ខេត្តកំពង់ធំ ៖ សារមន្ទីរកេរដំណែលខ្មែរ ស្ថិតនៅភូមិព្រៃបន្លិច សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ បានសម្ភោធដាក់ឱ្យប្រើប្រាស់ ក្រោមការចូលរួមពីប្រជាពលរដ្ឋច្រើនកុះករ ។
លោកស្រីសូ សុគន្ធារី នាយិកាប្រតិបត្តិគម្រោងអភិរក្សប្រាសាទសំបូរព្រៃគុកឱ្យដឹងកាលពីព្រឹកថ្ងៃទី២៦ ខែធ្នូ ឆ្នាំ២០១៦ ថាសារមន្ទីរតូចមួយនេះកសាងឡើងក្រោមជំនួយឧបត្ថម្ភពីសហគមន៍ប្រជាជនជប៉ុននិងការចូលរួមពីសហគមន៍មនុស្សចាស់ខេត្តកំពង់ធំដែលដឹកនាំដោយលោកព្រឹទ្ធាចារ្យកង សាអ៊ុំ ។ សារមន្ទីរកេរដំណែលខ្មែរនេះប្រមូលផ្តុំវត្ថុបុរាណ និងសម្ភារដែលមនុស្សចាស់ធ្លាប់ប្រើដាក់តាំងបង្ហាញ ។
ការបង្ហាញនេះដោយសារតែបច្ចុប្បន្នក្មេងជំនាន់ក្រោយពុំសូវដឹងថា ចាស់ៗជំនាន់ដើមប្រើប្រាស់របស់របរអ្វីខ្លះដើម្បីចិញ្ចឹមជីវិត ។
លោកស្រីសូ សុគន្ធារី ថ្លែងថា«រៀបចំសារមន្ទីរកេរដំណែលខ្មែរនេះឡើងគោលបំណងចង់ឱ្យ ក្មេងៗជំនាន់ក្រោយស្គាល់អំពីអត្តសញ្ញាណរបស់ជាតិខ្លួន ស្គាល់ពីវប្បធម៌ និងស្គាល់ពីអរិយធម៌ដូនតារបស់ពួកយើង មិនតែប៉ុណ្ណោះពួកយើងក៏ចង់ចែករំលែកនូវព័ត៌មានទាំងនេះទៅទៅដល់ប្រជាជាតិអាស៊ីទាំងអស់បានឈ្វេងយល់ពីគ្នាទៅវិញទៅមក ពីព្រោះពួកយើងមានវប្បធម៌ប្រហាក់ប្រហែលគ្នា ។
រយៈពេលជាង២០ឆ្នាំមុនប្រជាជនខ្មែរយើងអាចផលិតរបស់ប្រើប្រាស់ប្រចាំថ្ងៃដោយខ្លួនឯងគ្រប់ៗគ្នា ដោយមិនចាំបាច់ចំណាយប្រាក់ច្រើននោះឡើយ ។ ហេតុដូច្នេះហើយបានជាចាស់ៗជំនាន់នេះលោកមានបំណងយកវត្ថុទាំងអស់នេះមកថែរក្សាទុកនៅក្នុងសារមន្ទីរនេះកុំឱ្យបាត់បង់ ហើយការថែរក្សានេះទៀតសោតគឺទុកសម្រាប់ឱ្យមនុស្សគ្រប់ស្រទាប់បានចូលទៅទស្សនាដោយមិនយកប្រាក់នោះឡើយ ។ មិនតែប៉ុណ្ណោះនៅក្នុងសារមន្ទីរនេះយើងក៏មានអ្នកចាំបកប្រែពន្យល់ប្រាប់អំពីសាវតារហើយនិងរបៀបប្រើប្រាស់ដល់ភ្ញៀវទៀតផង» ៕
ចែករំលែកព័តមាននេះ