាត់ ជាប្រធានក្រុមបឹក្សាជំនុំជម្រះ លោក នូ វាសនា និងលោក អ៊ឹម វណ្ណៈ ជាចៅក្រមអម ព្រមទាំងតំណាងអយ្យការគឺលោក លី សុផាណា ព្រះរាជអាជ្ញារងអមសាលាដំបូងរាជធានីភ្នំពេញ ។
ប្រភពព័ត៌មានបន្តថា សវនាការនេះ គឺមានវត្តមានជនជាប់ចោទឈ្មោះ ជួប សម្លាប់ ហៅ អឿត អាង តម្រូវឲ្យឈរមុខរង្វង់ក្រចកសេះ ដើម្បីឆ្លើយនឹងសំណួរដេញដោលពីសំណាក់អង្គសវនាការ ។
តាមប្រភពពីតុលាការថា ក្នុងសវនាការក៏មានចាក់បញ្ចាំងស្លាយវីដេអូស្តីពីសកម្មភាពនៃអំពើឃាតកម្មទៅលើលោកបណ្ឌិត កែម ឡី ដែលថតបានតាមរយៈកាមេរ៉ាសុវត្ថិភាពនៅក្នុងស្តារ៍ម៉ាត រួមទាំងភ័ស្តុតាងសម្រាប់ដាក់បន្ទុកលើជនជាប់ចោទមួយចំនួនទៀត ។
មន្ត្រីសាលាដំបូងរាជធានីភ្នំពេញ ដែលសុំមិនឲ្យបញ្ចេញឈ្មោះឲ្យដឹងថា នៅថ្ងៃទី២៨ កុម្ភៈ លោក តាំង ស៊ុនឡាយ ប្រធានសាលាដំបូងរាជធានីភ្នំពេញ បានចាត់ចែងកម្មវិធីរៀបចំបើកសវនាការលើសំណុំរឿងឃាតកម្មដ៏រសើបបាញ់សម្លាប់លោកបណ្ឌិត កែម ឡី រួចរាល់អស់ហើយ ដូចជាការរៀបចំសាលសវនាការ ឧបករណ៍បំពងសំឡេង ឧបករណ៍ចាក់ស្លាយបញ្ចាំងរូបភាព សកម្មភាពនៃអំពើឃាតកម្ម ដែលជនទូទៅបានទន្ទឹងរង់ចាំយូរខែមកហើយ ។
ក្រៅពីនេះមាន ការងារការពារសន្តិសុខ ថែរក្សាសណ្តាប់ធ្នាប់សាធារណៈជូនភ្ញៀវជាតិ និងអន្តរជាតិ អ្នកសារព័ត៌មាន រួមទាំងការពារសាក្សីក្នុងពេលចូលសវនាការផងដែរ ព្រោះថាសវនាការនេះអាចនឹងមានមហាជនចូលរួមស្តាប់ច្រើន ហើយអាចខ្វះកន្លែងឲ្យភ្ញៀវអង្គុយក៏ថាបាន ។ នេះបើតាមការសន្និដ្ឋានមិនទាន់ជាផ្លូវការ ដោយសារម្នាក់ៗចង់ដឹងចម្លើយរបស់ឃាតករផ្ទាល់មាត់ពិតប្រាកដ និងចង់ឃើញវីដេអូដែលយកចេញពីស្តារ៍ម៉ាតស្ថានីយប្រេងឥន្ធនៈកាល់តិច ជាកន្លែងកើតហេតុស្តីពីសកម្មភាព និងព្រឹត្តការណ៍នៃអំពើបាញ់ប្រហារនោះ ។
គួរបញ្ជាក់ថា ជនសង្ស័យឈ្មោះ អឿតអាង ហៅ ជួប សម្លាប់ អាយុ៣៨ឆ្នាំ មានស្រុកកំណើតនៅស្រុកស្វាយចេក ខេត្តបន្ទាយមានជ័យ ហើយបានទៅរស់នៅប្រកបរបរជាកម្មករចម្ការដំណាំ នៅខេត្តស្រះកែវ ប្រទេសថៃ។ ខ្មាន់កាំភ្លើងនេះបានសារភាពថា ខ្លួនឈ្មោះ ជួប សម្លាប់ ជាអ្នកបាញ់សម្លាប់លោកបណ្ឌិត កែម ឡី ប្រធានអង្គការអភិវឌ្ឍន៍សង្គមនិងជាអ្នកវិភាគនយោបាយ ដោយសារ ការជំពាក់លុយ៣.០០០ដុល្លារអាមេរិកមិនព្រមសង ។
ជនសង្ស័យ ត្រូវបានតំណាងអយ្យការចោទប្រកាន់ពីបទឃាតកម្មគិតទុកជាមុន និងបទកាន់កាប់ឬដឹកជញ្ជូនអាវុធគ្មានការអនុញ្ញាត តាមមាត្រា២០០ និងមាត្រា៤៩០ នៃក្រមព្រហ្មទណ្ឌ ដែលបទល្មើសនេះ តម្រូវឲ្យផ្តន្ទាទោសដាក់ពន្ធនាគារអស់មួយជីវិត ។
ជនសង្ស័យត្រូវបានសមត្ថកិច្ចឃាត់ខ្លួនភ្លាមៗ ក្រោយពីការបាញ់សម្លាប់លោកបណ្ឌិត កែម ឡី កាលពីវេលាម៉ោង៨និង៥០នាទីព្រឹកថ្ងៃទី១០ខែកក្កដា ឆ្នាំ២០១៦ នៅក្នុងស្តារ៍ម៉ាតនៃស្ថានីយប្រេងឥន្ធនៈកាល់តិចបូកគោ ស្ថិតនៅកាច់ជ្រុងមហាវិថីព្រះមុនីវង្ស និងមហាវិថីម៉ៅសេទុង ក្នុងសង្កាត់ទន្លេបាសាក់ ខណ្ឌចំការមន ៕
ចែករំលែកព័តមាននេះ