វាយក្បាលប្រពន្ធកូនខ្ចី8ខែស្លា.ប់ ធ្វើជាដឹកសពទៅសង្គ្រោះ
រាជធានីភ្នំពេញ ៖ ស្ត្រីម្នាក់ទើបសម្រាលកូនបានរយៈពេល៨ខែប៉ុណ្ណោះ ត្រូវបានបុរសជាប្ដីវាយក្បាលនឹងវែកសម្លបណ្ដាលឲ្យរងរបួសយ៉ាងធ្ងន់
រាជធានីភ្នំពេញ ៖ ស្ត្រីម្នាក់ទើបសម្រាលកូនបានរយៈពេល៨ខែប៉ុណ្ណោះ ត្រូវបានបុរសជាប្ដីវាយក្បាលនឹងវែកសម្លបណ្ដាលឲ្យរងរបួសយ៉ាងធ្ងន់ផ្ដើមចេញពីរឿងទំនាស់ជំពាក់លុយគេបន្តិចបន្តួចប៉ុណ្ណោះ ខណៈប្ដីផឹកស្រវឹងផងនោះ ព្រមទាំងចាប់បោចសក់នាងបោកក្បាលផ្ទប់ទៅនឹងញ្ជាំងផ្ទះ ។ បន្ទាប់ពីវាយដំរួចប្តីឃោរឃៅនោះមិនបាន
នាំយកប្រពន្ធទៅសង្គ្រោះនោះឡើយ គឺបានទុកនាងនៅផ្ទះមួយយប់ទាំងសន្លប់ស្ដូកស្ដឹង ។ មិនតែប៉ុណ្ណោះជននោះថែមទាំងបានប្រើល្បិច កោសខ្យល់ប្រពន្ធជាំពេញខ្លួន ជាអកុសល ក្រោយមកប្រពន្ធក៏ស្លាប់ ។ រីឯជននោះបានធ្វើជាបីសពប្រពន្ធនៅក្នុងរង្វង់ដៃរបស់ខ្លួន ដឹកបញ្ជូនតាមម៉ូតូរ៉ឺម៉ក១គ្រឿង ទៅកាន់មន្ទីរពេទ្យបង្អែកពោធិ៍ចិនតុង ធ្វើជានាំទៅដើម្បីសង្គ្រោះបន្ទាន់ ។
ល្បិចកលនេះក្នុងបំណងបង្វែងដាន និងបំភាន់ភ្នែកសមត្ថកិច្ចក្នុងបំណងបិទបាំងរាល់ទង្វើនិងសារជាតិជាឃាតកររបស់ខ្លួនតែប៉ុណ្ណោះ ។ ប៉ុន្តែពេលដឹកទៅដល់មន្ទីរពេទ្យ មិនទាន់ទាំងបានដាក់សពប្រពន្ធចុះពីម៉ូតូរ៉ឺម៉កផង ក្រុមគ្រូពេទ្យនៅទីនោះបានពិនិត្យឃើញថា ស្ត្រីជាប្រពន្ធបានស្លាប់បាត់ទៅហើយ ។ ចំណែកបុរសជាប្ដីប្រុងដឹកសពប្រពន្ធត្រឡប់ទៅផ្ទះវិញ ដោយបានអះអាងប្រាប់គ្រូពេទ្យថា ប្រពន្ធរបស់ខ្លួនទើបសម្រាលកូនបាន៨ខែ ដើរមិនប្រយ័ត្នក៏ដួលបោកក្បាលនៅក្នុងបន្ទប់ទឹកពេលយប់ ហើយខ្លួនសង្ស័យថានាងខ្យល់គរទើបកោសខ្យល់ឲ្យនាង ។
ការបកស្រាយនេះ គ្រូពេទ្យមិនបានជឿទេ ព្រោះឃើញក្បាលស្ត្រីជាប្រពន្ធ មានស្នាមប៉ោងច្រើនកន្លែងគួរឲ្យសង្ស័យ និងបានឃាត់មិនឲ្យដឹកសពចេញឡើយ ។ បន្ទាប់មកក្រុមគ្រូពេទ្យ បានរាយការណ៍ដល់កម្លាំងនគរបាលឲ្យបានដឹងនិងចុះទៅពិនិត្យភ្លាមៗផងដែរ ។
ហេតុការណ៍នោះ បានកើតឡើងកាលពីវេលាម៉ោង១១យប់ថ្ងៃទី៥ មករា ប៉ុន្តែបានបង្កឲ្យមានការភ្ញាក់ផ្អើលនៅវេលាម៉ោង១០និង១៥នាទីព្រឹកថ្ងៃទី៦ មករា ក្រោយពេលដែលជននោះ ដឹកសពប្រពន្ធទៅសង្គ្រោះនៅមន្ទីរពេទ្យបង្អែកពោធិ៍ចិនតុង ។
ស្ត្រីដែលស្លាប់ឈ្មោះ ខេន ស្រីខួច អាយុ២៧ឆ្នាំ មានស្រុកកំណើតនៅភូមិប្រាសាទ ឃុំភ្នំសន្ទុក ស្រុកសន្ទុក ខេត្តកំពង់ធំ ។ ដោយឡែកបុរសជាប្តីឈ្មោះ ស អឿន អាយុ៣៨ឆ្នាំ ជាអ្នករត់ម៉ូតូឌុប មានស្រុកកំណើត នៅក្នុងភូមិកំពង់ក្តី ឃុំកំពង់រាប ស្រុកកោះសូទិន ខេត្តកំពង់ចាម ។ អ្នកទាំងពីរ មានកូនប្រុស២នាក់ និងស្រីម្នាក់ ហើយសព្វថ្ងៃស្នាក់នៅផ្ទះជួលក្នុងភូមិចោមចៅ សង្កាត់ចោមចៅ ខណ្ឌពោធិ៍សែនជ័យ ។
ក្រោយទទួលបានព័ត៌មានកម្លាំងនគរបាលប៉ុស្ដិ៍កាកាប រួមជាមួយកម្លាំងនគរបាលប៉ុស្ដិ៍ចោមចៅ និងនគរបាលផ្នែកបច្ចេកទេសខណ្ឌពោធិ៍សែនជ័យ បានចុះទៅកាន់ទីនោះ ដើម្បីពិនិត្យមើលពីស្ថានភាពជាក់ស្ដែង រួចកម្លាំងនគរបាលបាននាំខ្លួនបុរសជាប្ដីទៅ ធ្វើការសាកសួរនៅប៉ុស្ដិ៍ចោមចៅ និងបាននាំយកសពស្ត្រីជាប្រពន្ធទៅកាន់វត្តពោធិចិនតុង ដើម្បីឲ្យនគរបាលការិយាល័យបច្ចេកទេស នៃស្នងការដ្ឋាន នគរបាលរាជធានី ធ្វើកោសល្យវិច័យ ព្រោះសង្ស័យថា ការស្លាប់នោះមានការពាក់ព័ន្ធនឹងការប្រើអំពើហិង្សាពីសំណាក់បុរសជាប្ដី ។
អ្វីដែលជាការភ្ញាក់ផ្អើលនោះ គឺបន្ទាប់ពីនគរបាលធ្វើការសាកសួរតាមជំនាញអស់រយៈពេលប្រមាណ៣ម៉ោងរួចមក ដោយមិនអាចលាក់លៀមបាន ជននោះបានសារភាពថា ខ្លួន ពិតជាបានវាយប្រពន្ធរបស់ខ្លួនពិតមែន គឺបានវាយក្បាលនឹងវែកសម្លចំនួន៣ទៅ៤វែក ព្រមទាំងចាប់បោចសក់បោកផ្ទប់នឹងជញ្ជាំងផ្ទះជួល ក្នុងពេលមានទំនាស់គ្នាកើតឡើង ។
ក្រោយពេលទទួលបានចម្លើយ សារភាពហើយនគរបាលបាននាំជននោះទៅកាន់ផ្ទះជួលដែលជាកន្លែងកើតហេតុនោះរកវត្ថុតាង និងឱ្យធ្វើត្រាប់ពីសកម្មភាពវាយប្រពន្ធរបស់ខ្លួនរហូតដល់ស្លាប់ ។ ជនជាឃាតករខាងលើ បាននិយាយប្រាប់នគរបាលថា ប្រពន្ធរបស់ខ្លួនទើបសម្រាលកូនទី៣ បានរយៈពេល៨ខែប៉ុណ្ណោះ ហើយខ្លួន និងប្រពន្ធមានភាពរកាំរកូសនឹងគ្នាអស់រយៈពេល១សប្តាហ៍កន្លងមកហើយ គឺមានទំនាស់គ្នាផ្ដើមចេញពីរឿងជំពាក់លុយគេនៅឯស្រុក ។
ដោយឡែកនៅវេលាម៉ោង១១យប់ថ្ងៃទី៥ ធ្នូ ខ្លួនផឹកស្រាស្រវឹង ក៏មានទំនាស់គ្នាជាមួយប្រពន្ធ រឿងជំពាក់លុយនោះជាថ្មីម្ដងទៀត ។ ទំនាស់នោះបានឈានដល់ការវាយតប់គ្នាទៅវិញទៅមក ទើបខ្លួនទាញបានវែកសម្លវាយទៅលើ និងចាប់សក់បោកក្បាលប្រពន្ធផ្ទប់ទៅនឹងជញ្ជាំងថ្ម ។ បណ្ដាលឲ្យដួលសន្លប់ស្ដូកស្ដឹង បាត់មាត់បាត់កឈឹងលែងដឹងខ្លួនរហូត ។ ខណៈនោះខ្លួនបានកោសខ្យល់ឲ្យរហូតដល់ព្រឹកឡើងថ្ងៃទី៦ មករា ប្រពន្ធនៅតែមិនដឹងខ្លួនទៀត ទើបខ្លួនដឹកទៅកាន់មន្ទីពហុព្យាបាលចោមចៅ ប៉ុន្តែពេលទៅដល់គ្រូពេទ្យបានប្រាប់ថា ប្រពន្ធបានស្លាប់ហើយ ។
ជននោះបានសារភាពបន្តទៀតថា ក្រោយមកខ្លួនបានដឹកនាងតាមម៉ូតូរ៉ឺម៉កទៅកាន់មន្ទីរពេទ្យបង្អែក ពោធិចិនតុងទៀត ដោយធ្វើជានាំទៅសង្គ្រោះ ដើម្បីបង្វែងដានសមត្ថកិច្ច តែពេលទៅដល់ ក្រុមគ្រូពេទ្យបានប្រាប់ថា ប្រពន្ធរបស់ខ្លួនស្លាប់ហើយ ។ ពេលខ្លួនប្រុងដឹកសពចេញក៏ត្រូវបានគ្រូពេទ្យឃាត់ និងរាយការណ៍ប្រាប់ឲ្យនគរបាលចុះទៅពិនិត្យ ទើបរឿងរ៉ាវទាំងអស់ត្រូវបែកធ្លាយ ។
ប្រការគួរឱ្យអាណោចអាធ័មនោះ គឺកូនៗទាំង៣ដែលពេលនេះត្រូវកំព្រាដោយសារម្តាយស្លាប់ និងឪពុកត្រូវជាប់គុក ។ អំពើហិង្សាក្នុងគ្រួសារមួយនេះពិតជាបានបន្សល់ទុកវិប្បដិសារីរហូតអស់១ជីវិតដោយចៀសមិនផុតឡើយ ៕
ចែករំលែកព័តមាននេះ