រាជធានីភ្នំពេញ ៖ សហគមន៍មូលនិធិនគរកាយវត្តព្រះពុទ្ធសាសនាកម្ពុជា កាលពីព្រឹកថ្ងៃទី២៦ ខែធ្នូបានធ្វើពិធីប្រគល់អំណោយឧបត្ថម្ភដល់អនុសាខាកាកបាទក្រហមកម្ពុជា ខណ្ឌឬស្សីកែវ ដើម្បីយកទៅចែកជូនដល់ប្រជាពលរដ្ឋក្រីក្រី និងមានគ្រោះថ្នាក់ផ្សេងៗបន្តទៀត។
ពិធីនេះបានរៀបចំឡើងនៅវត្តញាណរង្សី ក្នុងសង្កាត់ទួលសង្កែ ដោយមានការចូលរួមប្រគល់ដោយព្រះតេជគុណ ព្រះមង្គលរក្ខិត សុវណ្ណជោតិបណ្ឌិត ខឹម សម្បត្តិ ព្រះគ្រូរតនៈប្បជ្ជោតិអនុគណស្តីទីខណ្ឌឬស្សីកែវ, ព្រះប្រធានសហគមន៍មូលនិធិនគរកាយវត្តព្រះពុទ្ធសាសនាកម្ពុជានិងជាចៅអធិការវត្តញ្ញាណរង្ស និងចូលរួមទទួលដោយលោកស៊ូ សោគន្ធ អនុប្រធានគណៈកម្មាធិការអនុសាខាកាកបាទក្រហមកម្ពុជាខណ្ឌឬស្សីកែវ។
អំណោយដែលចែកជូននៅក្នុងឱកាសនោះ ទទួលបានអង្គរ២០បាវ ទឹកក្រូច៥កេស, ស្ករស ៣០គីឡូក្រាម, ទឹកដោះគោ២០កំប៉ុង, ទឹកត្រី១០យួរ ទឹកស៊ីអ៊ីវ១០យួរ, តែ២០០កញ្ចប់, ត្រីខ១០យួរ,ទឹកសុទ្ធ១០កេស, មី១០កេស, បាឡុង២សម្រាប់ និងថវិកាចំនួន៤លានរៀល។
ក្នុងឱកាសនោះ លោកស៊ូ សោគន្ធ ក៏បានកោតសរសើរដល់ព្រះតេជគុណបណ្ឌិត ខឹម សម្បត្តិ ដែលព្រះអង្គតែងតែជួយជ្រោមជ្រែង និងនាំយកអំណោយទៅចែកជូនប្រជាពលរដ្ឋដែលងាយរងគ្រោះនៅតាមបណ្តាលខេត្ត-ស្រុកខណ្ឌផ្សេងៗ ជាពិសេសក្នុងមូលដ្ឋានខណ្ឌឫស្សីកែវ និងឧបត្ថម្ភដល់អនុសាខាកាកបាទក្រហមកម្ពុជា ខណ្ឌឫស្សីកែវ ជាបន្តបន្ទាប់ ដើម្បីយកទៅចែកជូនប្រជាពលរដ្ឋក្រីក្របន្តទៀត ។
ចែករំលែកព័តមាននេះ