ឆ្លើយតប សម រង្ស៊ី មេបក្សប្រឆាំងមិនទទួលស្គាល់ថ្ងៃ7មករា តែធ្វើនយោបាយបានដោយសារ7មករា
រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានអះអាងថា គណបក្សប្រឆាំងមិនដែលទទួលស្គាល់ថ្ងៃ៧ មករា ឆ្នាំ១៩៧៩នោះទេ
រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានអះអាងថា គណបក្សប្រឆាំងមិនដែលទទួលស្គាល់ថ្ងៃ៧ មករា ឆ្នាំ១៩៧៩នោះទេ ប៉ុន្តែមេបក្សនេះ ភ្លេចខ្លួនថា បានធ្វើនយោបាយ បានមកពីថ្ងៃ៧ មករា នោះទេ ។
ការអះអាងរបស់អ្នកនាំពាក្យគណបក្សកាន់អំណាចបែបនេះបន្ទាប់ពីលោក សម រង្ស៊ី ប្រធានគណបក្សសង្គ្រោះជាតិ កំពុងរស់នៅក្រៅប្រទេសបានសរសេរលើបណ្តាញសង្គមថា «ថ្ងៃ ៧ មករា ១៩៧៩ គឺជាឆាកល្ខោនដែលយួនបានរៀបចំទាំងអស់ ។ គេថា គេមករំដោះយើងពីខ្មែរក្រហម តែបើអត់មានយួនកម្មុយនីស្ដពីដើមទី ក៏អត់មានខ្មែរក្រហមដែរ» ។
លោក សុខ ឥសាន បញ្ជាក់ថា «វាជារឿងធម្មតា មិនមែនជារឿងចម្លែកទេ ដែល សម រង្ស៊ី បរិហារថ្ងៃ៧ មករា ពីព្រោះថា គាត់ជាមេបក្សប្រឆាំង គាត់មិនដែលគាំទ្រ ថ្ងៃ៧ មករា នោះទេ ទោះបីជាថ្ងៃ៧ មករា គឺជាសមិទ្ធផលរបស់គណបក្សប្រជាជនកម្ពុជា ដែលបានប្រមូលផ្តុំកម្លាំងវាយបំបែករបបប្រល័យពូជសាស្ដ្រ ខ្មែរក្រហមសង្គ្រោះជីវិតរបស់ប្រជាពលរដ្ឋយើង ។ ដូច្នេះជាគុណសម្បត្តិដ៏ធំធេងណាស់របស់គណបក្សប្រជាជនកម្ពុជា» ។
លោកបន្ថែមថា ជាវប្បធម៌របស់ សម រង្ស៊ី ហើយដែលមិនគាំទ្រថ្ងៃ៧ មករា ប៉ុន្តែទោះបីជា គាត់រិះគន់យ៉ាងណាក្តី តែគាត់ភ្លេចថា គាត់ចូលមកធ្វើនយោបាយនៅក្នុងស្រុកខ្មែរ រហូតមកសព្វថ្ងៃនេះកុំតែមានថ្ងៃ៧ មករានោះទេ ។
លោកបញ្ជាក់ថា «គាត់ (សម រង្ស៊ី) មិនដែលសរសើរថ្ងៃ៧ មករា នោះទេ គាត់តែងតែមួលបង្កាច់ប្រវត្តិសាស្ត្រជាក់់ស្តែង ព្រោះថាយើងដឹងហើយថា ថ្ងៃ៧ មករា មិនអាចអ្នកណាលុបបំបាត់បាននោះទេ ។ គឺមានតែអ្នកប្រឆាំងទេដែលនិយាយខុសពីការពិត យើងមិនចាំបាច់ធ្វើអត្ថាធិប្បាយអ្វីនោះទេ ។ គាត់មានមុខមកលើទឹកដីខ្មែរ ដោយសារថ្ងៃ ៧ មករា» ។
ចំណែកលោក សម រង្ស៊ី បញ្ជាក់ថា «ឥឡូវនេះគេថា បើគ្មានថ្ងៃ៧ មករា ១៩៧៩ ក៏គ្មានអ្វីៗដែលយើងមានសព្វថ្ងៃដែរ ។ តែបើគ្មានថ្ងៃ ១៧ មេសា ១៩៧៥ (គឺថ្ងៃដែលខ្មែរក្រហមឡើងកាន់អំណាច) ក៏គ្មានថ្ងៃ ៧ មករា ១៩៧៩ ដែរ ។ ហើយបើគ្មានពួកយួនកម្មុយនីស្ដ ជួយពួកខ្មែរក្រហមនៅដើមទសវត្សរ៍ឆ្នាំ១៩៧០ ក៏គ្មានថ្ងៃ ១៧ មេសា ១៩៧៥ ដែរ ។ ដូច្នេះមួយផ្នែកធំនៃរឿងរ៉ាវទាំងអស់ ក្នុងរយៈពេលជិត៥០ឆ្នាំកន្លងមកនេះ គឺមានការរៀបចំយ៉ាងសកម្មដោយយួនកម្មុយនីស្ដ ដើម្បីលេបត្របាក់ទឹកដីយើង និងបំភ័ន្ដភ្នែកប្រជារាស្ដ្រខ្មែរ» ។
ជាមួយគ្នានោះដែរលោក លោក សម រង្ស៊ី បន្ថែមថា «យើងត្រូវចងចាំជានិច្ចថា យួនបង្កប់ បានញុះញង់ឲ្យខ្មែរកាប់សម្លាប់ខ្មែរគ្នាឯងក្រោមរបបខ្មែរក្រហម (១៩៧៥-១៩៧៩) ។ មកដល់ពេលនេះទៀត (ឆ្នាំ២០១៧) ពួកអ្នកបម្រើផលប្រយោជន៍បរទេសឈ្លានពាន ក៏នៅតែធ្វើបាបនិងរករឿងខ្មែរគ្នាឯង ឥតឈប់ឈរ (រហូតដល់លួចសម្លាប់ ឬតាមចាប់ដាក់គុកអ្នកស្នេហាជាតិ) ដើម្បីធ្វើឲ្យប្រទេសជាតិយើងបែកបាក់ ហើយកាន់តែទន់ខ្សោយ ក្នុងគោលបំណងរក្សាអាណានិគមនិយមប្រទេសវៀតណាម មកលើប្រទេសកម្ពុជា និងរក្សាអំណាចពួកជនក្បត់ជាតិ ។
គួរបញ្ជាក់ថា នៅក្នុងខួបលើកទី៣៨ នៃទិវាជ័យជម្នះ ៧មករា សម្តេចតេជោ ហ៊ុន សែន បានប្រកាសថា ៧ មករា ឆ្នាំ១៩៧៩ ជាថ្ងៃដែលប្រជាពលរដ្ឋកម្ពុជា ត្រូវបានរំដោះឱ្យរួចផុតពីរបបប្រល័យពូជសាសន៍ដ៏យង់ឃ្នង ប៉ុល ពត។ ការរំដោះនេះត្រូវបានធ្វើឡើងដោយកម្លាំងរណសិរ្យសាមគ្គីសង្គ្រោះជាតិកម្ពុជា (គណបក្សប្រជាជនកម្ពុជា) ដោយមានការឧបត្ថម្ភគាំទ្រដោយកងទ័ពស្ម័គ្រចិត្តរបស់វៀតណាម ។ សម្តេចថ្លែងថា នេះគឺជាសច្ចធម៌ប្រវត្តិសាស្ត្រ ដែលគ្មាននរណាអាចបំភ្លៃបាន ។
សម្តេចបញ្ជាក់ថា «ជ័យជម្នះ ៧មករា បានសង្គ្រោះជីវិតប្រជាជនដែលនៅសេសសល់បានទាន់ពេលវេលា បានដណ្តើមវិញនូវសិទ្ធិសេរីភាពគ្រប់យ៉ាងជូនប្រជាជន បានធ្វើឱ្យតម្លៃទាំងខាងស្មារតី និងសម្ភាររបស់ប្រជាជាតិខ្មែរ ដែលត្រូវបានកសាងពូនផ្តុំរាប់ពាន់ឆ្នាំមកហើយនោះ បានរស់ឡើងវិញ និងបានរួមវិភាគទាន ដ៏សកម្មដល់សន្តិភាព និងសន្តិសុខក្នុងតំបន់ ។ នេះជាសច្ចធម៌ប្រវត្តិសាស្ត្រ ដែលគ្មានកម្លាំងណាអាចមកបំភ្លៃ បំផ្លើសបំភ្លេច និងបំផ្លាញបានឡើយ» ៕
ចែករំលែកព័តមាននេះ