ស្ត្រីដែលមានខួបរដូវធម្មតា ហើយក្រោយពីបាត់រដូវស្ត្រីត្រូវដឹងខ្លួនថានឹងអាចមានគភ៌ ។ នៅពេលដែលមានផ្ទៃពោះក្នុងរយៈពេលពី៣ទៅ៦សប្តាហ៍ ស្ត្រីដែលមានអាការឈឺចុកចាប់នៅខាងក្រៅពោះ និងមានហូរឈាមតាមទ្វារមាសបន្តិចបន្តួច ដែលមានពណ៌ក្រហមក្រមៅ ឬពណ៌ត្នោត ជាសញ្ញាមួយដែលអាចបញ្ជាក់ថាអាចនឹងមានកូនក្រៅស្បូន ។
កូនក្រៅស្បូនគឺជាការពពោះ ឬក៏ការបង្កកំណើតមួយបែបដែលស្ថិតនៅក្រៅតួស្បូន ឬមិននៅក្នុងស្បូន ដូចជានៅក្នុងពោះ នៅលើដៃស្បូន នៅលើតួដៃស្បូន នៅចុងដៃស្បូន ឬនៅជាប់ក្រសោមកូន តែជាទូទៅកូនក្រៅស្បូនដែលតែងតែងជួបប្រទះញឹកញាប់ជាងគេ គឺនៅលើដៃស្បូន ជាហេតុបង្កឲ្យមានគ្រោះថ្នាក់ដល់ជីវិត ដោយសារតែការខ្សោះឈាមនៅពេលដែលដៃស្បូនបែកធ្លាយ ដោយការរីកធំធាត់នៃគភ៌ ។
កូនក្រៅស្បូនតែងតែកើតមានចំពោះស្ត្រីដែលមានដៃគូរួមភេទ ហើយធ្លាប់កើតមាននូវបញ្ហាមួយចំនួនដូចជា ៖
-ធ្លាប់កើតមានជំងឺរលាកដៃស្បូនរ៉ាំរ៉ៃ
-ធ្លាប់វះកាត់ដែលប៉ះពាល់ទៅលើដៃស្បូន
-ស្ត្រីដែលញៀនបារីក៏ជាកត្តាមួយអាចឲ្យទទួលរងនូវជំងឺកូនក្រៅស្បូននេះបានដែរ ។
-ស្ត្រីខ្លះមានដៃស្បូនមិនប្រក្រតីពីកំណើត
-ស្ត្រីមានជំងឺរ៉ាំរ៉ៃមួយចំនួននៅក្នុងពោះ
-ស្ត្រីដែលធ្លាក់សរ៉ាំរ៉ៃ
-ស្ត្រីធ្លាប់កើតមានជំងឺសង្គមរ៉ាំរ៉ៃ
-ការរំលូតកូនចេញច្រើនដង
-ស្ត្រីដែលដាក់កងស្បូនមិនបានត្រឹមត្រូវជាដើម ។
រាល់ការធ្លាក់ឈាមបន្តិបន្តួចនៅពេលចាប់ផ្តើមមានគភ៌មិនប្រាកដថាជាការមានកូនក្រៅស្បូនទេ ។ ដូច្នេះរាល់ការសង្ស័យស្ត្រីទាំងអស់ត្រូវប្រញាប់ទៅជួបពិភាក្សាជាមួយគ្រូពេទ្យជំនាញដើម្បីដោះស្រាយឲ្យបានទាន់ពេលវេលា។ ជាពិសេសស្ត្រីដែលធ្លាក់មានប្រវត្តិដូចដែលបានបង្ហាញខាងលើ នៅពេលបាត់វឌ្ឍរដូវភ្លាមគួរតែប្រញាប់ទៅពិភាក្សាជាមួយគ្រូពេទ្យ ដើម្បីតាមដាន ៕
ចែករំលែកព័តមាននេះ