ខេត្តបន្ទាយមានជ័យ ៖ លោក ឌិន ធីរិទ្ធ ប្អូនប្រុសបង្កើតលោក ឌិន ពុទ្ធី បានព្រមានថា សាច់ញាតិ និងអ្នកគាំទ្រនឹងដាក់ពាក្យស្នើសុំទៅអាជ្ញាធរខេត្ត ដើម្បីធ្វើការតវ៉ាជាទ្រង់ទ្រាយធំរកយុត្តិធម៌ នៅច្រកទ្វារអន្តរជាតិប៉ោយប៉ែត យ៉ាងយូរនៅថ្ងៃទី១៧ មករា ខាងមុខ ប្រសិនបើតុលាការមិនផ្ដល់យុត្តិធម៌ ដើម្បីឲ្យបងប្រុសរបស់លោកមានសេរីភាពឡើងវិញទេ ។
ការព្រមានតវ៉ាបែបនេះ បន្ទាប់ពីសាលាដំបូងខេត្តបន្ទាយមានជ័យ បានកោះហៅសាក្សីចំនួន០៣នាក់ ឲ្យចូលបំភ្លឺនៅព្រឹកថ្ងៃទី១០ មករា ស្អែកនេះ ក្រោយពីសាក្សីចំនួន៣នាក់បានដាក់ពាក្យស្នើទៅសាលាដំបូងខេត្ត កាលពីថ្ងៃទី២ មករា កន្លងទៅ ដើម្បីទៅបំភ្លឺដោះបន្ទុកពីការចោទប្រកាន់មកលើលោក ឌិន ពុទ្ធី ។
គួររំលឹកថា ការតវ៉ាដំបូងកាលពីព្រឹកថ្ងៃទី២៩ ធ្នូ ២០១៦ គេឃើញមានមនុស្សមិនដល់២០នាក់ទេ ហើយសមត្ថកិច្ចជំនាញពាក់ព័ន្ធបាននាំគ្នារុញច្រានឪ្យទៅធ្វើលើចិញ្ចើមផ្លូវមុខអតីតក្លោងទ្វារកាស៊ីណូហ្គោលដឹនក្រោន នៅខាងកើតខ្លោងទ្វារប្រាសាទកំពូល៣ច្រកទ្វារព្រំដែនប្រហែន៧០ម៉ែត្រ ។ ក្រោយមកចំនួនអ្នកចូលរួមក៏កាន់តែមានចំនួនច្រើនឡើងៗដល់រាប់រយនាក់ និងស្រែកទាមទាររកយុត្តិធម៌យ៉ាងកងរំពង ។ មិនតែប៉ុណ្ណោះក្រុមអ្នកតវ៉ាបានព្យាយាមសម្រុកទៅធ្វើការតវ៉ានៅលើស្ពានព្រំដែនម្តងហើយម្តងទៀត ទើបសមត្ថកិច្ចបន្ថែមកម្លាំងជាច្រើននាក់ មានទាំងនគរបាលការពារព្រំដែនគោកខាងជើង និងខាងត្បូងផ្លូវជាតិលេខ៥ (វរ៨៩១និង៩១១) ដើម្បីទប់ស្កាត់រុញច្រានមិនឪ្យក្រុមអ្នកតវ៉ាបិទស្ពានព្រំដែន ព្រោះអាចធ្វើឪ្យប៉ះពាល់ដល់ទំនិញសេដ្ឋកិច្ចពាណិជ្ជកម្មនិងភ្ញៀវទេសចរណ៍បរទេសដែលធ្វើដំណើរឆ្លងកាត់ ។
សូមបញ្ជាក់ថា លោក ឌិន ពុទ្ធី ជាប្រធានសមាគមពង្រឹងសេដ្ឋកិច្ចក្រៅប្រព័ន្ធហៅកាត់ថា CIERA មានទីស្នាក់ការ និងលំនៅឋាននៅភូមិសាមគ្គីមានជ័យ សង្កាត់ប៉ោយប៉ែត ។ ប្រធានសមាគមរូបនេះ រងការចោទប្រកាន់ថា បានបើករថយន្តបុកលោកវរសេនីយ៍ត្រី ឈាន ពិសិដ្ឋ នាយរងប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត កាលពីព្រឹកថ្ងៃទី២២ ធ្នូ កន្លងទៅនេះ ដែលករណីខាងលើ បានធ្វើឪ្យមជ្ឈដ្ឋានមួយចំនួនយកទៅបង្ហោះក្នុងបណ្តាញសង្គមហ្វ៊េសប៊ុកចោទថា នាយរងប៉ុស្តិ៍រូបនោះធ្វើពុតជាដួលគួរឱ្យហួសចិត្ត ខណៈហ្វេសប៊ុកមួយចំនួនទៀតបង្ហោះថា លោក ឈាន ពិសិដ្ឋ រងរបួសធ្ងន់ និងកំពុងសម្រាកព្យាបាលនៅឯមន្ទីរពេទ្យប្រទេសថៃ ៕
ចែករំលែកព័តមាននេះ