ក្រុងប៉ារីស មានគម្រោងចំណាយប្រាក់ប្រហែល២២លានដុល្លារ សង់កំផែងកញ្ចក់ការពារក្នុងកម្ពស់៣,៦ម៉ែត្រ នៅជុំវិញអគារទួអេហ្វែល គឺជាផ្នែកមួយនៃបទដ្ឋានទប់ទល់នឹងការបង្កភេរវកម្ម ក្រោយពីរយៈពេល២ឆ្នាំកន្លងមក ពលរដ្ឋបារាំងជាង២០០នាក់ ស្លាប់បាត់បង់ជីវិតដោយភេរវកម្ម ។
«Hello Giggles» ប្រព័ន្ធផ្សព្វផ្សាយផ្នែកទេសចរណ៍ បានផ្សាយកាលពីថ្ងៃទី១១ ខែកុម្ភៈ ឆ្នាំ២០១៧ ថា ការសង់កំផែងបញ្ចក់ការពារគ្រាប់នៅទួអេហ្វែលនោះ គឺជាផ្នែកមួយនៃបទដ្ឋានការពារសុវត្ថិភាពដ៏ធំរបស់ទីក្រុង ជាចំណុចគោលដៅរបស់ភ្ញៀវទេសចរពីគ្រប់ទិសទីនៅទូទាំងពិភពលោក ។
លោកJean Francois Martins ជំនួយការចៅហ្វាយក្រុងប៉ារីស យល់ឃើញថា «គឺជារឿងគួរឱ្យសោកស្ដាយដែលអំពើភេរវកម្មមិនបានបញ្ចប់ និងបញ្ជាក់ថា អ្វីដែលសាងសង់មិនមែនជាកំផែងទេ ប៉ុន្ដែជាចំណុចសម្រាប់បញ្ជាក់ពីបរិវេណនៃអគារទួអេហ្វែល» ។
«Hello Giggles» បានបញ្ជាក់បន្ថែមទៀតថា កំផែងកញ្ចក់នោះអាចទប់ទល់កម្លាំងទង្គិច និងការបុកពីរថយន្ដដឹកទំនិញធុនធំបានយ៉ាងល្អ ប្រៀបដូចជាអាចការពារពីហេតុការណ៍ដែលបានកើតឡើងនៅតំបន់ឆ្នេរក្រុងនីស និងផ្សារគ្រីស្មាសនៅក្រុងប៊ែរឡាំង ប្រទេសអាល្លឺម៉ង់ ៕
ចែករំលែកព័តមាននេះ