ខេត្តព្រះសីហនុ ៖ បុរសម្នាក់ត្រូវបានបាត់បង់ជិវិតយ៉ាងអាណោចអាធ័មនៅកណ្តាលផ្លូវ ខណៈដែលគេសង្ស័យថា ត្រូវរថយន្តដឹកទំនិញមួយបានបុកស្លាប់កាលពីវេលាម៉ោង១០និង១០នាទីយប់ ថ្ងៃទី១៥ កុម្ភៈ នៅតាមបណ្តោយផ្លូវជាតិលេខ៤ ត្រង់ចំណុចក្បែរចំណោតអូត្រាវ ស្ថិតក្នុតភូមិ១ សង្កាត់លេខ១ ក្រុងព្រះសីហនុ។ យោងតាមប្រភពពីសមត្ថកិច្ចចរាចរណ៍ លោក វរៈសេនីយ៍ឯក អ៊ី សុខា ស្នងការរងទទួលបន្ទុកសណ្តាប់ធ្នាប់ ដែលបានចុះដល់កន្លែងកើតហេតុបានអះអាងថា ករណីគ្រោះថ្នាក់ចរាចរណ៍នេះ គេនៅពុំទាន់ដឹងថា បង្កឡើងដោយរថយន្តដែលចតនៅក្បែរ ឬយ៉ាងណានោះទេ។
ប៉ុន្តែបើយោងតាមការអង្កេតរបស់សមត្ថកិច្ចអាចសន្និដ្ឋានជំហានដំបូងថា មុនកើតហេតុរថយន្តរបស់ក្រុមហ៊ុនលោក សុង ដាវីត បានចតនៅលើចញ្ចើមផ្លូវ ទំនងឈប់ប្តូរកង់ ប៉ុន្តែនៅពេលកំពុងប្តូរកង់ ក៏ត្រូវបានម៉ូតូជនរងគ្រោះម៉ាក ហុងដាសេ១២៥ ពណ៌ខ្មៅ ពាក់ស្លាកលេខ ព្រះសីហនុ 4A-0949 បើកបរដោយឈ្មោះ សុខ វណ្ណា ភេទប្រុស អាយុ៣៥ឆ្នាំ មានមុខរបរកម្មករ ក្តាបន្ទះ ក្នុងតំបន់សេដ្ឋកិច្ចពិសេសបិតត្រាំង មានទីលំនៅភូមិពូធឿង ឃុំបិតត្រាំង ស្រុកព្រៃនប់ ខេត្តព្រះសីហនុ បានជិះទៅបុកពីក្រោយរថយន្ត បណ្តាលឲ្យបោកក្បាលជាមួយទ្រុងរថយន្តស្លាប់ភ្លាមៗនៅកន្លែងកើតហេតុ។
ដោយឡែកតៃកុងរថយន្តដឹកទំនិញ កម្មសិទ្ធិរបស់លោក សុង ដាវីត បានរត់គេចខ្លួនក្រោយកើតហេតុ។ ក្រោយកើតហេតុ រថយន្ត និងម៉ូតូត្រូវបានសមត្ថកិច្ចយកមករក្សាទុកនៅការិយាល័យចរាចរណ៍ខេត្តរង់ចាំការដោះស្រាយនៅពេលក្រោយ រីឯសាកសពត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ឯស្រុកកំណើត៕
ចែករំលែកព័តមាននេះ