អ្នកនាំពាក្យគណបក្សប្រជាធិបតេយ្យកំពុងកាន់អំណាចរបស់ថៃថ្លែងកាលពីថ្ងៃទី៤ កញ្ញា ថា ពេលនេះលោកនាយករដ្ឋមន្ត្រីអាប់ភីស៊ីត វ៉េចាជីវ៉ា បានត្រៀមខ្លួនរួចជាស្រេច ដើម្បីពិភាក្សា និងចរចាអំពីការផ្សះផ្សាគ្នាជាមួយមេដឹកនាំគណបក្សប្រឆាំង គឺគណបក្សភឿថៃ ដែលការពិភាក្សានេះក្នុងគោលបំណងនាំមកនូវប្រក្រតីភាពសំរាប់ប្រទេស ក្រោយពីកើតអំពើហិង្សាប្រកបដោយការបង្ហូរឈាមជាបន្តបន្ទាប់មក ។ អ្នកនាំពាក្យដដែលនេះថ្លែងឱ្យដឹងទៀតថា ការពិភាក្សារវាងលោកនាយករដ្ឋមន្ត្រីអាប់ភីស៊ីត និងមេដឹកនាំគណបក្សភឿថៃ នឹងធ្វើឡើងក្រោយពីលោកអាប់ភីស៊ីត វិលត្រឡប់មកពីប្រទេសចិនវិញ ។
អ្នកនាំពាក្យគណបក្សប្រជាធិបតេយ្យលោកប៊ូរ៉ា ណាត សាម៉ូតារ៉ាក់ ថ្លែងថា សំណើផ្សះផ្សាដែលមាន៥ចំណុចរបស់គណបក្សភឿថៃ គឺត្រូវបានស្វាគមន៍ដោយរដ្ឋាភិបាលរបស់លោកអាប់ភីស៊ីត ពីព្រោះសំណើនេះគឺដើម្បីនាំមកនូវការបញ្ចប់ជំលោះនយោបាយក្នុងប្រទេស ។ លោកនាយករដ្ឋមន្ត្រីអាប់ភីស៊ីត វ៉េចាជីវ៉ា បានទៅកាន់ប្រទេសចិន កាលពីថ្ងៃទី៤ កញ្ញា កន្លងមក ដើម្បីចូលរួមក្នុងពិធីតាំងពិព័រណ៍ ប្រចាំឆ្នាំ២០១០ ដែលរៀបចំឡើង ក្នុងទីក្រុងសៀងហៃ ។ លោកអាប់ភីស៊ីត ទៅបំពេញទស្សនកិច្ចនៅប្រទេសចិនរយៈពេល៣ថ្ងៃ ។
លោកប៊ូរ៉ាណាត ថ្លែងថា ការពិភាក្សានោះប្រសិនបើត្រូវបានធ្វើឡើងមែន នឹងផ្តោតជាពិសេសទៅលើរបៀបទប់ស្កាត់ភាពចលាចល និងអំពើហិង្សាក្នុងប្រទេស ។ កាលពីថ្ងៃទី៣ កញ្ញា កន្លងមក គណបក្សភឿថៃបានចេញសំណើមួយមាន៥ចំណុច ដើម្បីស្វះស្វែងរកការពិភាក្សា និងចរចាជាមួយរដ្ឋាភិបាលលោកអាប់ភីស៊ីត ដើម្បីបញ្ចប់ជំលោះផ្នែកនយោបាយដែលកើតឡើងជាបន្ត ក្រោយពីការធ្វើរដ្ឋប្រហារយោធាមិនបង្ហូរឈាមថ្ងៃទី១៩ កញ្ញា ឆ្នាំ២០០៦ ដែលទំលាក់លោកថាក់ស៊ីន ស៊ីណាវ៉ាត្រា ចេញពីតំណែងមក ៕
ចែករំលែកព័តមាននេះ