តាមកាសែតញូវអូហ្វដឹវើល បានឱ្យដឹងថា ក្លឹប“ហង្សក្រហម” Liverpoo ដែលជាក្លឹបល្បីមួយក្នុងក្របខណ្ឌបាល់ទាត់ប្រឺមីញេលីក អង់គ្លេសចាំបាច់ត្រូវចំណាយការប្រាក់ឱ្យធនាគាររ៉ូយ៉ាល់ប៊ែង អូហ្វស្កុតឡែន ក្នុងមួយ សប្ដាហ៍២,៥លានផោន បើមិនទាន់រកបានម្ចាស់ថ្មីរបស់ក្លឹប ។ កាសែតអង់គ្លេសបានផ្សាយថា ភាពយឺតយ៉ាវក្នុងការលក់ក្លឹប Liverpoo របស់លោក ថមហ៊ីក និងលោកចចយីលឡេត ម្ចាស់ក្លឹប ជនជាតិអាមេរិកធ្វើឱ្យក្លឹបមានបំណុលកើនឡើង តាមកិច្ចព្រមព្រៀង ក្រោយពីមានការកែសំរួលបំណុលជាមួយធនាគារកាលពីខែមេសាកន្លងមក ។ ក្នុងលក្ខខណ្ឌរបស់ក្លឹបនិងធនាគារស្កុតឡែនបញ្ជាក់ថា បំណុលទាំងអស់នឹងគិតបញ្ចូលជាមួយការប្រាក់តាមរយៈកិច្ចព្រមព្រៀងលើបំណុលចំនួន២៣៧លានផោន ដែលធ្វើឱ្យ Liverpoo ត្រូវចំណាយការប្រាក់ ក្នុងមួយសប្ដាហ៍២,៥លានផោនគិតចាប់តាំងពីខែមេសាមក ។
កាសែតខាងលើបានបន្ដទៀតថា តួលេខ បំណុលរបស់ Liverpoo កំពុងកើនឡើងរួមនឹងចំនួនការប្រាក់ដោយកើនខ្ពស់ដល់ទៅ ២៨២,៤លានផោន នៅថ្ងៃទី៣១ សីហាខាងមុខ ហើយនឹងកើនឡើងជាបន្ដទៀតបើក្លឹបមិនអាចរកម្ចាស់ថ្មីចូលទៅស្រោចស្រង់ស្ថានការណ៍បាននៅមុនខែកញាខាងមុខ ។ ទោះជាយ៉ាងណាក៏ដោយកាសែតអង់គ្លេសបានធ្វើការវិភាគថា លោកកេននី ហួង មហាសេដ្ឋីជនជាតិចិន ដែលបានទទួលការទ្រទ្រង់ពីរដ្ឋាភិបាលមានក្ដីសង្ឃឹមខ្ពស់ក្នុងការចូលទៅកាន់កាប់ក្លឹប Liverpoo ជាម្ចាស់ថ្មី ក្រោយពីមានផែនការជំរះបំណុលទាំងអស់ រួមទាំងចំណាយប្រាក់១៣៦លានផោនសាងសង់ទីលានប្រកួតថ្មី ។ ស្របពេលជាមួយគ្នានេះ ក៏យល់ព្រមចំណាយ៥០លានផោន ធ្វើជាកញ្ចប់ថវិកាសំរាប់ទិញកីឡាករនៅឆ្នាំក្រោយផងដែរ ៕
ចែករំលែកព័តមាននេះ