ពិធីប្រកួតបញ្ជល់គោថ្នាក់ជាតិប្រចាំឆ្នាំប្រព្រឹត្តទៅនៅកីឡដ្ឋានក្រុង Cheongdo ភាគខាងត្បូងប្រទេសកូរ៉េខាងត្បូង ។ ពិធីនេះធ្វើនៅខែមីនា ឬមេសារៀងរាល់ឆ្នាំ ។ លោក Lee Seung-yool អភិបាលក្រុង Cheongdo និយាយ
ពិធីប្រកួតបញ្ជល់គោថ្នាក់ជាតិប្រចាំឆ្នាំប្រព្រឹត្តទៅនៅកីឡដ្ឋានក្រុង Cheongdo ភាគខាងត្បូងប្រទេសកូរ៉េខាងត្បូង ។ ពិធីនេះធ្វើនៅខែមីនា ឬមេសារៀងរាល់ឆ្នាំ ។ លោក Lee Seung-yool អភិបាលក្រុង Cheongdo និយាយនៅពេលបើកការប្រកួតបញ្ជល់គោថា «នៅអេស្ប៉ាញ គេប្រកួតប្រយុទ្ធបង្ហូរឈាមរវាងមនុស្ស និងសត្វគោដែលចុងក្រោយសត្វគោតែងត្រូវសម្លាប់ ។ ប៉ុន្តែនៅកូរ៉េខាងត្បូងផ្សេងពីនោះ ពួកខ្ញុំមានមោទនភាពដោយរៀងរាល់ឆ្នាំគ្មានគោសូម្បីមួយក្បាលត្រូវសម្លាប់ឡើយ ។ បញ្ជល់គោនៅប្រទេសខ្ញុំ គឺទុកឱ្យគោ និងគោជល់គ្នា គោណារត់ បានសេចក្តីថាគោនោះចាញ់» ។
ក្រុង Cheongdo នៅឃ្លាតពីក្រុង Daegu ប្រមាណ៤០គីឡូម៉ែត្រ ។ តាំងពីឆ្នាំ១៩៩៩ គេយកទីប្រជុំជននេះធ្វើជាកន្លែងប្រកួតបញ្ជល់់គោប្រចាំប្រទេសសំដៅស្តារប្រពៃណីកម្សាន្តសប្បាយដែលមានរាប់ពាន់ឆ្នាំមកហើយនេះកុំឱ្យបាត់បង់ផង ដើម្បីទាក់ទាញទេសចរបរទេសចូលមកកម្សាន្តក្នុងប្រទេសកូរ៉េផង ។ ពិធីប្រកួតបញ្ជល់គោជាប្រពៃណីរបស់កូរ៉េ ធ្លាប់ត្រូវជប៉ុនហាមមិនឱ្យធ្វើពេលជប៉ុនត្រួតត្រាកូរ៉េ ទាល់តែឆ្នាំ១៩៤៥ ទើបប្រជាជនកូរ៉េស្តារឡើងវិញបាន បន្ទាប់ពីជប៉ុនចាញ់សង្គ្រាមលោកលើកទីពីរ ។ ឆ្នាំ២០១៤ មានការអាក់ខានរៀបចំពិធីប្រកួតបញ្ជល់គោប្រចាំឆ្នាំម្តង ដើម្បីសម្តែងការគោរពវិញ្ញាណក្ខន្ធមនុស្សជាង៣០០នាក់ ដែលបានបាត់បង់ជីវិតដោយសារគ្រោះថ្នាក់លិចនាវាចម្លង Seowon ។
កីឡដ្ឋាន Cheongdo អាចផ្ទុកអ្នកទស្សនាបាន១០.០០០នាក់ ។ វាត្រូវបានកសាងឡើងក្នុងឆ្នាំ២០០២ សម្រាប់គោលដៅប្រកួតបញ្ជល់់គោថ្នាក់ជាតិតែប៉ុណ្ណោះ ។ រៀងរាល់ឆ្នាំគោជល់រាប់រយក្បាលមកពីគ្រប់តំបន់ប្រជែងគ្នាយកជ័យជម្នះនៅទីនេះ ។ គោជល់នៅកូរ៉េគេនិយមជ្រើសយកគោមានកធំមាំ ដងខ្លួនទាបល្មម ជើងក្រោយ ធំៗ ។ គោដែលបានទទួលការសម្រិតសម្រាំងរួច ម្ចាស់វាតែងបង្វឹកវាយ៉ាងតឹងតែង ពិសេសបង្វឹកឱ្យធន់ជាមួយការរត់បានយូរលើវាលស្មៅ និងបង្វឹកឱ្យជល់ដើមឈើ ធំៗជាដើម ។ ខុសពីកន្លែងឯទៀត នៅកីឡដ្ឋាន Cheongdo គេអនុញ្ញាតឱ្យអ្នកទស្សនាភ្នាល់គ្នាបានតាមចិត្ត ដោយកំណត់តម្លៃភ្នាល់ខ្ពស់បំផុតត្រឹម១០០.០០០វ៉ុន (ប្រហាក់ប្រហែល៩៥ដុល្លារអាមេរិក) ។ អ្នកទស្សនាម្នាក់ឈ្មោះ Park Ji-hun និយាយ ត្រង់ៗថា«តាំងពីរដ្ឋបើកឱ្យអ្នកទស្សនាអាចភ្នាល់គ្នាបានមក ឱ្យតែដល់ពេលប្រកួតបញ្ជល់គោថ្នាក់ជាតិ ម្តងៗខ្ញុំតែងនាំគ្រួសារមកទស្សនាមិនដែលខានទេ ព្រោះមកទីនេះមិនត្រឹមតែបានសប្បាយភ្នែកប៉ុណ្ណោះ ថែមទាំងបានសប្បាយភ្នាល់គ្នាទៀត ។ ការដាក់ប្រាក់ភ្នាល់គ្នាសប្បាយមែនទែន ឈ្នះក៏សប្បាយ ចាញ់ក៏សប្បាយ» ។
គេអាចមើលដឹងគោជល់ និងគោធម្មតាតាមរយៈចំណីដែលម្ចាស់វាផ្តល់ឱ្យវា ។ ចំណីសម្រាប់គោជល់ ក្រៅពីបន្លែធម្មតានៅមានថែមសាច់សត្វទៀត ដូចយ៉ាងសាច់ត្រី យាវហឺុ និងជួនកាលមានទាំងសាច់ពស់ ។ ជិតដល់ថ្ងៃប្រកួត គោជល់បានម្ចាស់បន្ថែមយិនសុិន និងថ្នាំប៉ូវកម្លាំងដាក់ក្នុងទឹកស៊ុបឱ្យផឹក ។ លុះដល់ថ្ងៃត្រូវប្រកួត គោជល់បានម្ចាស់ឱ្យផឹកស្រា Soju ប្រពៃណីកូរ៉េ ។ សរុបមកអ្នកចិញ្ចឹមគោជល់ចំណាយប្រាក់ កម្លាំង ព្រមទាំងពេលវេលាច្រើនណាស់ ។ គោណាក្លាយជាជើងឯកក្នុងការបញ្ជល់់ថ្នាក់ជាតិប្រចាំឆ្នាំបានទទួលប្រាក់រង្វាន់១០លានវ៉ុន (ជាង៦.០០០ដុល្លារអាមេរិក) ។ ប្រាក់ប៉ុណ្ណោះមិនស្មើនឹងការចំណាយលើការចិញ្ចឹមបំប៉នវាផងទេ ប៉ុន្តែម្ចាស់វាដោយជំពាក់ចិត្តនឹងភាពអ៊ូអរ ភាពពុះកញ្ជ្រោលប្រកួត ម្តងៗនៅតែខំបំប៉នគោជល់របស់ខ្លួន ដើម្បីចូលរួមប្រកួតទៀត អត់ដាច់ចិត្តឈប់ត្រឹមប៉ុណ្ណឹងសោះ ។
គោជល់ នីមួយៗពេលដើរចូលកីឡដ្ឋានប្រកួត គេសរសេរឈ្មោះវានៅលើខ្លួនវា ហើយស្រេច ខ្លះឈ្មោះខ្លាហោះ ខ្លះឈ្មោះ០០៧ ខ្លះឈ្មោះនាគកូម៉ូដូ ជាដើម ។ ម្ចាស់គោមានសិទ្ធិចូលកីឡដ្ឋាន ដើម្បីលើកកម្លាំងចិត្តគោរបស់ខ្លួន តែមិនអាចបញ្ជាការប្រកួតបានឡើយ មានអាជ្ញាកណ្តាលជាអ្នកបញ្ជាការប្រកួតនៅក្នុងនោះ ។ អាជ្ញាកណ្តាលមានច្រើននាក់ តែស្លៀកពាក់ ដូចៗគ្នា គឺពាក់អាវខៀវ ពាក់ស្រោមដៃពណ៌ស និងពាក់មួកដូចមួកខាវប៊យ ។
ពីមុនរាល់លើកប្រកួតបញ្ជល់់គោ ម្តងៗបរិយាកាសពុះកញ្ជ្រោលខ្លាំងណាស់ ។ ប៉ុន្តែក្រោយមកដោយមានកីឡាអន្តរជាតិជាច្រើនដូចយ៉ាងបាល់ទាត់ បាល់បោះ បាល់ទះ ជាដើម ស្រូបយកចំណូលចិត្តមហាជនខ្លាំងពេក នាំដល់ចំណូលចិត្តកីឡាបញ្ជល់គោតាមប្រពៃណីធ្លាក់ចុះ។ ស្ថិតចំពោះមុខសភាពការណ៍នេះរដ្ឋាភិបាលកូរ៉េដាក់ចេញនូវវិធានការថ្មី សម្រាប់ទាក់ទាញបរិយាកាសពីដើមមកវិញ ដើម្បីអូសទាញអ្នកចូលរួមឱ្យបានច្រើន នោះគឺអនុញ្ញាតឱ្យមានការលេងភ្នាល់ក្នុងបរិវេណកីឡដ្ឋានប្រកួតបញ្ជល់់គោតែម្តង ។ គេសង្កេតឃើញនៅក្នុងរយៈពេលប៉ុន្មានឆ្នាំចុងក្រោយនេះ តាំងពីមានការអនុញ្ញាតឱ្យលេងភ្នាល់គ្នាមក រាល់ពេលប្រកួតបញ្ជល់់គោថ្នាក់ជាតិប្រចាំឆ្នាំ ម្តងៗអ្នកទស្សនាពពាក់ពពូនខ្លាំងជាងពីដើមទៀតផង ៕
ចែករំលែកព័តមាននេះ