អាវុធហត្ថតាមប្រមាញ់ អារ៉េវដឹកជញ្ជូនឈើហុប ដល់ក្នុងទីតាំងក្រុមហ៊ុន
ខេត្តរតនគិរី ៖ រថយន្តបង្កង់ឬអារ៉េវមួយគ្រឿងដឹកឈើ និងគោយន្តកែច្នៃមួយគ្រឿង បានត្រូវកងរាជអាវុធហត្ថខេត្ត និងកងរាជអាវុធហត្ថស្រុកបកែវ បង្ក្រាបខណៈ
ខេត្តរតនគិរី ៖ រថយន្តបង្កង់ឬអារ៉េវមួយគ្រឿងដឹកឈើ និងគោយន្តកែច្នៃមួយគ្រឿង បានត្រូវកងរាជអាវុធហត្ថខេត្ត និងកងរាជអាវុធហត្ថស្រុកបកែវ បង្ក្រាបខណៈ
ខេត្តរតនគិរី ៖ រថយន្តបង្កង់ឬអារ៉េវមួយគ្រឿងដឹកឈើ និងគោយន្តកែច្នៃមួយគ្រឿង បានត្រូវកងរាជអាវុធហត្ថខេត្ត និងកងរាជអាវុធហត្ថស្រុកបកែវ បង្ក្រាបខណៈ
រថយន្តនោះលួចដឹកឈើចូលទៅក្នុងក្រុមហ៊ុនមួយ កាលពីវេលាម៉ោង១០និង៤៥នាទីព្រឹកថ្ងៃទី២៤ ខែកុម្ភៈ ។ ការបង្ក្រាបនេះ ដឹកនាំដោយវរសេនីយ៍ត្រី ឃី សុខា ប្រធានមន្ទីរបច្ចេកទេសសន្តិសុខកងរាជអាវុធហត្ថខេត្ត ក្រោមបញ្ជាផ្ទាល់ពីលោកឧត្តមសេនីយ៍ត្រី គឹម រស្មី មេបញ្ជាការកងរាជអាវុធហត្ថខេត្ត ។
របាយការណ៍ឱ្យដឹងថា កម្លាំងកងរាជអាវុធហត្ថខេត្តរួមជាមួយកងរាជអាវុធហត្ថស្រុកបកែវ បានបង្ក្រាបរថយន្តបង្កង់ដឹកឈើប្រភេទសុក្រំ និងផ្ចឹកចំនួន៦កំណាត់ស្មើនឹងជាង៧ម៉ែត្រគូប ។ ការបង្ក្រាបគឺធ្វើឡើងនៅភូមិសមុទ្រលើ ឃុំសេដា ស្រុកលំផាត់ ក្នុងដីក្រុមហ៊ុនហ្ស៊ូមវ៉ាង ខេមបូឌា អ៊ិនវេសម៉ិន ដែលជាដៃគូអភិវឌ្ឍន៍ជាមួយក្រុមហ៊ុន រ័ត្នសាខន ។
មេបញ្ជាការកងរាជអាវុធហត្ថខេត្ត លោកឧត្តមសេនីយ៍ត្រី គឹម រស្មី បានថ្លែងក្នុងបទសម្ភាសន៍នាព្រឹកថ្ងៃទី២៥ ខែកុម្ភៈថា ទម្រាំឈានដល់ការបង្ក្រាបរថយន្តដឹកឈើមួយគ្រឿងនេះ គឺបានជួបឧបសគ្គជាមួយប្រជាពលរដ្ឋដែលអាចនិយាយបានថា ជាអ្នកកាងបទល្មើសឱ្យពួកឈ្មួញធ្វើសកម្មភាពរារាំងកម្លាំងសមត្ថកិច្ចដូចជា ធ្វើការឡោមព័ទ្ធ ផឹកស្រាស្រវឹងអុកឡុកសមត្ថកិច្ច ក្នុងគោលបំណងរំដោះវត្ថុតាង ។
លោកបញ្ជាក់ថា កម្លាំងសមត្ថកិច្ចមានតែ៧នាក់ពុំអាចរំដោះវត្ថុតាងបានឡើយ ទើបបញ្ជាឱ្យបន្ថែមកម្លាំង ដោយប្រើប្រាស់រយៈពេល២ថ្ងៃ ទើបអាចរំដោះវត្ថុតាងចេញបាន ។
លោកបន្តថា ភូមិចំនួន២ដែលមានព្រំប្រទល់ជាប់ស្រុកលំផាត់និងស្រុកអូរយ៉ាដាវ ពលរដ្ឋនៅ តំបន់នោះតែងធ្វើសកម្មភាពប្រាសចាកពីនីតិវិធីច្បាប់ដូចជា មានប្រដាប់ដោយដំបង កាំបិត ពូថៅ និយាយរួមសម្ភារប្រើប្រាស់បទល្មើសយកទៅគំរាមកំហែង ឬឡោមព័ទ្ធនិងវាយទៅលើរថយន្តសមត្ថកិច្ច ឬរថយន្តអ្នកកាសែតជាដើម ។
លោកឧត្តមសេនីយ៍ត្រី គឹម រស្មី ថ្លែងទៀតថា មុននឹងឈានទៅបង្ក្រាបរថយន្តដឹកឈើនិងរថយន្តកែច្នៃខាងលើនេះ គឺសមត្ថកិច្ចបានប្រើប្រាស់គ្រប់រូបភាពនិងគ្រប់មធ្យោបាយទាំងអស់ ធ្វើយ៉ាងណារឹបអូសយកវត្ថុតាងឱ្យខាងតែបាន បើទោះបីត្រូវជួបឧបសគ្គធ្ងន់ធ្ងរយ៉ាងណាក៏ដោយ ។
ប្រភពពីប្រជាពលរដ្ឋកាលពីល្ងាចថ្ងៃទី២៤ខែកុម្ភៈ ថា មានសកម្មភាពកាប់បំផ្លាញព្រៃឈើនៅតំបន់នោះយ៉ាងរង្គាល ហើយពលរដ្ឋមួយចំនួនធំនៅទីនោះតែងធ្វើការតវ៉ា និងមួយចំនួនតូចត្រូវឈ្មួញទិញទឹកចិត្តដែលតែងតែប្រឆាំងរារាំងសមត្ថកិច្ច នៅពេលដែលមានការចុះបង្ក្រាបម្តងៗ ។
លោកឧត្តមសេនីយ៍ត្រី គឹម រស្មី មានប្រសាសន៍យ៉ាងម៉ឺងម៉ាត់ថា នឹងធ្វើការបង្ក្រាបនូវរាល់បទល្មើសព្រៃឈើទាំងឡាយស្របតាមបទបញ្ជារបស់លោកនាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស ដែលជាប្រធានគណៈកម្មការបង្ក្រាបបទល្មើសធនធានធម្មជាតិ ខណៈមានសកម្មភាពបំផ្លាញព្រៃឈើតាមរូបភាពណាមួយ ។ ចំពោះវត្ថុតាងរថយន្តនិងឈើ បានប្រគល់ទៅឱ្យខណ្ឌរដ្ឋបាលព្រៃឈើ នៅព្រឹកថ្ងៃដដែលនោះ ៕
ចែករំលែកព័តមាននេះ