ខេត្ដកំពង់ស្ពឺ ៖ កាលពីរសៀលថ្ងៃទី២១ ខែកុម្ភៈ ឆ្នាំ២០១៧លោកថោង ខុន រដ្ឋមន្ត្រីក្រសួងទេសចរណ៍ បានដឹកនាំប្រតិភូក្រសួង រួមជាមួយគណៈអភិបាលខេត្តកំពង់ស្ពឺ និងមន្ទីរពាក់ព័ន្ធ ទៅទស្សនកិច្ចនៅរមណីយដ្ឋានតេទឹកពុះ ស្ថិតក្នុងឃុំតាសាល ស្រុកឱរ៉ាល់ ខេត្តកំពង់ស្ពឺ ។ លោករដ្ឋមន្ដ្រី បានជួបសំណេះសំណាលជាមួយអាជ្ញាធរស្រុក ឃុំ សហគមន៍ និងប្រជាពលរដ្ឋនៅមូលដ្ឋានប្រមាណ៨០នាក់ ។
លោកថោង ខុន រដ្ឋមន្ត្រីក្រសួងទេសចរណ៍ឱ្យដឹងថា ដើម្បីអភិវឌ្ឍតំបន់តេទឹកពុះឱ្យក្លាយជាតំបន់ទាក់ទាញដ៏ពិសេសសម្រាប់ប្រទេសជាតិ និងសម្រាប់ខេត្តកំពង់ស្ពឺ លោកបានណែនាំឱ្យនាយកដ្ឋានជំនាញក្រសួង មន្ទីរទេសចរណ៍ខេត្ត មន្ទីរបរិស្ថានខេត្ត សហការគ្នារៀបចំបង្កើតតំបន់ ឱ្យទៅជាសហគមន៍ទេសចរណ៍ ។
លោកថោង ខុន ថ្លែងថា «យើងត្រូវរៀបចំបែបបទស្នើសុំទៅក្រសួងបរិស្ថាន ដើម្បីបង្កើតជាសហគមន៍ការពារធម្មជាតិ បន្ទាប់មកត្រូវរៀបចំបង្កើតជាគណៈកម្មការគ្រប់គ្រងសហគមន៍ និងបញ្ចូលនូវសកម្មភាព និងសេវាកម្មទេសចរណ៍នៅតំបន់នេះ ។ ការរៀបចំបង្កើតសហគមន៍ទេសចរណ៍នេះ ត្រូវអនុវត្តតាមរូបមន្ត 4Ps: Public (រដ្ឋ) Private (ឯកជន) Partnership (ដៃគូអភិវឌ្ឍន៍) និង People (ប្រជាជន) ។
លោកថោង ខុន បញ្ជាក់ថា តំបន់តេទឹកពុះជាតំបន់ដ៏កម្រ និងពិសេសដែលអាចទាក់ទាញទេសចរជាតិ អន្តរជាតិ និងទេសចរពីប្រទេសជិតខាងទស្សនា ។ តាមការពិនិត្យ និងសិក្សារបស់ក្រុមជំនាញផ្នែកទឹកពុះ (Hot Spring) របស់ប្រទេសជប៉ុន កាលពីឆ្នាំ២០០៧ បានដឹងថា ទឹកក្តៅតេទឹកពុះមានគុណភាពល្អសម្រាប់ព្យាបាលជំងឺ ផ្សេងៗ និងអាចកែឆ្នៃប្រើប្រាស់សម្រាប់ថែរក្សាស្បែក និងសម្រស់ស្ត្រីបានជាច្រើនមុខ ។
ដោយឡែកបញ្ហាប្រឈម គឺហេដ្ឋារចនាសម្ព័ន្ធផ្លូវតភ្ជាប់ពីសាលាស្រុកឱរ៉ាល់កាន់តំបន់នោះដែលមានស្ថានភាពលំបាកក្នុងការធ្វើរដំណើរ ។
នាឱកាសនោះ ប្រជាពលរដ្ឋបានសម្ដែងរីករាយចំពោះគម្រោងបង្កើតជាសហគមន៍ទេសចរណ៍នៅតំបន់តេទឹកពុះ ហើយត្រៀមសហការ និងចូលរួមជាមួយរាជរដ្ឋាភិបាល ក្រសួង អាជ្ញាធរដែនដី និងដៃគូអភិវឌ្ឍន៍ ដើម្បីអនុវត្តគម្រោងឱ្យទទួលបានជោគជ័យ ៕
ចែករំលែកព័តមាននេះ