ខេត្តសៀមរាប ៖ ថ្ងៃចូលឆ្នាំចិន-វៀតណាម រយៈពេល៣ថ្ងៃ គឺចាប់ពីថ្ងៃទី២៨-២៩និង៣០ មករា ឆ្នាំ២០១៧ ភ្ញៀវជាតិ និងអន្តរជាតិគ្រប់សាសន៍ ដែលចូលមកទស្សនា និងដើរលេងកម្សាន្តនៅតាមរមណីយដ្ឋាននានាលើទឹកដីខេត្តសៀមរាបមានច្រើនកុះករជាងឆ្នាំមុនៗ ។
នៅកន្លែងព្រះអង្គចេក ព្រះអង្គចម និងលោកយាយទេព ប្រជាពលរដ្ឋខ្មែរដែលមួយចំនួនជាប់សែស្រឡាយចិនមកពីទីជិតឆ្ងាយ និងភ្ញៀវអន្តរជាតិបាននាំគ្នាយកផ្កាភ្ញីធូបទៀនមកគោរពបូជាដើម្បីសុំសេចក្តីសុខចម្រើនដល់ក្រុមគ្រួសារ ឬសាច់ញាតិ នៅទីនោះ ។
នៅតាមរមណីយដ្ឋានវប្បធម៌ធម្មជាតិ ប្រវត្តិសាស្ត្រដែលមានដើមឈើធំៗផ្ដល់ម្លប់ត្រឈឹងត្រឈៃសម្រាប់បងប្អូនអង្គុយលេងជាពិសេសនៅមុខប្រាង្គប្រាសាទអង្គរដែលជាដួងព្រលឹងជាតិខ្មែរ និងជាសម្បត្តិបេតិកភណ្ឌពិភពលោកមានភ្ញៀវទេសចរជាតិ-អន្តរជាតិច្រើនជាងគេក្នុងទឹកមុខញញឹមស្រស់ស្រាយ បន្ទាប់ពីពួកគាត់នាំគ្នាចូលទៅទស្សនាប្រាសាទអង្គរដ៏ល្អឯកដែលដូនតាខ្មែរបានកសាងឡើងតាំងពីសម័យបុរាណកាលមក ។ ពួកគាត់ក៏មិនភ្លេចនាំគ្នាទៅទស្សនារមណីយដ្ឋានកែច្នៃមួយចំនួននៅក្នុងភូមិវប្បធម៌ដែលជាកន្លែងប្រមូលផ្តុំ និងចងក្រងប្រវត្តិសាស្ត្រនៃបុព្វបុរសខ្មែរដែលជាវីរជនកាលពីសម័យសង្គ្រាម និងដឹកនាំកសាងប្រទេសឱ្យមានការរីកចម្រើននាសម័យអង្គរនោះទេ ។
ក្នុងសម័យទំនើបនេះ យើងឃើញមានបងប្អូនភ្ញៀវជាតិ និងអន្តរជាតិ ដែលធ្វើដំណើរ តាមឧទ្ធម្ភាគចក្រ និងមានរថយន្តទំនើបៗ ដើម្បីចូលមកទស្សនាតាមប្រាង្គប្រាសាទនានានូវទេសភាពនៃសម្រស់ធម្មជាតិពិតៗនៃទីក្រុងប្រវត្តិសាស្ត្រខេត្តសៀមរាបផងដែរ ។
សូមបញ្ជាក់ផងដែរថា ក្រោមការដឹកនាំដ៏ឈ្លាសវៃប្រកបដោយគតិបណ្ឌិតដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ធ្វើឱ្យខេត្តសៀមរាប មានការអភិវឌ្ឍរីកចម្រើនគ្រប់វិស័យ សំខាន់គឺវិស័យទេសចរណ៍ ដោយមានហេដ្ឋារចនាសម្ព័ន្ធ រូបវ័ន្ត មានប្រព័ន្ធផ្លូវថ្នល់ ទឹកស្អាត អគ្គិសនី សណ្ឋាគារ ផ្ទះសំណាក់ ភោជនីយដ្ឋាន ផ្សាររាត្រី ផ្សារទំនើប គ្រប់ទាំង២៥ខេត្ត-រាជធានី ជាពិសេសសន្តិសុខ សណ្តាប់ធ្នាប់សាធារណៈ កាន់តែល្អធ្វើឱ្យភ្ញៀវទេសចរមកលេងម្ដងហើយចង់មកលេងម្ដងទៀត។
ក្នុងឱកាសចូលឆ្នាំចិន-វៀតណាមរយៈពេល៣ថ្ងៃនេះដែរ អាជ្ញាធរខេត្តសៀមរាបបានរៀបចំកែលម្អសោភ័ណភាពទីក្រុងប្រវត្តិសាស្ត្រមួយនេះឱ្យក្លាយទៅជាទីក្រុងស្អាត ដើម្បីទាក់ទាញភ្ញៀវឱ្យចូលមកលេងបានច្រើនជាងឆ្នាំមុនៗ។អាជ្ញាធរខេត្តបានរៀបចំពង្រីកផ្លូវ និងស្ពាន ក្នុងក្រុង ដើម្បីបញ្ចៀសការកកស្ទះចរាចរណ៍ និងកាត់បន្ថយគ្រោះថ្នាក់ចរាចរណ៍ធ្វើឱ្យភ្ញៀវជាតិ និងអន្តរជាតិ ពេញចិត្តនាំគ្នាចូលមកលេងយ៉ាងច្រើនកុះករដូចថ្ងៃចូលឆ្នាំចិន-វៀតណាមនេះ ដែលជាកត្តាជួយលើកកម្ពស់ជីវភាពបងប្អូនប្រជាពលរដ្ឋក្នុងខេត្តសៀមរាបផងដែរ ។
បើយោងតាមរបាយការណ៍របស់លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាបឱ្យដឹងថា ក្នុងឱកាសថ្ងៃបុណ្យចូលឆ្នាំចិន-វៀតណាមរយៈពេល៣ថ្ងៃឆ្នាំ២០១៧នេះ ភ្ញៀវទេសចរជាតិនិងអន្តរជាតិដែលចូលមកទស្សនាកម្សាន្តតាមប្រាង្គប្រាសាទអង្គរវត្ត និងនៅតាមរមណីយដ្ឋានវប្បធម៌ធម្មជាតិនានាក្នុងខេត្តសៀមរាប សរុបមានចំនួន៨០.៧២៤នាក់ កើនឡើង៦,៣៦% បើប្រៀបធៀបទៅនឹងឆ្នាំ២០១៦ មានចំនួន៧៥.៨៩០នាក់។ ចំពោះភ្ញៀវជាតិដែលចូលមកទស្សនាក្នុងខេត្តសៀមរាបមានចំនួន៥ម៉ឺននាក់ កើនឡើង៤,១៦% បើប្រៀបធៀបទៅនឹងឆ្នាំ២០១៦មានចំនួន៤៨.០០០នាក់ ។ ក្នុងនោះភ្ញៀវទេសចរបរទេសមានចំនួន៣០.៧២៤នាក់ កើនឡើង១០,១៦%បើប្រៀបធៀបទៅនឹងឆ្នាំ២០១៦ មានចំនួន២៧.៨៩០នាក់ ៕
ចែករំលែកព័តមាននេះ