ប្រទេសម៉ិកស៊ិក ៖ ម៉ិកស៊ិកបានឆ្លើយតបយ៉ាងច្បាស់លាស់មួយទៅកាន់លោកប្រធានាធិបតី Trump ថា កុំសាកល្បងដាក់ពន្ធលើផលិតផលនាំចូល ។ ពួកយើងនឹងសងសឹក ។
លោក Ildefonso Guajardo រដ្ឋមន្ត្រីសេដ្ឋកិច្ចរបស់ម៉ិកស៊ិក បានថ្លែងកាលពីថ្ងៃសុក្រថា ៖ « តាមការមើលឃើញរបស់ម៉ិកស៊ិក ការដាក់ពន្ធលើផលិតផលនាំចូល គឺជាកំហុសឆ្គងដ៏ធំមួយ ។ វានឹងជាជំហានមួយថយក្រោយ មិនមែនដើរទៅមុខឡើយ » ។
លោកបន្តថា ម៉ិកស៊ិកនឹងត្រូវបង្ខំចិត្តឆ្លើយតបនឹងការគំរាមកំហែង ។ លោកបន្តថា ៖ «ប្រសិនបើនិយាយពីពន្ធលើផលិតផលនាំចូល វាច្បាស់ណាស់ថា មិនមែនជាវិធីដ៏ល្អទេ ព្រោះវានឹងប៉ះពាល់ដល់សេដ្ឋកិច្ចទាំងពីរ » ។
នៅក្នុងបទសម្ភាសន៍នាថ្ងៃដដែល លោក Guajardo ក៏បានឲ្យដឹងថា NAFTA គឺជាកិច្ចព្រមព្រៀងដ៏ល្អសម្រាប់ប្រទេសទាំងបី ។
លោកក៏បានបញ្ជាក់ថា បើមានកិច្ចព្រមព្រៀងថ្មីពិតមែន វាត្រូវតែមានអត្ថប្រយោជន៍ដល់មិុកស៊ិក ។ ប្រទេសទាំងបីត្រូវបានគិតថា នឹងចាប់ផ្តើមការចរចាក្នុងខែឧសភា ខាងមុខ ។
លោក Guajardo បានព្យាយាមចាប់ផ្តើមការចរចាមុនពេល ។ លោកបានធ្វើដំណើរទៅកាន់ Washington នាខែមករា ដើម្បីជួបជាមួយមន្ត្រីក្នុង White House របស់អាមេរិក ។ ក្នុងថ្ងៃតែមួយ លោក Trump បានបង្ហោះលើ Twitter ថា លោកប្រធានាធិបតី Enrique Pena Nieto របស់មិុកស៊ិក មិនគួរមកកាន់ Washington ទេ ប្រសិនបើលោកមិនទាន់ត្រៀមខ្លួនក្នុងការបង់ប្រាក់សម្រាប់ជញ្ជាំងតាមបណ្តោយព្រំដែន ។
លោក Guajardo មិនបានបកស្រាយបន្ថែមឲ្យលម្អិតពីរបៀបដែលប្រទេសលោកចង់សងសឹកទេ ប៉ុន្តែអ្នកដឹកនាំម៉ិកស៊ិកដទៃបាននិយាយខ្លះៗ ។
លោក Armando Rios Piter សមាជិកព្រឹទ្ធសភា បាននិយាយកាលពីថ្ងៃអាទិត្យថាលោកនឹងសម្រេចនាពេលឆាប់ៗនេះថា ម៉ិកស៊ិកនឹងទិញពោតពីប្រទេសអាហ្សង់ទីន និងប្រេស៊ីល ដោយមិនទិញពីសហរដ្ឋអាមេរិកទៀតទេ ។
គួរបញ្ជាក់ថា ក្នុងឆ្នាំ២០១៥ ពោតគឺជាការនាំចេញលេខមួយរបស់សហរដ្ឋអាមេរិកមកកាន់ម៉ិកស៊ិក សរុបមានតម្លៃ២,៤ប៊ីលានដុល្លារឯណោះ ។
ជាមួយគ្នានេះ NAFTA បានលុបបំបាត់ពន្ធពោតអាមេរិក ហើយកសិករដាំពោតរបស់អាមេរិកព្រមានថា ការសងសឹកពីមិុកស៊ិកអាចនឹងធ្វើឲ្យការងារមួយចំនួនរបស់ពួកគេត្រូវបាត់បង់ ។
ប៉ុន្តែលោក Guajardo គឺច្បាស់លាស់ណាស់ថា ម៉ិកស៊ិកនឹងឆ្លើយតបបន្តិចបន្តួច ប្រសិនបើលោក Trump យកឧបសគ្គពាណិជ្ជកម្មមកបង្កការប៉ះពាល់ដល់ម៉ិកស៊ិក ៕
ចែករំលែកព័តមាននេះ