រាជធានីភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា មានប្រសាសន៍ថា គណបក្សប្រជាជនកម្ពុជា បន្ដអនុវត្ដយ៉ាងស្មោះសរនូវវប្បធម៌សន្ទនាជាមួយគណបក្សដែលមានអាសនៈក្នុងរដ្ឋសភា និងព្រឹទ្ធសភា តាមគោលការណ៍នៃលទ្ធិប្រជាធិបតេយ្យសេរី ពហុបក្ស និងនីតិរដ្ឋ ។
ការមិនស្មោះត្រង់ ការប្រើពាក្យសម្ដីអសុរោះវាយប្រហារគ្នា និងការញុះញង់បង្កឱ្យមានការគុំកួន ចងកំហឹងនឹងគ្នា គឺមិនអាចរក្សាអាយុជីវិតនៃវប្បធម៌សន្ទនាបានឡើយ មិនតែប៉ុណ្ណោះវានឹងបំផ្លាញនូវឯកភាពជាតិរបស់យើង ។
សម្ដេចតេជោ ប្រធានគណបក្សប្រជាជនកម្ពុជា មានប្រសាសន៍់បែបនេះនាព្រឹកថ្ងៃទី៧ ខែមករា ឆ្នាំ២០១៧ ក្នុងឱកាសដែលគណបក្សប្រជាជនកម្ពុជា ប្រារព្ធមីទ្ទិញរំឭកខួបលើកទី៣៨នៃទិវាជ័យជម្នះ៧ មករា (៧មករា១៩៧៩-៧មករា២០១៧) នៅទីស្នាក់ការកណ្តាលគណៈកម្មាធិការកណ្ដាលគណបក្សប្រជាជនកម្ពុជា ។
មីទ្ទិញរំឭកខួបលើកទី៣៨នៃទិវាជ័យជម្នះ ៧ មករា បានប្រារព្ធធ្វើក្រោមអធិបតីភាពសម្ដេចអគ្គមហាពញាចក្រី ហេង សំរិន ប្រធានកិត្ដិយសគណបក្សប្រជាជនកម្ពុជា សម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា ព្រមទាំងសមាជិក សមាជិកាគណបក្សប្រជាជនកម្ពុជា គណបក្សជាសម្ព័ន្ធភាពនានា ឥស្សរជន មន្ដ្រីរាជការ ប្រជាពលរដ្ឋ លោកគ្រូអ្នកគ្រួ សិស្សានុសិស្ស និស្សិត បងប្អូនខ្មែរអ៊ិស្លាម ភ្ញៀវជាតិ-អន្ដរជាតិ និងអ្នកសង្កេតការណ៍នានាយ៉ាងច្រើនកុះករ ។
ក្នុងសុន្ទរកថា សម្ដេចតេជោ ប្រធានគណបក្សប្រជាជនកម្ពុជា បានថ្លែងថា គណបក្សយកចិត្ដទុកដាក់បង្កើនកិច្ចសហប្រតិបត្ដិការជាមួយបណ្ដាគណបក្សនយោបាយ សមាគម អង្គការមិនមែនរដ្ឋាភិបាល និងមជ្ឈដ្ឋានផ្សេងៗទៀតក្នុងសង្គម ដើម្បីថែរក្សានិងពង្រីករាល់សមិទ្ធផលនៃសង្គមជាតិ រួមគ្នាដោះស្រាយសេចក្ដីត្រូវការរបស់ប្រជាជន ពង្រឹងបរិយាកាសសុខក្សេមក្សាន្ដក្នុងសង្គម រួមទាំងបរិយាកាសនយោបាយ សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ នាពេលខាងមុខនេះ ឱ្យបានល្អ ដែលជាកត្ដាសំខាន់ចាំបាច់ដើម្បីធានានូវការបោះឆ្នោតនេះប្រព្រឹត្ដទៅដោយសេរី និងយុត្ដិធម៌ ដោយគោរពអនុវត្ដយ៉ាងម៉ឹងម៉ាត់តាមច្បាប់ បទបញ្ជា និងក្រមសីលធម៌ សម្រាប់ការបោះឆ្នោត ។
ឆ្លងកាត់រយៈពេល៣៨ឆ្នាំមកនេះ ផ្តើមពីជ័យជម្នះ ៧មករា ប្រទេសកម្ពុជាបាននិងកំពុងឈានទៅមុខតាមទិសដៅដ៏ត្រឹមត្រូវស្របតាមបំណងប្រាថ្នាដ៏ពិសិដ្ឋរបស់ប្រជាជន និងដើរស្របជាមួយនិន្នាការរួមក្នុងតំបន់ ក៏ដូចពិភពលោកទោះបីត្រូវជួបនឹងភាពបត់បែនយ៉ាងច្រើនក្តី ៖
-កម្ពុជាពីមុនដែលជាវាលពិឃាត ជាតំបន់អសន្តិសុខ ជាចម្ការមីន ឥឡូវបានក្លាយទៅជាទឹកដីសន្តិភាព និងជាតំបន់ទេសចរណ៍មួយ
ប្រកបដោយប្រជាប្រិយភាពក្នុងតំបន់អាស៊ីអាគ្នេយ៍ ដែលទទួលបានភ្ញៀវទេសចររាប់លាននាក់ក្នុងមួយឆ្នាំៗ ។
-កម្ពុជាពីមុន ដែលតែងតែប្រើអាវុធដើម្បីដណ្តើមអំណាចគ្នា ឥឡូវបានក្លាយទៅជាប្រទេសមួយដែលគោរពខ្ជាប់ខ្ជួននូវគោលការណ៍
នៃលទ្ធិប្រជាធិបតេយ្យសេរីពហុបក្ស តាមរយៈការរៀបចំយ៉ាងទៀងទាត់នូវការបោះឆ្នោតដោយសេរី ត្រឹមត្រូវ និងយុត្តិធម៌ ដើម្បីឱ្យប្រជាពលរដ្ឋជ្រើសរើស និងជ្រើសតាំងតំណាងដឹកនាំប្រទេស ជានីតិរដ្ឋដែលគោរពគោលការណ៍ច្បាប់ដោយឥតងាករេ និងជារដ្ឋអធិបតេយ្យដែលមានបូរណភាពទឹកដីពេញលេញ ហើយគោរពលើកតម្កើងសិទ្ធិ និងសេចក្តីថ្លៃថ្នូររបស់មនុស្ស ។
-កម្ពុជាពីមុន ដែលជាប្រទេសត្រូវទទួលរងការហ៊ុមព័ទ្ធ និងឯកោទាំងខាងសេដ្ឋកិច្ច និងនយោបាយ ឥឡូវនេះបានក្លាយទៅជាប្រទេសមួយដែលកំពុងសមាហរណកម្មខ្លួនយ៉ាងសកម្មទៅក្នុងរចនាសម្ព័ន្ធ និងនិម្មាបនកម្មតំបន់ និងពិភពលោក ហើយកំពុងបំពេញតួនាទីយ៉ាងសកម្មដោយស្មើសិទ្ធិ និងស្មើភាពក្នុងគ្រប់កិច្ចការតំបន់ និងនៅលើឆាកអន្តរជាតិ ។
-កម្ពុជាពីមុន ដែលជាប្រទេសអន់ខ្សោយខាងសេដ្ឋកិច្ច និងគ្របដណ្តប់ដោយភាពក្រីក្រមានអសន្តិសុខស្បៀង ឥឡូវនេះបានក្លាយទៅជាប្រទេសនាំស្បៀងចេញ ហើយស្ថិតនៅចំណាត់ថ្នាក់នៃប្រទេសដែលសម្រេចបានកំណើនសេដ្ឋកិច្ចខ្ពស់ប្រកបដោយចីរភាព ក្នុងអត្រាជាមធ្យម៧,៧%ក្នុងមួយឆ្នាំ ក្នុងរយៈពេលពីរទស្សវត្សរ៍
ចុងក្រោយនេះ ព្រមទាំងសម្រេចបាននូវវឌ្ឍនភាពដ៏ល្អប្រសើរក្នុងការកាត់បន្ថយភាពក្រីក្រក៏ដូចការកែលម្អសូចនាករសង្គមសំខាន់ៗ ។
ទាំងអស់នេះគឺជាការផ្លាស់ប្តូរដ៏ធំធេងជាប្រវត្តិសាស្ត្រ ដែលកើតចេញពីការដឹកនាំដ៏ត្រឹមត្រូវខាងនយោបាយប្រកបដោយឆន្ទៈប្តូរផ្តាច់ ការចូលរួមដ៏សកម្មរបស់ប្រជាជនគ្រប់ៗរូបក្នុងការអនុវត្តនូវសិទ្ធិ និងកាតព្វកិច្ចរបស់ខ្លួនដែលបង្កើតជាកម្លាំងមហាសាមគ្គី ដើម្បីកសាងនិងការពារមាតុភូមិ ការលះបង់អស់ពីកម្លាំងកាយកម្លាំងចិត្តរបស់មន្ត្រីគ្រប់លំដាប់ថ្នាក់ និងកងកម្លាំងប្រដាប់អាវុធគ្រប់ប្រភេទក្នុងការបម្រើជាតិនិងប្រជាជន ការធ្វើសហប្រតិបត្តិការរវាងចរន្តនយោបាយនានា និងពីគ្រប់មជ្ឈដ្ឋានផ្សេងៗទៀតក្នុងសង្គម ដោយឈរលើឧត្តមប្រយោជន៍ជាតិ និងតាមគោលការណ៍នៃលទ្ធិប្រជាធិបតេយ្យសេរី ពហុបក្ស ព្រមទាំងការជួយឧបត្ថម្ភដ៏ស្មោះសរពីសំណាក់បណ្តាប្រទេសជាមិត្តជិតឆ្ងាយ និងសហគមន៍អន្តរជាតិ ។ នេះជាកត្តាធំៗនៃជ័យជម្នះ និងជាមេរៀនពិសោធន៍ជាប្រវិត្តសាស្ត្រដែលយើងទាំងអស់គ្នាគប្បីយល់ដឹងឱ្យច្បាស់ និងចងចាំជារៀងដរាប ដើម្បីកុំឱ្យប្រវត្តិសាស្ត្រដ៏ជូរចត់អាចកើតឡើងជាថ្មីវិញបាននៅលើមាតុភូមិយើង ។
៣៨ឆ្នាំកន្លងមកនេះ គឺ៣៨ឆ្នាំនៃសាមគ្គីភាព វីរភាព និងជ័យជម្នះ ។ ដោយប្រកាន់ខ្ជាប់នូវស្មារតី៧មករា និងផ្អែកលើបណ្តាសមិទ្ធផលដ៏វិសេសវិសាលដែលយើងសម្រេចបានកន្លងមក យើងទាំងអស់គ្នានឹងបន្តធ្វើដំណើរទៅមុខទៀតប្រកបដោយក្តីសង្ឃឹម និងភាពជឿជាក់ចំពោះអនាគតដ៏រុងរឿងរបស់មាតុភូមិ និងប្រជាជាតិយើង ។ យើងបានពុះពារឆ្លងកាត់រួចមកហើយនូវឧបសគ្គធំៗគ្រប់បែបយ៉ាង គ្មានឧបសគ្គណាដែលធំលើសពីនេះទៀតទេ ហើយយើងក៏បានឃើញនូវកម្លាំងដ៏ធំធេងរបស់ប្រជាជាតិយើងដើម្បីធ្វើម្ចាស់លើជោគវាសនារបស់ខ្លួនផងដែរ ។
គណបក្សប្រជាជនកម្ពុជា ការពារដាច់ខាតឯករាជ្យ អធិបតេយ្យ និងបូរណភាពទឹកដីនៃព្រះរាជាណាចក្រកម្ពុជា ការពាររដ្ឋធម្មនុញ្ញ របបរាជានិយម និងរាល់សមិទ្ធផលរបស់សង្គមជាតិ ជាពិសេសថែរក្សាសន្តិភាព ស្ថិរភាពនយោបាយ សន្តិសុខ និងសណ្តាប់ធ្នាប់សាធារណៈឱ្យបានរឹងមាំឥតរង្គោះរង្គើ ដែលជាកត្តាសារវន្ត ដើម្បីធានាដល់ដំណើរការរីកចម្រើននៃលទ្ធិប្រជាធិបតេយ្យ និងសិទ្ធិមនុស្ស ធានាការអភិវឌ្ឍប្រកបដោយចីរភាព និងសមធម៌ និងធានានូវជីវភាពរស់នៅដ៏សុខសាន្តរបស់ប្រជាជន ។
យើងប្រឆាំងនឹងសកម្មភាពណាមួយពីខាងក្រៅ ដែលព្យាយាមដាក់ការគាបសង្កត់មកលើរាជរដ្ឋាភិបាលកម្ពុជាឱ្យធ្វើតាមឆន្ទៈរបស់ខ្លួននៅក្រោមហេតុផលប្រជាធិបតេយ្យ និងសិទ្ធិមនុស្ស ដែលជាការជ្រៀតជ្រែកមកលើដែនសមត្ថកិច្ចរបស់រដ្ឋអធិបតេយ្យមួយ បំពានលើគោលការណ៍ជាសាកល ។ កម្ពុជាមិនអាចទទួលយកការគាបសង្កត់ ឬការជ្រៀតជ្រែកណាមួយបានឡើយ ជាពិសេសការប៉ុនប៉ងពីខាងក្រៅដើម្បីធ្វើឱ្យមានការផ្លាស់ប្តូរតាមរយៈបដិវត្តន៍ពណ៌ ផ្ទុយពីគោលការណ៍នៃលទ្ធិប្រជាធិបតេយ្យ និងនីតិរដ្ឋ ដែលការប៉ុនប៉ងបែបនេះ បាននិងកំពុងបង្កនូវជម្លោះផ្ទៃក្នុង អស្ថិរភាព អសន្តិសុខ សង្គ្រាម ទុក្ខវេទនា ការរត់ភៀសខ្លួន និងការបាត់បង់ជីវិតប្រជាជនស្លូតត្រង់រាប់សែននាក់យ៉ាងអយុត្តិធម៌បំផុតនៅក្នុងប្រទេសមួយចំនួនដែលរកទីបញ្ចប់មិនឃើញ ។
គណបក្សប្រជាជនកម្ពុជា ជំរុញការអនុវត្តនូវយុទ្ធនាការ ដើម្បីប្រយុទ្ធនិងបង្ក្រាបចោរកម្ម ឃាតកម្ម ការប្លន់់ប្រដាប់អាវុធ គ្រឿងញៀន ការកាប់ឈើខុសច្បាប់ ការទន្ទ្រានយកដីធ្លីខុសច្បាប់ បទល្មើសនេសាទខុសច្បាប់ អាជីវ
កម្មរ៉ែខុសច្បាប់ អាជីវកម្មខ្សាច់ខុសច្បាប់ និងការដាក់កុងត្រូលយកលុយខុសច្បាប់ ។ ជនដែលប្រព្រឹត្តល្មើសត្រូវតែទទួលទោសតាមច្បាប់ ។
យើងបន្តជំរុញការអនុវត្តកំណែទម្រង់រដ្ឋដ៏ស៊ីជម្រៅលើគ្រប់វិស័យ និងការប្រឆាំងអំពើពុករលួយដោយឆន្ទៈមោះមុត ក្នុងនោះរួមទាំងកំណែទម្រង់វិមជ្ឈការ និងវិសហមជ្ឈការ សំដៅបង្កើនការផ្ទេរមុខងារនិងធនធានទៅឱ្យរដ្ឋបាលថ្នាក់ក្រោមជាតិ ជាពិសេសនៅថ្នាក់ឃុំ-សង្កាត់ និងក្រុង ស្រុក ខណ្ឌ ដើម្បីបង្ខិតការផ្តល់សេវាសាធារណៈ និងការអភិវឌ្ឍមូលដ្ឋានឱ្យកាន់តែកៀកនឹងប្រជាជន និងកាន់តែឆ្លើយតបតម្រូវការរបស់ប្រជាជន ៕
ចែករំលែកព័តមាននេះ