ខេត្ដសៀមរាប ៖ ពិធីបុណ្យចំបើង ឬបុណ្យដារលាន ឬពិធីបុណ្យកសិទេសចរណ៍ ត្រូវក្រុមហ៊ុនកូរ៉េ រៀបចំជាលើកដំបូងនៅខេត្ដសៀមរាប ។ លោកប៉ាក សុខុម រដ្ឋលេខាធិការក្រសួងទេសចរណ៍ លោកគឹម ឆៃហៀង អភិបាលរងខេត្ត អគ្គកុងស៊ុលនៃសាធារណរដ្ឋកូរ៉េ ប្រចាំខេត្តសៀមរាប នាយកទីភ្នាក់ងារលើកកម្ពស់ពាណិជ្ជកម្ម និងវិនិយោគកូរ៉េ រួមទាំងថ្នាក់ដឹកនាំមន្ទីរ អាជ្ញាធរក្រុងសង្កាត់ សិស្ស និងមហាជនបានចូលរួមក្នុងពិធីនោះរយៈពេល៣ថ្ងៃ ចាប់ពីរសៀលថ្ងៃទី២០ដល់ទី២២ ខែមករា ឆ្នាំ២០១៧ នៅលើផ្ទៃដី៤ហិកតា ក្នុងភូមិកន្ត្រក សង្កាត់ស្វាយដង្គំ ក្រុងសៀមរាប ខេត្តសៀមរាប ។
ការរៀបចំពិធីបុណ្យចំបើង ឬបុណ្យដារលានឬពិធីបុណ្យកសិទេសចរណ៍នេះឡើង ក្រោមកិច្ចសហការជាមួយទីភ្នាក់ងារលើកកម្ពស់ពាណិជ្ជកម្ម និងវិនិយោគនៃស្ថានទូតកូរ៉េ ប្រចាំព្រះរាជាណាចក្រកម្ពុជា និងក្រសួងកសិកម្ម រុក្ខាប្រមាញ់ និងនេសាទ ក្រសួងទេសចរណ៍ និងអាជ្ញាធរខេត្ត ។
ពិធីបុណ្យចំបើងដែលប្រជាជនខ្មែរនិយមធ្វើនៅតាមជនបទ តែងតែប្រារព្ធធ្វើឡើងជារៀងរាល់ឆ្នាំ ក្រោយពីការប្រមូលភោគផលស្រូវ រួចរាល់នៅអំឡុងខែមករា កុម្ភៈ ឬខែមីនា នៅតាមភូមិ នីមួយៗ ដើម្បីរំលឹកនឹកគុណដល់ព្រះធរណី និងព្រះគង្គា ដែលជាកត្តាសំខាន់ក្នុងការបង្កបង្កើនផលស្រូវ ដែលខ្មែរយើងតែងហៅថា «ពិធីបុណ្យដារលាន» ។
ពិធីបុណ្យនេះធ្វើឡើង ដើម្បីសម្សាន្ដសប្បាយក្រោយពីនឿយហត់ក្នុងការបង្កបង្កើនផល និងការបង្ហាញគ្នាទៅវិញទៅមកនូវភោគផលរបស់ពួកគេដែលទទួលបានប្រចាំឆ្នាំ ព្រមទាំងការជួបជុំបងប្អូនជិតឆ្ងាយ ។ ពិធីបុណ្យនេះភាគច្រើនរៀបចំក្នុងរយៈពេល២ថ្ងៃ ទៅតាមប្រពៃណី ដោយមានល្ខោន យីកេ ចាប៉ីដងវែង លេងកំដរនៅពេលរាត្រី ។ លុះព្រឹកឡើងធ្វើពិធីរាប់បាត្រ ដារឆ្លង ហើយនៅពេលថ្ងៃត្រង់ អ្នកភូមិយកស្រូវតាមសទ្ធាទៅចាក់ «ធារ» នៅកន្លែងប្រារព្ធពិធីបុណ្យ ឬនៅសាលាបុណ្យ ហើយស្រូវទាំងនោះនឹងត្រូវយកប្រគេនព្រះសង្ឃតាមវត្តអារាមដែលមានការខ្វះខាត ។
ចំពោះការរៀបចំពិធីបុណ្យចំបើង ឬបុណ្យកសិទេសចរណ៍នៅលើទឹកដីខេត្ដត្រសៀមរាបនេះ មានរចនាតាំងបង្ហាញៗរូបសត្វដ៏កម្រជិតផុតពូជពីភពផែនដី គ្រឿងសង្ហារិមដែលធ្វើឡើងពីចំបើង ព្រមទាំងភោគផលកសិកម្មខ្មែរ ។
ការប្រារព្ធពិធីបុណ្យចំបើងនេះបានរួមចំណែកថែរក្សាទំនៀមទម្លាប់ ប្រពៃណីរបស់ជនជាតិខ្មែរ ដែលបន្សល់ទុកតាំងពីសម័យបុរាណ ព្រមទាំងបង្ហាញដល់ភ្ញៀវជាតិ អន្តរជាតិ ជ្រួតជ្រាបអំពីវប្បធម៌ដ៏សម្បូរបែប ដ៏ល្អផូរផង់ ប្រកបដោយគុណតម្លៃយ៉ាងពិសេសអស្ចារ្យ ។ ម្យ៉ាងទៀតនេះ វាជាការទាក់ទាញភ្ញៀវទេសចរជាតិ អន្តរជាតិនៅលើពិភពលោកឱ្យទៅទស្សនាកម្សាន្ត ក្រៅពីទស្សនាកម្សាន្តនៅតាមរមណីយដ្ឋានវប្បធម៌ និងធម៌ជាតិ ។ ភ្ញៀវទេសចរជាតិ អន្តរជាតិ កាន់តែយល់ដឹងបន្ថែមអំពីវប្បធម៌ ប្រពៃណីដ៏ល្អផូរផង់របស់ខ្មែរ ក៏ដូចជាចូលរួមលើកស្ទួយវប្បធម៌ដ៏ប្រពៃមួយនេះឲ្យបានគង់វង្ស សម្រាប់អ្នកជំនាន់ក្រោយបានសិក្សាឈ្វេងយល់ និងចូលរួមថែរក្សាទាំងអស់គ្នា ។
បុណ្យចំបើង ធ្វើឡើងជាលើកទី៣ហើយ ដោយក្រុមហ៊ុន KOTRA របស់កូរ៉េ សហការរៀបចំឡើង ។ លើកទី១ និងទី២ ធ្វើនៅខេត្តបន្ទាយមានជ័យ និងលើកទី៣ ធ្វើឡើងរយៈពេល៣ថ្ងៃ ចាប់ពីរសៀលថ្ងៃទី២០ដល់ ថ្ងៃទី២២ ខែមករាឆ្នាំ២០១៧ នៅលើទឹកដីខេត្តសៀមរាប ៕
ចែករំលែកព័តមាននេះ