Google និង Facebook បានចាប់ដៃគូ ជាមួយអ្នកកាសែតដើម្បីជួយទប់ស្កាត់ព័ត៌មានក្លែងក្លាយក្នុងអំឡុងពេលការបោះឆ្នោតនៅប្រទេសបារាំង ។
Google News Lab និង First Draft News បានចាប់ដំណើរការគម្រោងបញ្ជាក់មួយមានឈ្មោះថា CrossCheck ដែលអាចជួយដល់ការស្វែងរក និងប្រាប់ឲ្យដឹងថា ព័ត៌មានណាមួយក្លែងក្លាយ ។
មានអង្គការព័ត៌មានធំៗយ៉ាងតិច១៧ចូលរួមក្នុងគម្រោងនេះ រួមមាន Le Monde, Agence France-Presse (AFP), Liberation, BuzzFeed និង France Medias Monde ដែលគ្រប់គ្រង Radio France Internationale និងស្ថានីយទូរទស្សន៍ France 24 ។
Google និង Facebook នឹងផ្តល់ឧបករណ៍ដល់អ្នកកាសែតឲ្យជួយស្វែងរកព័ត៌មានដែលមិនមែនជាការពិត ។ Google Trend និង CrowdTangle ជាឧបករណ៍មួយរបស់ Facebook ប្រើប្រាស់សម្រាប់ត្រួតពិនិត្យបណ្តាញសង្គម នឹងស្វែងរកព័ត៌មានទាំងនោះ ។
Google ក៏នឹងបង្វឹកសិស្សពីសាលាសារព័ត៌មានរបស់បារាំងធំៗនូវវិធីសាស្ត្រ ស្វែងរក ដែលអាចប្រើប្រាស់ដើម្បីរកព័ត៌មានក្លែងក្លាយទាំងនោះបាន ។
សាធារណជនក៏អាចផ្ញើសំណួរ និងអាសយដ្ឋាន (Link) ទៅកាន់ព័ត៌មានដែលមានបញ្ហាផងដែរ ។ សំណួររបស់ពួកគេនឹងត្រូវបានឆ្លើយតបក្នុងគេហទំព័រមួយ ។
ជុំទី១ នៃការបោះឆ្នោតរបស់ប្រទេសបារាំងនឹងត្រូវបានធ្វើឡើងនៅថ្ងៃទី២៣ មេសា ។
គួរបញ្ជាក់ថា Google និង First Draft News ក៏បានសហការគ្នាលើគម្រោងស្រដៀងគ្នាផងដែរ កាលពីពេលបោះឆ្នោតជ្រើសរើសប្រធានាធិបតីរបស់សហរដ្ឋអាមេរិកនាឆ្នាំមុន ។
ព័ត៌មានក្លែងក្លាយបានបំពុលប្រព័ន្ធសង្គមក្នុងអំឡុងពេលបោះឆ្នោតធំៗទូទាំងពិភពលោក។ Facebook Google និងក្រុមហ៊ុនដទៃ ត្រូវបានគេរិះគន់យ៉ាងខ្លាំងលើមធ្យោបាយរបស់ពួកគេក្នុងការដោះស្រាយបញ្ហានេះ ៕
ចែករំលែកព័តមាននេះ