ខេត្តកំពង់ស្ពឺ ៖ សិក្ខាកាមជំនាញឆត្រយោងម្នាក់បានស្លាប់បាត់បង់ជីវិត ខណៈពេលលោតឆត្រពីលើឧទ្ធម្ភាគចក្រមក បានជួបបញ្ហាបច្ចេកទេសដោយឆត្រមិនតម្លោះដែលជាឧបទ្ទវហេតុដ៏កម្រ ។
ក្រោយកើតហេតុ មិនត្រូវបានអនុញ្ញតឱ្យថតឡើយ សូម្បីតែអត្តសញ្ញាណនៃសពក៏មិនត្រូវបានទំលាយឱ្យដឹងដែរ ។ ការភ្ញាក់ផ្អើលនេះកើតឡើងនៅវេលាម៉ោង៨និង៥០នាទីព្រឹកថ្ងៃទី៦ មករា នៅចំណុចភូមិក្តាន់រយ ឃុំសំបូរ ស្រុកសំរោងទង ។
ប្រភពពីប្រជាពលរដ្ឋដែលឈរមើលការលោតឆត្រយោងពីចម្ងាយបានឱ្យដឹងថា សិក្ខាកាមលោតឆត្រយោងទាំងអស់បានដើរឡើងលើឧទ្ធម្ភាគចក្រ ដោយម្នាក់ៗទឹកមុខអង់អាច និងស្វាហាប់បំផុតក្នុងនាមជាកងយោធពលខេមរភូមិន្ទ ។ បន្ទាប់មកឧទ្ធម្ភាគចក្របានហោះឡើងទៅលើអាកាសយ៉ាងខ្ពស់ត្រដែត ពេលនោះក្រុម Show លើកទី១បានលោតចុះមកមានគ្នាប្រមាណ៤ទៅ៥ឆត្រ គឺគេឃើញឆត្រផ្សេងៗ ទៀតបានតម្លោះទាំងអស់ ។
ដោយឡែកគេមើលពីក្រោមទៅឃើញឆត្រមួយក្នុង Show ជាមួយគ្នា គឺមិនបានតម្លោះនោះទេ បណ្តាលឱ្យសិក្ខាកាមម្នាក់នោះធ្លាក់ចុះក្រោមយ៉ាងលឿនស្លេវមកដល់ដី បាត់បង់ជីវិតភ្លាមមួយរំពេច ។
ក្រោយកើតហេតុខាងអង្គភាព៩១១មិនបានអនុញាតិឱ្យខាងជំនាញពិនិត្យឡើយ គឺបានលើកសពដាក់លើរថយន្តសង្គ្រោះរបស់អង្គភាពដឹកចេញភ្លាមៗតែម្តង ។
មិនអាចសុំការពន្យល់ពីមន្ត្រីយោធាជាន់ខ្ពស់នៃកងពលតូចទ័ពពិសេសឆត្រយោង៩១១បានទេ ថាតើពិតជាមានករណីបែបនេះកើតឡើងលើសិក្ខាកាមរបស់ខ្លួន ឬយ៉ាងណា ?
ដោយឡែកប្រភពពីមន្ត្រីកងរាជអាវុធហត្ថដែលយាមការពារគោលដៅកន្លែងលោតឆត្របានប្រាប់ថា ពិតជាមានករណីនេះកើតឡើងមែន ហើយខាងអង្គភាព៩១១បានដឹកសពចេញពីទីលានយ៉ាងប្រញាប់ប្រញាល់បំផុត ។ ប្រជាពលរដ្ឋដែលឈរមើលពីចម្ងាយ ពេលបានឃើញហេតុការណ៍ដ៏រន្ធត់ និងគួរឱ្យសង្វេគនេះ បានសំដែងនូវការចូលរួមសោកស្តាយចំពោះមរណភាពនេះ និងបានចាត់ទុកថា នេះជាការបំពេញកាតព្វកិច្ចជាកងទ័ពដ៏អង់អាចក្លាហានមួយ និងសូមវិញ្ញាណក្ខន្ធនាយទាហានរូបនេះទៅកាន់សុគតិភព ។
ខណៈដែលកើតមានហេតុការណ៍បែបនេះ ក៏មានការលើកឡើងថា មុនឈានមកដល់ឱ្យសិក្ខាកាមលោតគួរណាស់ធ្វើការត្រួតពិនិត្យបច្ចេកទេសឆត្រឱ្យបានល្អិតល្អន់ មុននឹងបំពាក់ឱ្យសិក្ខាកាមលោត ជៀសវាងជួបហេតុការណ៍អាក្រក់បែបនេះនៅវគ្គក្រោយៗទៀត ៕
ចែករំលែកព័តមាននេះ