ខេត្តកណ្តាល ៖ ស្ត្រីម្នាក់បានធ្លាក់ពីលើដំបូលរថយន្តស្នួលមួយគ្រឿង បណ្តាលឱ្យរងរបួសយ៉ាងធ្ងន់ធ្ងរ នៅក្នុងខណៈពេលដែលរូបនាងរួមជាមួយនឹងអ្នកផ្សេងទៀត ជិះលើដំបូលរថយន្តធ្វើដំណើរតាមផ្លូវ ហើយរថយន្តឈ្នួលនោះជួបឧប្បត្តិហេតុគ្រោះថ្នាក់ចរាចរណ៍បុកម៉ូតូមួយគ្រឿង ធ្វើឱ្យស្ត្រីរូបនោះធ្លាក់មកដីបោកនឹងថ្នល់។ នេះជាការកត់សំគាល់មួយដែលអ្នកជិះលើដំបូលរថយន្តបានធ្លាក់មកដី។ តាមពិតទៅមានការអប់រំណែនាំច្រើនណាស់មកហើយពីការជិះលើដំបូលរថយន្តទួរីស ប៉ុន្តែអ្នកជិះនៅតែ ប្រមាថជីវិតខ្លួនឯង។ ឧប្បត្តិហេតុគ្រោះថ្នាក់នោះបានកើតឡើងកាលពីវេលាម៉ោង៩និង៣០នាទីព្រឹក ថ្ងៃទី៣១ តុលា ឆ្នាំ២០១០ នៅលើកំណាត់ផ្លូវជាតិលេខ៤ ភូមិត្រពាំងឈើនាង ឃុំឆក់ឈើនាង ស្រុកអង្គស្នួល ខេត្តកណ្តាល។ ស្ត្រីរងគ្រោះឈ្មោះដា នី អាយុ១៧ឆ្នាំ មានទីលំនៅភូមិបេង ឃុំស្តុក ស្រុកគងពិសី ខេត្តកំពង់ស្ពឺ រងរបួសបាក់ឆ្អឹងដងកាំបិតខាងស្តាំ ហើយត្រូវបានគេនាំទៅសង្គ្រោះបន្ទាន់ផងដែរ។
តាមប្រភពព័ត៌មានបានឱ្យដឹងថា គ្រោះថ្នាក់នេះបង្កឡើងដោយរថយន្តមួយគ្រឿងម៉ាកតូយ៉ូតា ប្រភេទទេសចរណ៍១២កៅអី ពណ៌ទឹកប្រាក់ ពាក់ស្លាកលេខភ្នំពេញ 2F-3046 បើកបរដោយបុរសឈ្មោះលុយ សួន អាយុ៣៥ឆ្នាំ មានទីលំនៅភូមិព្រៃញាតិ ឃុំព្រៃញាតិ ស្រុកគងពិសី ខេត្តកំពង់ស្ពឺ។ រថយន្តនេះបានដឹកមនុស្សលើដំបូលហើយក្រោយមកបានជួបឧប្បត្តិហេតុបុកម៉ូតូមួយគ្រឿងធុន C125 ស៊េរីឆ្នាំ២០០៨ ពណ៌ខ្មៅ កំពុងជិះឆ្លងផ្លូវបើកបរដោយបុរសឈ្មោះរស់ ផុន អាយុ៥០ឆ្នាំ មានទីលំនៅភូមិស្ទេង ឃុំខ្លុងពពក ស្រុកទឹកផុស ខេត្តកំពង់ឆ្នាំង បណ្តាលឱ្យធ្លាក់អ្នកជិះពីលើដំបូលរបួសធ្ងន់ម្នាក់តែម្តង។
ប្រភពដដែលបានបន្តទៀតថា នៅមុនពេលកើតហេតុគេបានឃើញរថយន្តឈ្នួលមួយគ្រឿងនោះបើកបរធ្វើដំណើរក្នុងល្បឿនលឿនក្នុងទិសដៅពីលិចទៅកើត ដោយនៅលើដំបូលមានមនុស្សជិះ៤នាក់ ក្នុងនោះប្រុស២នាក់ ស្ត្រី២នាក់ផងដែរ។ ដោយឡែកម៉ូតូធុន C125 ស៊េរីឆ្នាំ២០០៨ ពណ៌ខ្មៅ ក៏បានបើកបរស្របទិសគ្នាពីលិចទៅកើតដែរ លុះទៅដល់ចំណុចកើតហេតុខាងលើម៉ូតូនោះបានបត់ឆ្វេងឆ្លងផ្លូវក៏ត្រូវរថយន្តបុកពេញទំហឹង។ ប្រភពខាងលើបានបន្តទៀតថា នៅក្នុងខណៈពេលនោះ គេបានឃើញអ្នកជិះលើដំបូលរថយន្តម្នាក់បានធ្លាក់មកដី រីឯ៣នាក់ទៀតក៏ហៀបនឹងធ្លាក់មកដែរ ប៉ុន្តែស្រវាតោងដែកដំបូលរថយន្តនោះជាប់។ ក្រោយពេលកើតហេតុ អ្នកជិះម៉ូតូឆ្លងផ្លូវរងរបួសស្រាលប៉ុណ្ណោះ ប៉ុន្តែអ្នកធ្លាក់ពីលើដំបូលរថយន្តវិញ របួសធ្ងន់ធ្ងរ ហើយកំលាំងប៉ូលិសក៏បានធ្វើការឃាត់ខ្លួនអ្នកបើកបររថយន្តនាំទៅកាន់អធិការដ្ឋាន។ បើតាមច្បាប់ អ្នកបើកបររថយន្តរូបនោះល្មើសនឹងការហាមឃាត់ ដោយចង់បានលុយខ្លាំងពេកទើបដឹកមនុស្សនៅលើដំបូលបង្កឱ្យមានគ្រោះថ្នាក់បែបនេះកើតឡើង៕
ចែករំលែកព័តមាននេះ