រាជធានីភ្នំពេញ ៖ ធនាគារឯកទេសវីង គឺជាអ្នកផ្តល់សេវាទូទាត់សាច់ប្រាក់តាមទូរស័ព្ទដៃឈានមុខគេនៅកម្ពុជា ដែលរួមចំណែកក្នុងការផ្តល់នូវសេវាហិរញ្ញវត្ថុងាយស្រួលសម្រាប់អ្នកដែលពិបាកក្នុងការប្រើប្រាស់សេវាធនាគារ។
រាជធានីភ្នំពេញ ៖ ធនាគារឯកទេសវីង គឺជាអ្នកផ្តល់សេវាទូទាត់សាច់ប្រាក់តាមទូរស័ព្ទដៃឈានមុខគេនៅកម្ពុជា ដែលរួមចំណែកក្នុងការផ្តល់នូវសេវាហិរញ្ញវត្ថុងាយស្រួលសម្រាប់អ្នកដែលពិបាកក្នុងការប្រើប្រាស់សេវាធនាគារ។
ជាមួយនឹងភាពរីកចម្រើនដ៏គួរឲ្យកត់សម្គាល់របស់ខ្លួនក្នុងការផ្តល់ជាជម្រើសហិរញ្ញវត្ថុសម្រាប់អតិថិជន ធនាគារឯកទេសវីងបាននិងកំពុងបម្រើអតិថិជនជាច្រើនលាននាក់ជាមួយសេវាកម្មហិរញ្ញវត្ថុដ៏សម្បូរបែបដូចជា សេវាផ្ទេរប្រាក់ក្នុងស្រុក បង់វិក្កយបត្រ បញ្ចូលលុយទូរស័ព្ទដៃ សេវាបើកប្រាក់បៀវត្ស ការទូទាត់ជាមួយកាតវីង ជាពិសេស គឺសេវាផ្ទេរប្រាក់ក្រៅប្រទេស ដែលអនុញ្ញាតឲ្យពលករខ្មែរអាចផ្ទេរប្រាក់ពីប្រទេសថៃ តាមគណនីធនាគារកសិកនថៃ ទៅកាន់គ្រួសារក្នុងប្រទេសកម្ពុជា ដែលមានគណនីវីងបានយ៉ាងងាយស្រួល រហ័ស និងមានសុវត្ថិភាព ។
លោក ចូចូ ម៉ាឡូឡូស អគ្គនាយកធនាគារឯកទេសវីង មានប្រសាសន៍ថា ៖ « ភ្នាក់ងារវីងទាំងអស់ត្រូវឆ្លងកាត់ដំណាក់កាលជ្រើសរើសយ៉ាងហ្មត់ចត់ ។ ជាមួយគ្នានេះដែរ ធនាគារឯកទេសវីង ក៏បានធ្វើការបំពាក់បំប៉នបណ្តុះបណ្តាលភ្នាក់ងារវីងយ៉ាងដិតដល់ដើម្បីធានាថា គាត់អាចធ្វើប្រតិបត្តិការបម្រើអតិថិជនបានត្រឹមត្រូវ និងមានសុវត្ថិភាព ជាពិសេស ការអនុវត្តខ្ជាប់ខ្ជួនតាមច្បាប់របស់ធនាគារជាតិ » ។
ជាគោលការណ៍ អ្នកផ្ញើអាចផ្ទេរប្រាក់ពីប្រទេសថៃបានតាមរយៈគណនីធនាគារកសិកនថៃ ទៅកាន់អ្នកទទួល ឬក្រុមគ្រួសារនៅប្រទេសកម្ពុជា ដែលមានគណនីវីងតែប៉ុណ្ណោះ ។ អ្នកទទួលដែលមានគណនីវីង ឬកាតវីងអាចទៅដកប្រាក់នៅតាមភ្នាក់ងារវីងណាមួយក៏បាននៅទូទាំងប្រទេស ។ ដូច្នេះ ប្រសិនជាអ្នកទទួលគាត់មិនអាចដកប្រាក់ដែលផ្ទេរពីប្រទេសថៃ ជាមួយភ្នាក់ងារវីងណាមួយបានទេនោះ គាត់អាចទៅដកប្រាក់ជាមួយភ្នាង់ងារវីងមួយផ្សេងទៀតនៅក្បែរនោះបានផងដែរ តាមរយៈកាតវីងរបស់ខ្លួនជាការស្រេច ។
ធនាគារឯកទេសវីងនឹងបន្តកិច្ចខិតខំប្រឹងប្រែងរបស់ខ្លួនក្នុងការនាំមកនូវសេវាហិរញ្ញវត្ថុផ្សេងៗដើម្បីបំពេញតម្រូវការរបស់អតិថិជនបន្ថែមទៀត ជាពិសេស សេវាផ្ទេរប្រាក់ពីប្រទេសផ្សេងៗទៀតមកកាន់ប្រទេសកម្ពុជា នាពេលឆាប់ៗខាងមុខនេះ រួមមាន ប្រទេសម៉ាឡេស៊ី កូរ៉េខាងត្បូង និងប្រទេសជាច្រើនទៀត ៕
ចែករំលែកព័តមាននេះ