ខេត្តកណ្តាល ៖ កសិដ្ឋានចិញ្ចឹមមាន់២កន្លែងនៅក្នុងស្រុកកៀនស្វាយកំពុងបំពុលបរិស្ថានប៉ះពាល់ដល់សុខភាពប្រជាពលរដ្ឋ និងព្រះសង្ឃយ៉ាងធ្ងន់ធ្ងរនារដូវខ្យល់បក់នេះ ធ្វើឲ្យពលរដ្ឋរស់នៅជុំវិញកសិដ្ឋានចិញ្ចឹមមាន់នោះមានអាការៈឈឺថ្កាត់ស្ទើរគ្រប់ៗគ្នា។ កសិដ្ឋានចិញ្ចឹមមាន់២កន្លែងនេះមាន ទី១.មានទីតាំងនៅតាមបណ្តោយផ្លូវជាតិលេខ១ ចំពីមុខវត្តកោះសត្ថារាម ស្ថិតក្នុងភូមិចិនកោះ ឃុំគគីរ ដែលមានយីហោ (ម៉ាក់អាម៉ី) និងមួយកន្លែងទៀតមានទីតាំងតាមបណ្តោយផ្លូវជាតិលេ១ ចំពីមុខខ្លោងទ្វារចូលវត្តខ្សុំ ស្ថិតក្នុងភូមិខ្សុំ ឃុំបន្ទាយដែក គ្រប់គ្រងដោយជនជាតិចិន។
ប្រជាពលរដ្ឋរស់នៅជុំវិញកសិដ្ឋានចិញ្ចឹមមាន់ទាំង២កន្លែងខាងលើ បានលើកឡើងដូចៗគ្នាថា កសិដ្ឋានចិញ្ចឹមមាន់នេះបានដំណើរការយូរឆ្នាំហើយ បានជះក្លិនស្អុយអាសោចខ្លាំងណាស់ ជាពិសេសពេលខ្យល់បក់មកម្តងៗចង់ឈ្លក់ឆួលពេញច្រមុះហូបបាយស្ទើរតែចង់ក្អួតចង្អោរ បណ្តាលឲ្យប៉ះពាល់ដល់សុខភាពមនុស្សចាស់ ក្មេងឧស្សាហ៍មានការឈឺថ្កាត់គ្រប់ៗគ្នា ជាពិសេសព្រះសង្ឃក្នុងវត្តក៏ប៉ះពាល់ដែរ ហើយសូម្បីតែអ្នកធ្វើដំណើរឆ្លងកាត់ផ្លូវជាតិលេខ១ពេលមកដល់ចំណុចកសិដ្ឋានចិញ្ចឹមមាន់នេះឈឺក្បាលវិលមុខបើកបរមិនចង់កើត។
ប្រជាពលរដ្ឋបានធ្វើការរិះគន់យ៉ាងខ្លាំងទៅលើអាជ្ញាធរឃុំ ស្រុកកៀនស្វាយ ជាអ្នកបើកដៃឲ្យកើតមានកសិដ្ឋានចិញ្ចឹមមាន់នៅក្បែរផ្ទះពួកគាត់នេះគឺដើម្បីទទួលបានលាភសក្ការៈពីម្ចាស់កសិដ្ឋានដោយមិនគិតពីការប៉ះពាល់ដល់ពលរដ្ឋឡើយ ជាពិសេសទីកន្លែងវត្តអារាមគឺជាកន្លែងរក្សាភាពស្ងៀមស្ងាត់ស្រូបយកខ្យល់អាកាសល្អសម្រាប់ព្រះសង្ឃប្រតិបត្តិធម៌អាថ៌ និងពុទ្ធបរិស័ទជិតឆ្ងាយ លោកយាយជីតាជីសាងបុណ្យរក្សាសីលមិនគួរណាអាជ្ញាធរស្រុកមួយនេះបណ្តែតបណ្តោយឲ្យកើតមានកសិដ្ឋានចិញ្ចឹមសត្វនៅក្នុងភូមិ និងមុខវត្តអារាមបែបនេះសោះ ហើយបង្ហូរទឹកលាងលាមកមាន់ចូលក្នុងទឹកស្រះលោកជីកទុកសម្រាប់ប្រើប្រាស់ឡើងស្អុយ យកទឹកប្រើលែងកើតទៀតផង។
ពាក់ពន្ធ័កសិដ្ឋានចិញ្ចឹមមាន់២កន្លែងក្នុងស្រុកកៀនស្វាយជះក្លិនស្អុយអាសោចបំពុលបរិស្ថានប៉ះពាល់សុខភាពពលរដ្ឋនេះ លោក ឈុន វណ្ណៈ ប្រធានការិយាល័យបរិស្ថានស្រុកបានឲ្យដឹងតាមទូរសព្ទ័ នៅរសៀលថ្ងៃទី២៩ ខែធ្នូ ថា កសិដ្ឋានដែលមានយីហោ (ម៉ាក់អាម៉ី) មិនមែនកន្លែងចិញ្ចឹមមាន់ទេ គ្រាន់តែជាកន្លែងស្តុប ឬធ្វើមាន់ទុកឲ្យម៉ូយមក ព្រោះឃើញមានម៉ាស៊ីនបោចមាន់នៅក្នុងនោះ។
រីឯកសិដ្ឋាននៅមុខវត្តខ្សុំ គ្រប់គ្រងដោយជនជាតិចិននេះ ក៏រូបលោកមិនទាន់បានធ្វើការត្រួតពិនិត្យដែរ ព្រោះគេសុទ្ធតែសូមច្បាប់ខាងពេទ្យសត្វ។ តែចំពោះបញ្ហាបរិស្ថានរូបលោកសូមអរគុណចំពោះអ្នកសារព័ត៌មានបានជួយប្រាប់ឲ្យដឹង ចាំរូបលោកចុះទៅពិនិត្យ និងឲ្យម្ចាស់កសិដ្ឋានទាំង២កន្លែងនេះធ្វើកិច្ចសន្យាកែសម្រួល ធ្វើម៉េចកុំឲ្យប៉ះពាល់ដល់សុខភាពប្រជាពលរដ្ឋ៕
ចែករំលែកព័តមាននេះ