រាជធានីភ្នំពេញ ៖ ពហុកីឡដ្ឋានមរតកតេជោ ដែលរាជរដ្ឋាភិបាល បានបើកការដ្ឋានសាងសង់ កាលពីថ្ងៃទី១២ មេសា ២០១៣ កន្លងមកនោះ ពេលនេះបានជិតរួចរាល់ហើយ សម្រាប់ដំណាក់កាលទី១ ដែលគ្រោងសម្ពោធដាក់ឱ្យប្រើប្រាស់ក្នុងខែមីនា ២០១៧នេះ ហើយត្រូវបញ្ចប់ទាំងស្រុងនៅឆ្នាំ២០២០ ដើម្បីត្រៀមប្រកួតស៊ីហ្គេមនៅឆ្នាំ២០២៣ ដែលព្រះរាជាណាចក្រកម្ពុជា ធ្វើជាម្ចាស់ផ្ទះ ។
លោក វ៉ាត់ ចំរើន អគ្គលេខាធិការជាតិអូឡាំពិកបានឱ្យកោះសន្តិភាពដឹងតាមរយៈទូរស័ព្ទនៅព្រឹកថ្ងៃចន្ទ ទី១៣ កុម្ភៈ នេះថា រហូតមកទល់ពេលនេះ ពហុកីឡដ្ឋាន ជាតិមរតកតេជោ សាងសង់មូលដ្ឋានគ្រឹះជិតរួចរាល់ហើយ គឺនៅសល់ការងារតុបតែង និងសំអាតខ្លះ ដើម្បីត្រៀមសម្ពោធដាក់ឲ្យប្រើប្រាស់ក្នុងខែមីនានេះ ក្នុងនោះមានកន្លែងមណ្ឌលកីឡាហែលទឹក កន្លែងស្នាក់នៅរបស់កីឡាករ ដែលគេហៅថាភូមិកីឡា និងកំពុងជំរុញការសាងសង់ជាបន្តបន្ទាប់ទៀត ។
លោកបន្តថា ការសាងសង់ពហុកីឡាដ្ឋានជាតិមរតកតេជោនេះ មាន៣ដំណាក់កាល គឺដំណាក់កាលទី១-មានរយៈពេល៤ឆ្នាំ ទី២-មាន៤ឆ្នាំ និងដំណាក់កាលទី៣-មានរយៈពេលខ្លី ជាដំណាក់កាលតុបតែងកែលំអរ និងការងារសំអាតប៉ុណ្ណោះ ហើយជាផែនការមេស៊ីហ្គេមធ្វើយ៉ាងណា សាងសង់ឱ្យហើយក្នុងឆ្នាំ២០១៩ និង២០២០ ដើម្បីទុកពេល៣ ទៅ៤ឆ្នាំសម្រាប់ធ្វើការប្រកួត និងប្រើប្រាស់សាកល្បង ។
ចែករំលែកព័តមាននេះ