ខេត្តកំពង់ឆ្នាំង ៖ ប្រជាពលរដ្ឋ ក៏ដូចជាលោកមេភូមិសន្ទៃ ឃុំពង្រ ស្រុករលាប្អៀរ បានលើដៃសំពះសុំអំពាវដល់សប្បុរជនជិតឆ្ងាយ ក៏ដូចជាអាជ្ញាធរខេត្ត សូមមេត្តាជួយឧបត្ថមដល់ស្ត្រីចាស់ជរាឯកាម្នាក់ ដែលកំពុងរស់នៅយ៉ាងលំបាកវេទនាតែម្នាក់ឯង ក្នុងខ្ទមយ៉ាងរខេករខាក រំពឹងលើអ្នកជិតខាងយកបាយម្ហូប មកជូនគាត់ពិសារមួយពេលៗ កំដររស់រង់ចាំថ្ងៃស្លាប់។ ក្នុងខ្ទមមានដំបូល និងជញ្ជាំងធ្លុះធ្លាយ ស្ត្រីអ្នកជិតខាងក្នុងភូមិ ដែលឆ្លៀតពេលមកមើល ថែទាំ និងបញ្ចុកបាយដល់លោកយាយខាងលើ បានអោយដឹងថា ស្ត្រីរូបនោះមានឈ្មោះ ចាប ម៉ៅ អាយុ៨៣ឆ្នាំ រស់នៅតែម្នាក់ឯង ក្នុងខ្ទមកំសត់នេះ។
សព្វថ្ងៃគាត់រំពឹងតែលើអ្នកជិតខាង យកបាយសម្លមកបញ្ចុកឲ្យគាត់ជារៀង រាល់ថ្ងៃ តែពេលខ្លះប្រជាពលរដ្ឋរវល់ស្រែចម្ការខ្លាំងពេកក៏ភ្លេចយកបាយសម្លមកបញ្ចុកឲ្យលោកយាយក៏ត្រូវដាច់បាយមួយពេលអ៊ីចឹងទៅ។ លោក ប៉ែន ចាន់យឿន មេភូមិសន្ទៃ ឃុំពង្រ បានឲ្យដឹងដែរថា លោកយាយ ចាប ម៉ៅ នេះគាត់ជាស្ត្រីមេម៉ាយតាំងពីទស្សវត្យ៧០មកម្លេះ ហើយគាត់រស់នៅឯកា ក្នុងភូមិនេះរហូតមក តាំងពីគាត់នៅជើងជាស្មារឹង រហូតចាស់ជរា និងធ្លាក់ខ្លួនឈឺដល់សព្វថ្ងៃនេះ។
កន្លងទៅ ក្នុងនាមគាត់ជាអាជ្ញាធរភូមិ គាត់តែងជួយឧបត្ថមដល់គាត់ដើម្បីបានរស់មួយគ្រាៗដែរ តែដល់ពេលនេះកាន់តែយ៉ាប់ខ្លាំងហើយ ហេតុនេះរូបគាត់ក៏ដូចជាប្រជាពលរដ្ឋ ដែលនៅជិតខាង សូមអំពាវដល់សប្បុរសជនទាំងអស់ សូមមេត្តាជួយឧបត្ថមគាត់ជាជីវិតចុងក្រោយនេះផង ។ សូមបញ្ជាក់ដែរថា តាមប្រជាពលរដ្ឋបានប្រាប់ថា ខ្ទមដែលគាត់កំពុងរស់នៅ គឺបានលោកមេភូមិ និងប្រជាពលរដ្ឋសាងសង់ឲ្យពេលនេះចាស់ធ្លុះធ្លាយដំបូលអស់ហើយ ចំណែកខ្ទមនេះដែរក៏សង់លើដីរបស់គេ ដែលមានចិត្តធម៌សប្បុរសឲ្យរស់នៅទំរាំដល់ជីវិតចុងក្រោយតែប៉ុណ្ណោះ៕
ចែករំលែកព័តមាននេះ