សារព័ត៌មានបរទេសកាលពីពេល ថ្មីៗកន្លងមកផ្សាយថាវិទ្យាស្ថានជីវប្រវត្តិចម្រុះសម័យក្រុងមុយនិក (IFC) បានឱ្យដឹងថា សៀវភៅមានចំណងជើងថា«Mein Kampf» ឬ«ការតស៊ូរបស់ខ្ញុំ់»និពន្ធដោយអាដុល អីុទ្លែរ មេដឹកនាំបក្សណាហ្ស៊ី និងជាកំពូលមេផ្តាច់ការអាល្លឺម៉ង់ក្នុងយុគសម័យសង្គ្រាមលោកលើកទី២ ជាច្បាប់រៀបរៀងថ្មីចែកចេញជា២ភាគ ។ សៀវភៅនោះមានកំណត់ហេតុបន្ថែម ហេតុផល និងការវិភាគក្នុងន័យសម្របសម្រួលប្រហែល៣.៥០០ពាក្យចេញលក់ នៅទូទាំងប្រទេសដល់ទៅ៨៥.០០០ក្បាលឯណោះក្រោយពីចេញលក់នៅខែមករា ឆ្នាំ២០១៦ បង្កើតឯតទគ្គកម្មលក់ដាច់បំផុត ។
កាលដើមឡើយ IFC គឺជាអ្នកប្រកាន់សិទ្ធិលើសៀវភៅ«Mein Kampf»មានគម្រោងបោះពុម្ពសៀវភៅត្រឹមតែ៤.០០០ក្បាល ប៉ុន្តែលក់ដាច់លើសការរំពឹងទុក ។ ការបោះពុម្ពនៅលើកទី៦ គ្រោងដាក់លក់នៅចុងខែមករា ដោយសៀវភៅមួយឈុតមាន២ក្បាល សរុបមានប្រហែល២.០០០ ទំព័រ លក់មួយឈុតមានតម្លៃ៥៩អឺរ៉ូ និងគ្មានរូបថតរបស់លោកអុីទ្លែរនៅក្នុងសៀវភៅនោះទេ ។
«Mein Kampf»ជាសៀវភៅហាមឃាត់របស់អាល្លឺម៉ង់ ចាប់តាំងពីបញ្ចប់សង្គ្រាមលោកលើកទី២ ប៉ុន្តែចាប់ផ្តើមបោះពុម្ព និងលក់ឡើងវិញដោយសារសិទ្ធិរបស់រដ្ឋាភិបាលបានគ្រប់កាលកំណត់៧០ឆ្នាំនៃច្បាប់កម្មសិទ្ធិរបស់សហគមន៍អឺរ៉ុប (EU) ។
លោកអាដុល អីុទ្លែរ បានស្លាប់នៅថ្ងៃទី៣០ មេសា ១៩៤៦ ក្នុងអាយុ៥៦ឆ្នាំ នៅក្រុងប៊ែរឡាំង ជារយៈពេលនៃចុងសង្គ្រាមលោកលើកទី២ ហើយក្រោយមកក្រុមសម្ព័ន្ធមិត្តជាអ្នកឈ្នះបានប្រគល់សិទ្ធិ«Mein Kampf»ដល់រដ្ឋាភិបាលអាល្លឺម៉ង់ ៕
ចែករំលែកព័តមាននេះ