ដើរទៅបុណ្យស្រាប់តែឈឺពោះគ្រប់ខែឆ្លងទន្លេកណ្តាលវាលស្រែ
ខេត្តស្ទឹងត្រែង ៖ អាសូរណាស់ស្ត្រីម្នាក់បានសម្រាលកូនប្រុសម្នាក់ក្រោមកម្តៅថ្ងៃហែងនៅកណ្តាលវាលស្រែដែលមានចម្ងាយពីភូមិជិតមួយគីឡូម៉ែត្រ
ខេត្តស្ទឹងត្រែង ៖ អាសូរណាស់ស្ត្រីម្នាក់បានសម្រាលកូនប្រុសម្នាក់ក្រោមកម្តៅថ្ងៃហែងនៅកណ្តាលវាលស្រែដែលមានចម្ងាយពីភូមិជិតមួយគីឡូម៉ែត្រ និងឆ្ងាយពីមណ្ឌលសុខភាពស្រែក្រសាំងរាប់គីឡូម៉ែត្រ កាលពីព្រឹកថ្ងៃទី២៧ កុម្ភៈ ២០១៧ ស្ថិតក្នុងភូមិដំរីផុង ឃុំកោះសម្ពាយ ស្រុកសៀមបូក ។
តាមការឱ្យដឹងពីស្ត្រីម្នាក់ជាប្អូនបាននិយាយប្រាប់កោះសន្តិភាពថា កាលពីព្រឹកថ្ងៃទី២៧ កុម្ភៈ រូបនាងរួមទាំងបងប្អូនប្រុស-ស្រី៤នាក់ និងបងស្រីដែលមានផ្ទៃពោះផង បានទៅចូលរួមពិធីលើកធាតុលោកយាយនៅឆ្ងាយពីភូមិជិតមួយគីឡូម៉ែត្រ ។ លុះដើរបានជាង១០០ម៉ែត្រគាត់ប្រាប់ថាឈឺចង្កេះ ដោយពុំនឹកស្មានថា ឈឺពោះគ្រប់ខែសម្រាលកូននោះទេ ។ បន្ទាប់មកក៏ស្រាប់តែឈឺពោះកាន់តែខ្លាំងឡើងៗ រហូតដើរមិនរួចទើបប្រាស់ខ្លួនដេកសម្រាលកូននៅកណ្តាលវាលស្រែតែម្តង ។
នារីដដែលរៀបរាប់បន្តថា គ្រាដែលកំពុងឈឺពោះនោះជាចៃដន្យបំផុតមានអ្នកគ្រូពេទ្យឆ្មបម្នាក់បានធ្វើដំណើរឆ្លងកាត់ទីនោះ បានជួយពិនិត្យ និងជូនដំណឹងទៅប្រធានមណ្ឌលសុខភាពស្រែក្រសាំងឱ្យបញ្ជូនពេទ្យឆ្មបជំនាញពីរនាក់ទៀតរួមទាំងសម្ភារមកជួយជាបន្ទាន់ ។ ចំណែកប្តីរបស់នាងបានកាប់ដើមឫស្សីប្រុងចងអង្រឹងសែងប្រពន្ធទៅមណ្ឌលសុខភាពដែរ តែដោយការឈឺពោះនោះលឿនពេកក៏សម្រាលភ្លាមៗនៅកណ្តាលស្រែនោះទៅ ។ បន្ទាប់មកក្រុមគ្រូពេទ្យឆ្មបបានមកដល់ជួយសម្អាតកាត់សុក និងបញ្ជូនតាមម៉ូតូបន្តទៅសម្រាកនៅមណ្ឌលសុខភាពភ្លាមៗដែរ ។
ជួបជាមួយស្ត្រីសម្រាលកូនខាងលើបានរៀបរាប់ថា នាងពុំដឹងថា ខ្លួនឈឺពោះសម្រាលកូននោះទេ ព្រោះនេះជាកូនដំបូងរបស់នាងស្រាប់តែសម្រាលភ្លាមៗទាំងពុំដឹងខ្លួនបែបហ្នឹង ។ ស្ត្រីនោះប្រាប់បន្តថា នាងឈ្មោះ ថេង ធារី អាយុ២៦ឆ្នាំ ស្រុកកំណើតនៅភូមិច្រវា ឃុំគោលាប់ ស្រុកចិត្របុរី ខេត្តក្រចេះ និងបានមករស់នៅធ្វើស្រែចំការនៅភូមិដំរីផុង ឃុំកោះសម្ពាយ ស្រុកសៀមបូក បានមួយឆ្នាំហើយ ។
ស្ត្រីដដែលបន្តថា នេះជាចំណងដៃកូនទីមួយក្រោយរៀបការជាមួយប្តីបានជាងមួយឆ្នាំកន្លងមក ។
រីឯបុរសជាប្តីក៏បានប្រាប់ដែរថា ខ្លួនមិនបានដឹងថា ប្រពន្ធត្រូវជួបប្រទះរឿងរ៉ាវបែបនេះសោះ ហើយវាជាអនុស្សាវរីយ៍មួយដែលមិនអាចបំភ្លេចបាន ក្រោយកូនប្រុសត្រូវបានសម្រាលនៅកណ្តាលវាលស្រែដ៏អភ័ព្វបែបនេះ ហើយខ្លួនក៏មានការរំភើបណាស់ដែលបានធ្វើជាឪពុកក្នុងប្រវត្តិជូរចត់របស់កូននៅគ្រានេះដែរ ។
បុរសរូបនេះបន្តថា ទន្ទឹមនឹងប្រពន្ធចាប់ផ្តើមឈឺពោះ ខ្លួនមានការបារម្ភពីបញ្ហាប្រឈមទីមួយគ្មានគ្រូពេទ្យឆ្មប ទីពីរមណ្ឌលសុខភាពនៅឆ្ងាយរាប់គីឡូម៉ែត្រ និងជាការធ្វេសប្រហែសមួយដែលសាមីខ្លួនមិនបានទៅពិនិត្យផ្ទៃពោះទទួលការណែនាំពីគ្រូពេទ្យ ឬពីមណ្ឌលសុខភាពដើម្បីត្រៀមលក្ខណៈជាមុន ។
ជុំវិញបញ្ហានេះលោក ឯម ប៊ុនសុំ ប្រធានមណ្ឌលសុខភាពភូមិស្រែក្រសាំង ឃុំស្រែក្រសាំង ស្រុកសៀមបូកមានប្រសាសន៍ថា នៅពេលនេះម្តាយនិងទារក មានសុខភាពល្អធម្មតា ហើយវាជារឿងមួយដែលកម្រសម្រាប់ស្ត្រីមានផ្ទៃពោះដែលជួបប្រទះការសម្រាលកូនដោយខ្លួនឯងដោយងាយបែបនេះទេ ។ លោកបន្តថា នេះដោយសារគាត់មិនដែលមកពិនិត្យផ្ទៃពោះកំណត់ថ្ងៃសម្រាលឱ្យបានត្រឹមត្រូវពីគ្រូពេទ្យ ។ តែទោះជាយ៉ាងណា នេះជាការចៃដន្យបំផុតដោយមានបុគ្គលិកសម្ភពម្នាក់ដែលចុះផ្សព្វផ្សាយអប់រំសុខភាពទារក និងម្តាយដល់សហគមន៍ភូមិឃុំ ឆ្លងកាត់ទីនោះ ក៏ប្រទះឃើញហើយ ជួយអន្តរាគមន៍បានទាន់ពេលវេលា ។ លោកនិយាយថាបើពុំនោះទេមិនដឹងថាមានរឿងអ្វីកើតឡើងដល់ម្តាយនិងទារកនេះទេ ។
លោក ឯម ប៊ុនសុំ បានបន្ថែមថា ទាក់ទិនការសម្រាលកូនបែបនេះមានការប្រឈមគ្រោះថ្នាក់ខ្លាំងណាស់ ប្រសិនណាក្រោយពេលសម្រាលមិនបានយកសុកចេញ ឈាមនឹងចាប់ផ្តើមធ្លាក់ដែលអាចមានគ្រោះថ្នាក់គ្រប់ពេលវេលាដល់ស្ត្រីជាម្តាយ ។
លោកក៏បានបញ្ជាក់បន្ថែមថាខាងមណ្ឌលសុខភាពបានចុះធ្វើការផ្សព្វផ្សាយអប់រំដល់មូលដ្ឋានជាប្រចាំ និងមានប្រជាពលរដ្ឋខ្លះបានចូលរួម តែខ្លះទៀតមិនបានចូលរួមស្តាប់ការផ្សព្វផ្សាយទេ ។ ទោះជាយ៉ាងណាក្តីបច្ចុប្បន្នទារក និងម្តាយកំពុងសម្រាកថែទាំសុខភាពនៅមណ្ឌលសុខភាពស្រែក្រសាំង ស្រុកសៀមបូកដោយសុវត្ថិភាពហើយ ៕
ចែករំលែកព័តមាននេះ