ខេត្តកំពង់ចាម ៖ « គ្រូពេទ្យត្រូវតែមានការទទួលខុសត្រូវខ្ពស់ ចំពោះការព្យាបាលអ្នកជំងឺដោយការប្រុងប្រយ័ត្ន ហើយថែមទាំងមានចំណេះដឹងប្រកបដោយវិជ្ជាជីវៈខ្ពស់ថែមទៀត ដើម្បីសុវត្ថិភាពអាយុជីវិតរបស់ប្រជាពលរដ្ឋ» នេះជាប្រសាសន៍របស់លោកសាស្ត្រាចារ្យ ធា គ្រុយ រដ្ឋលេខាធិការក្រសួងសុខាភិបាល និងជាប្រធានក្រុមប្រឹក្សាគណៈគ្រូពេទ្យជាតិ បានថែ្លងនៅព្រឹកថ្ងៃទី១៧ កុម្ភៈ ២០១៧ ក្នុងសាលប្រជុំធំសាលាខេត្ត ដោយមានមន្ត្រីសុខាភិបាល និងអ្នកប្រកបសេវាសុខាភិបាលឯកជនចូលរួមចំនួន១.១៥៥នាក់ ក្នុងការពង្រឹងក្រមសីលធម៌គ្រូពេទ្យឲ្យមានភាពល្អប្រើសើរឡើងបន្ថែមទៀត។
លោកស្រី សាស្ត្រាចារ្យជំនួយ ប៉ាង ដានី ប្រធានគណៈឱសថការីខេត្ត មានប្រសាសន៍ឲ្យដឹងថា ចាប់តាំងពីឆ្នាំ២០១៣ មកគណៈគ្រូពេទ្យជាតិដែលមានលោកសាស្ត្រាចារ្យ ធា គ្រុយ ប្រធានក្រុមប្រឹក្សាគណៈគ្រូពេទ្យជាតិបានសម្រិតសម្រាំងឈានទៅត្រួតពិនិត្យឡើងវិញនូវគុណវុឌ្ឍចងក្រងរចនា នូវសេចក្តីសម្រេចចិត្ត និងបទបញ្ជាផ្ទៃក្នុងថ្មី ដែលគ្រូពេទ្យទាំងអស់ត្រូវមានកាតព្វកិច្ចដាក់ពាក្យសុំចុះឈ្មោះក្នុងបញ្ជីការគណៈគ្រូពេទ្យ ជាថ្មីឡើងវិញតាមប្រព័ន្ធអ៊ីនធឺណេត ព្រមទាំងមានចេញវិញ្ញាបនបត្រទទួលស្គាល់ការចុះឈ្មោះពង្រឹងការអនុវត្តក្រមសីលធម៌ តាមយន្តការសំលៀងដុសខាត់សមត្ថភាពវិជ្ជាជីវៈឲ្យរឹងមាំតាមរយៈការបណ្តុះបណ្តាល។
លោកវេជ្ជបណ្ឌិត គីមសួរ ភិរុណ ប្រធានមន្ទីរសុខាភិបាលខេត្តបានថ្លែងថា ស្របពេលដែលរាជរដ្ឋាភិបាលបាន និងកំពុងបន្តអនុវត្តយុទ្ធសាស្ត្រចតុកោណដំណាក់កាលទី៣ សម្រាប់និតិកាលទី៥ នៃរដ្ឋសភា មន្ទីរសុខាភិបាលខេត្តក៏បានយកចិត្តទុកដាក់ចុះត្រួតពិនិត្យ តាមដាន និងមានវិធានការទបស្កាត់នូវរាល់ទីតាំងផ្តល់សេវាឯកជនកន្លងមកដែលប្រព្រឹត្តបំផ្លើស ឬមួយធ្វើហួសដែនកំណត់នៃលក្ខខណ្ឌបច្ចេកទេសរបស់វិជ្ជាជីវៈនីមួយៗ ព្រមទាំងបានរិតបន្តឹងដល់ការិយាល័យស្រុកប្រតិបត្តិឲ្យមានឃ្លាំមើលការប្រព្រឹត្តរបស់អ្នកប្រកបវិជ្ជាជីវៈសុខាភិបាលដែលខុសឆ្គងដើម្បីឆាប់មានចំណាត់ការកែលម្អ។
ទន្ទឹមនេះក្នុងវិស័យសេវាសាធារណៈក៏មានបាតុភាពផ្នែកសេវាសំរាលកូនដែលទាមទារចាំបាច់ធនធានមនុស្សពិសេសឆ្មបមធ្យមឲ្យមានចំនួនសមស្រប នៅតាមមណ្ឌលសុខភាពផងដែរ។ លោកសាស្ត្រាចារ្យ ធា គ្រុយ រដ្ឋលេខាធិការក្រសួងសុខាភិបាល និងជាប្រធានក្រុមប្រឹក្សាគណៈគ្រូពេទ្យជាតិមានប្រសាសន៍ឲ្យដឹងដែរថា នៅលើលោកនេះវិជ្ជាជីវៈសុខាភិបាលដែលជាវិជ្ជាជីវៈមនុស្សទទួលស្គាល់ថា ជាវិជ្ជាជីវៈខ្ពង់ខ្ពស់ថ្លៃថ្នូរ និងទទួលបានការគោរពស្រលាញ់ពីមនុស្សទូទៅ។ អាចក្លាយជាអ្នកប្រកបវិជ្ជាជីវៈសុខាភិបាល ជាពិសេសគ្រូពេទ្យ ទន្តពេទ្យ ឱសថការី ត្រូវទទួលការបណ្តុះបណ្តាលក្នុងរយៈពេលពី៦ទៅ៨ឆ្នាំហើយបើអ្នកជំនាញឯកទេសវិញប្រើពេលពី១៤ទៅ១៥ឆ្នាំ។
លោកសាស្ត្រាចារ្យ ធា គ្រុយ មានប្រសាសន៍បន្តថា សម្រាប់នៅប្រទេសកម្ពុជាយើងគឺតម្រូវឲ្យនិស្សិតទាំងអស់ដែលបានបញ្ចប់ការសិក្សាដោយជោគជ័យនៅសាលាទាំងរដ្ឋ និងឯកជន ឲ្យប្រលងចេញថ្នាក់ជាតិជាប់ទើបអាចចុះបញ្ជីរការ និងទទួលបានអាជ្ញាប័ណ្ណពីគណៈវិជ្ជាជីវៈសុខាភិបាលពាក់ព័ន្ធមុនពេលចេញទៅប្រកបវិជ្ជាជីវៈនោះ។ ពិតជាមានហេតុផលព្រោះសុខភាពរបស់មនុស្សម្នាក់អាចរងគ្រោះប្រសិនបើគ្រូពេទ្យម្នាក់ ឆ្នប ឬគិលានុដ្ឋាកម្នាក់មិនមានសមត្ថភាពមាំទាំ មិនមានសប្បទានគ្រប់គ្រាន់នៅក្នុងការព្យាបាលនោះ ដែលទាមទារឲ្យមានចំណេះដឹងច្បាស់លាស់ ត្រូវអនុវត្តន៍ការងាររបស់ខ្លួនធ្វើយ៉ាងណាដោយមានការប្រុងប្រយ័ត្ន ដោយមានស្មារតីទទួលខុសត្រូវខ្ពស់ និងប្រកបដោយក្រមសីលធម៌វិជ្ជាជីវៈ។
រាល់ការខ្វះខាតសមត្ថភាព និងសីលធម៌ វិជ្ជាជីវៈ ប្រហែសនៅពេលដែលថែទាំព្យាបាលអ្នកជំងឺ គឺអាចបង្កឲ្យគ្រោះថ្នាក់ដល់អាយុជីវិតមនុស្ស។ រូបលោកសូមឲ្យគ្រូពេទ្យត្រូវតែមានការប្រុងប្រយ័ត្នខ្ពស់ក្នុងការព្យបាលអ្នកជំងឺ ដោយមានស្មារតីទទួលខុសត្រូវខ្ពស់ផងដែរ។ រូបលោកបានបម្រើការងារពេទ្យនេះរយៈពេល៣៧ឆ្នាំមកហើយ គឺបានដឹងពីការលំបាករបស់គ្រូពេទ្យ ហើយប្រសិនបើមានការខ្វះខាតណាមួយនោះសូមឲ្យគ្រូពេទ្យមួយចំនួនត្រូវកែលម្អឲ្យបានប្រសើរឡើង៕
ចែករំលែកព័តមាននេះ