អំណោយសប្បុរសជននៅប្រទេសបារាំងផ្ដល់ជូនជីដូនរើសកួរស្រូវចិញ្ចឹមចៅ៥នាក់
ខេត្តពោធិ៍សាត់ ៖ អំណោយរបស់សប្បុរសជននៅប្រទេសបារាំងរួមមានអង្ករ៤០គីឡូក្រាម, មី១កេស, ទឹកត្រី៦ដប,ទឹកស៊ីអ៊ីវ៦ដប, ត្រីខ១០កំប៉ុង, អំបិល១គីឡូក្រាម …
ខេត្តពោធិ៍សាត់ ៖ អំណោយរបស់សប្បុរសជននៅប្រទេសបារាំងរួមមានអង្ករ៤០គីឡូក្រាម, មី១កេស, ទឹកត្រី៦ដប,ទឹកស៊ីអ៊ីវ៦ដប, ត្រីខ១០កំប៉ុង, អំបិល១គីឡូក្រាម, ប៊ីចេងកន្លះគីឡូក្រាម, ស្ករស១គីឡូក្រាម, សាប៊ូម្ស៉ៅកន្លះគីឡូក្រាម, ប្រេងកូឡា១ប្រអប់, ក្រមា១ និងថវិការ២០០០០រៀល ត្រូវបានលោកមេធាវី ថន បូរី នាំយកទៅប្រគល់ជូនលោកយាយឈ្មោះ ជិន យ៉េន អាយុ៦៤ឆ្នាំ រស់នៅភូមិទួលខ្មែរ ឃុំស្នាមព្រះ ស្រុកបាកាន ខេត្តពោធិ៍សាត់ ដែលលោកយាយមានជីវភាពក្រីក្រដើររើសកួរស្រូវចិញ្ចឹមចៅ៥នាក់ បន្ទាប់ពីឪពុកម្ដាយរបស់ពួកគេទៅធ្វើកម្មករនៅប្រទេសថៃបាត់ឈឹងជិតមួយឆ្នាំមកហើយនោះ ។
លោកមេធាវី ថន បូរី បានរៀបរាប់ប្រាប់លោកយាយថា សម្ភារៈទាំងអស់នេះជាអំណោយរបស់សប្បុរសជននៅប្រទេសបារាំងដែលបានរៃអង្គាសគ្នាមកជូនលោកយាយតាមរយៈលោក ប៊ុយរ៉េស ដូម៉ូនិច និងលោកស្រី សួន សាវី ជាអនិកជនរស់នៅប្រទេសបារាំង ។ អំណោយរបស់សប្បុរសជននៅប្រទេសបារាំងនេះមិនមែនចែកតែគ្រួសារលោកយាយមួយទេ គឺបានបែងចែកដល់ចាស់ជរាគ្មានទីពឹង ជនពិការ និងអ្នកផ្ទុកមេរោគអេដស៍មួយចំនួនទៀតដែលនៅក្នុងខេត្តពោធិ៍សាត់នេះ និងខ្លះទៀតនៅតាមបណ្ដាខេត្តក្រុងក្នុងព្រះរាជាណាចក្រកម្ពុជា ។ អំណោយដ៏តិចតួចនេះគ្រាន់តែជាការដោះទាល់មួយរយៈពេលខ្លីប៉ុណ្ណោះ ដើម្បីជួយសម្រាលទុក្ខលំបាកក្នុងគ្រួសារ និងរួមចំណែកជាមួយរាជរដ្ឋាភិបាលក៏ដូចកាកបាទក្រហមកម្ពុជាក្នុងការជួយសង្គ្រោះប្រជាជនកម្ពុជាដែលជួបការខ្វះខាត ។
គួររម្លឹកថា ប្ដីប្រពន្ធពីរនាក់បាននាំគ្នាទៅធ្វើកម្មករនៅប្រទេសថៃជិតមួយឆ្នាំទៅហើយបន្សល់ទុកកូនប្រុសស្រី៥នាក់ឲ្យជីដូនដើររើសកួរស្រូវ និងស៊ីឈ្នួលគេចិញ្ចឹមយ៉ាងលំបាកវេទនា ។ កូនស្រីបងអាយុ១៣ឆ្នាំ និងកូនប្រុសពៅអាយុមួយឆ្នាំប្រាំខែ សព្វថ្ងៃទៅរៀនសាលា៣នាក់ នៅផ្ទះ២នាក់ រស់នៅភូមិទួលខ្មែរ ឃុំស្នាមព្រះ ស្រុកបាកាន ខេត្តពោធិ៍សាត់ មានចម្ងាយប្រមាណ២០គីឡូម៉ែត្រពីផ្លូវជាតិលេខ៥ ។ សង្ឃឹមថា នឹងមានសប្បុរសជនជួយឧបត្ថម្ភដល់លោកយាយបន្តទៀតដើម្បីចិញ្ចឹមចៅទាំង៥នាក់ ខណៈឪពុកម្ដាយរបស់ពួកគេមិនទាន់ឃើញត្រឡប់មកពីប្រទេសថៃវិញនោះ ៕
ចែករំលែកព័តមាននេះ