ភ្លៀងកក់ខែមួយមេ លាយឡំនឹងខ្យល់កន្ត្រាក់ ធ្វើឲ្យផ្ទះប្រជាពលរដ្ឋ និងសំណង់សាធារណៈរងការខូចខាត
ខេត្តបន្ទាយមានជ័យ ៖ នៅភូមិចក់ពួក ឃុំស្លរក្រាម ស្រុកស្វាយចេក ខេត្តបន្ទាយមានជ័យ នៅវេលាម៉ោង៥ល្ងាចថ្ងៃទី ២៣ ខែកុម្ភៈ ឆ្នាំ២០១៧
ខេត្តបន្ទាយមានជ័យ ៖ នៅភូមិចក់ពួក ឃុំស្លរក្រាម ស្រុកស្វាយចេក ខេត្តបន្ទាយមានជ័យ នៅវេលាម៉ោង៥ល្ងាចថ្ងៃទី ២៣ ខែកុម្ភៈ ឆ្នាំ២០១៧ មានភ្លៀងកក់ខែមួយមេយ៉ាងខ្លាំងលាយលំនឹងខ្យល់កន្ត្រាក់ បណ្តាលឲ្យលំនៅដ្ឋានរបស់ ប្រជាពលរដ្ឋចំនួន១៣ រងរការខូចខាត ក្នុងនោះមាន៦ខ្នង ខូចខាតទាំងស្រុង ៩ខ្នងទៀតខូចខាតមធ្យម របើកដំបូលស័ង្កសី តិចតួច សាលាបឋមសិក្សាភូមិ ចក់ពួក១ខ្នង របើកក្បឿងអស់៨០សន្លឹក និងសាលាឆាន់វត្តគីរីតេជោសែនជ័យ របើកស័ង្កសីអស់ចំនួន៤៥សន្លឹក។
តាមការរៀបរាប់ពីប្រជាពលរដ្ឋ ក៏ដូចជាមេភូមិចក់ពួក បាននិយាយថា មុនដំបូងផ្ទៃមេឃមានដុំពពកខ្មៅមួយសន្ទុះក្រោយមកក៏មានភ្លៀងផ្គររន្ទះ លាយលំជាមួយនឹងខ្លល់បក់បោកយ៉ាងខ្លាំង ធ្វើឲ្យពួកគាត់មានការភ័យខ្លាច ភ្លាមៗនោះខ្យល់ក៏បានបក់បោកកួចផ្ទះរបស់ពួកគាត់ចេញពីជើងតម្កល់។ លោកមេភូមិចក់ពួកបានបញ្ជាក់ថា ក្នុងរយៈពេលដែលមានភ្លៀងខ្យល់ និងផ្គររន្ទះ រយៈពេលកន្លះម៉ោងនោះ បានធ្វើឲ្យប៉ះពាល់លំនៅដ្ឋានប្រជាពលរដ្ឋ សរុបចំនួន១៣ខ្នង ក្នុងនោះខូចខាតទាំងស្រុងចំនួន៦ខ្នង សាលារៀនភូមិចក់ពួក របើកដំបូលអស់ចំនួន៨០សន្លឹក សាលាឆាន់វត្តគីរីតេជោសែនជ័យ របើកស័ង្កសីអស់ចំនួន៤៥សន្លឹក ។ លោកមេបញ្ជាក់ទៀតថា ចំពោះបញ្ហាមនុស្សគ្មាននណាមានរងគ្រោះថ្នាក់នោះឡើយ។
នៅព្រឹកថ្ងៃទី២៤ ខែកុម្ភៈ ឆ្នាំ២០១៧ គេសង្កេតឃើញមានកងកម្លាំងនគរបាលខេត្ត និងស្រុកស្វាយចេក និងកម្លាំងនគរបាលវរសេនាតូចការពារព្រំដែនគោកលេខ៩១១ ចំនួន១២០នាក់ ដឹកនាំដោយលោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ និងកម្លាំងយោធាការពារព្រំដែនគោកលេខ៥០៣ ចំនួន៧៥នាក់ ដឹកនាំដោយលោកវរសេនីយ៍ទោ ឌុក សាវ៉ាត មេបញ្ជាការយោធាវរសេនាតូចការពារព្រំដែនគោកលេខ៥០៣ បានសហការគ្នាជួយរុះរើ និងជួយសាងសង់ជួសជុលផ្ទះឡើងវិញ ប្រក់ដំបូលសាលារៀនឲ្យសិស្សានុសិស្សបានសិក្សារៀនសូត្រ និងសាលាឆាន់ប្រគេនដល់ព្រះ សង្ឃផងដែរ។
លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ នាឱកាសនោះក៏បានឧបត្ថម្ភជូនស័ង្កសីចំនួន២៧៥សន្លឹក ដល់គ្រួសាររងគ្រោះរលំផ្ទះខូចខាតទាំងស្រុងចំនួន៦ផ្ទះ ក្នុង១គ្រួសារទទួលបានស័ង្កសីចំនួន២០សន្លឹក,ចំពោះគ្រួសារក្រីក្រ២គ្រួសារបន្ថែមជូនអង្ករចំនួន៥០គីឡូក្រាម វត្តគីរីតេជោសែនជ័យឧបត្ថម្ភស័ង្កសីចំនួន៤៥សន្លឹក និងសាលារៀនភូមិចក់ឧបត្ថម្ភក្បឿងចំនួន៨០សន្លឹក អំណោយទាំងនេះគឺជាអំណោយរបស់ឯកឧត្តម ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិ ប្រយុទ្ធប្រឆាំងគ្រឿងញៀន ជាប្រធានក្រុមការងារចុះជួយខេត្តបន្ទាយមានជ័យ។
ជាមួយគ្នានោះផងដែរ ប្រជាពលរដ្ឋក៏ដូចជាអាជ្ញាធរភូមិបានថ្លែងអំណរគុណដល់កងកម្លាំងនគរបាលខេត្ត និងកងកម្លាំងយោធាវរសេនាតូចការពារព្រំដែនគោកលេខ៥០៣ ដែលបានចុះជួយរុះរើ និងជួសជុលផ្ទះរបស់ពួកគាត់ឡើងវិញ ជាងនេះទៀតគាត់បានថ្លែងអំណរគុណឯកឧត្តម ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិ ប្រយុទ្ធប្រឆាំងគ្រឿងញៀន ជាប្រធានក្រុមការងារចុះជួយខេត្តបន្ទាយមានជ័យ ដែលបាន ឧបត្ថម្ភស័ង្កសីជូនដល់ពួកគាត់ដែលកំពុងជួបការលំបាកដោយផ្ទះ ត្រូវបានខូចខាតដោយខ្យល់កន្ត្រាក់នេះ៕
ចែករំលែកព័តមាននេះ