អាល្លឺម៉ង់ ៖ តាមប្រភពពី Metro បានឱ្យដឹងថា សារធាតុហិរនៅក្នុងម្ទេស គឺជាកូនសោសំខាន់ក្នុងការកំចាត់កោសិកាមហារីកបាន ជាពិសេសគឺមហារីកសុដន់ ។ ក្រុមអ្នកវិទ្យាសាស្ត្រនៅសាកលវិទ្យាល័យ Ruhr ក្នុងប្រទេសអាល្លឺម៉ង់ បានរកឃើញថា សារធាតុហិរនៅក្នុងម្ទេស ដែលគេហៅថា Capsaicin អាចធ្វើឲ្យកោសិកាមហារីកងាប់ដោយខ្លួនវា ។ វាអាចទៅសម្លាប់កោសិកាមហារីកដោះ មហារីកពោះវៀនធំ មហារីកឆ្អឹង និងមហារីកលំពែង។
តែសូមលោកអ្នកកុំទាន់គិតថា ការទទួលទានម្ទេសអាចព្យាបាលមហារីក ។ អ្នកវិទ្យាសាស្ត្រប្រាប់ថា វាមិនមានប្រសិទ្ធភាពក្នុងការកំចាត់កោសិកាមហារីកទេ ពេលយើងទទួលទានម្ទេស ឬក៏ហិតម្ទេស ឬក៏សូម្បីតែយកសារធាតុហិរពីម្ទេសមកចាក់ចូលសរសៃឈាមក៏ដោយ។ ពួកគេថា សារធាតុហិរក្នុងម្ទេសនេះ អាចមានប្រសិទ្ធភាពនៅពេលយើងលេបជាលក្ខណៈថ្នាំ មានស្រោមព័ទ្ធជុំវិញ ហើយលេបជាមួយថ្នាំមហារីកធម្មតា។ វាអាចជួយធ្វើឲ្យមានប្រសិទ្ធភាពកាន់តែប្រសើរ សម្រាប់ការព្យាបាល ។
វេជ្ជបណ្ឌិត Lea Weber សរសេរនៅក្នុងអត្ថបទស្តីពីគោលដៅ និងការព្យាបាលជំងឺមហារីកសុដន់ថា «សារធាតុហិរ Capsaicin អាចធ្វើឲ្យកោសិកាមហារីកសម្លាប់ខ្លួនវា ហើយកាពារមិនឲ្យមានការលូតលាស់របស់កោសិកាមហារីកនៅក្នុងឆ្អឹង ពោះវៀនធំ និង លំពែង ។ ជាពិសេសនោះ វាសម្លាប់តែកោសិកាមហារីកតែប៉ុណ្ណោះ ចំពោះកោសិកាធម្មតា វាមិនសម្លាប់ទេ» ។ ការរកឃើញថ្មីនេះ មានប្រយោជន៍ដល់ការព្យាបាលជំងឺមហារីកទៅថ្ងៃអនាគត ។
ចែករំលែកព័តមាននេះ