ការប្រកួតដណ្តើមពានរង្វាន់ដ៏ធំប្រចាំតំបន់អាស៊ាន Suzuki Cup 2016 ត្រូវបានបញ្ចប់កាលពីល្ងាចថ្ងៃសៅរ៍ទី១៧ ធ្នូ កន្លងទៅ ដែលក្រុមការពារតំណែងជើងឯកចាស់របស់ថៃបានយកឈ្នះក្រុមឥណ្ឌូណេស៊ីក្នុងលទ្ធផលគ្រាប់បាល់សរុប៣-២ ។ គួររំលឹកថា ការប្រកួតវគ្គផ្តាច់ព្រ័ត្រនៃពានរង្វាន់នេះ តម្រូវឱ្យមានការប្រកួតចំនួន២លើក ដោយបែងចែកជាលក្ខណៈក្នុងផ្ទះ និងក្រៅផ្ទះ (Home/Aways) ។
ការប្រកួតជើងទី១ ដែលប្រព្រឹត្រទៅនៅប្រទេសឥណ្ឌូណេស៊ីកាលពីថ្ងៃទី១៤ ធ្នូ ក្រុមម្ចាស់ផ្ទះឥណ្ឌូណេស៊ីបានយកឈ្នះក្រុមថៃ ២-១ ធ្វើឱ្យអ្នកគាំទ្ររបស់ខ្លួនសប្បាយចិត្តនឹងលទ្ធផលនេះយ៉ាងខ្លាំង ។ ជាពិសេសគ្រូបង្វឹកក្រុមជម្រើសជាតិលោកAlfred Riedl មានសង្ឃឹមថា ឥណ្ឌូណេស៊ី នឹងក្លាយជាម្ចាស់ពានSuzuki Cup 2016 លើកដំបូង បន្ទាប់ពីក្រុមនេះបានត្រឹមជាជើងឯករង៤ជំនាន់មកហើយចាប់តាំងពីឆ្នាំ២០០០, ២០០២, ២០០៤ និងឆ្នាំ២០១០ ។
ទោះបីយ៉ាងណា ក្តីសង្ឃឹមរបស់ក្រុមឥណ្ឌូណេស៊ីត្រូវបានរលាយទាំងមិនអស់ចិត្ត បន្ទាប់ពីដំរីចម្បាំងថៃវាយបកវិញបានចំនួន២គ្រាប់ក្នុងការប្រកួតជើងទី២ នៅលើទឹកដីប្រទេសថៃកាលពីល្ងាចថ្ងៃទី១៧ ធ្នូ កន្លងទៅ ដែលសរុបគ្រាប់បាល់ទាំង២ជើងក្រុម ថៃមានចំនួន៣គ្រាប់ ខណៈឥណ្ឌូណេស៊ីមានត្រឹម២គ្រាប់ប៉ុណ្ណោះ ។
ជ័យជម្នះរបស់ក្រុមជម្រើសជាតិថៃលើកនេះ បានធ្វើឱ្យថៃគ្រងជើងឯកពានរង្វាន់Suzuki Cup ជាលើកទី៥ លើបណ្តាប្រទេសដទៃចាប់តាំងពីឆ្នាំ១៩៩៦, ២០០០, ២០០២, ២០១៤ និងឆ្នាំ២០១៦នេះ ខណៈឥណ្ឌូណេស៊ីបានក្លាយជាជើងឯករងលើកទី៥ផងដែរ ។ សូមបញ្ជាក់ថាឆ្នាំ២០១៦ នេះគឺជាការប៉ះគ្នាលើកទី៣ផងដែរ ដែលក្រុមថៃបានបន្តយកឈ្នះសត្រូវចាស់ឥណ្ឌូណេស៊ី នៅវគ្គផ្តាច់ព្រ័ត្រនៃការប្រកួតដណ្តើមពានរង្វាន់ Suzuki Cup នេះ ។
ចំណែកប្រាក់រង្វាន់សម្រាប់ក្រុមជើងឯកថៃមានចំនួន២០ម៉ឺនដុល្លារ និងជើងឯករងឥណ្ឌូណេស៊ីទទួលបានចំនួន៧ម៉ឺន៥ពាន់ដុល្លារ ខណៈក្រុមម្ចាស់ផ្ទះមីយ៉ាន់ម៉ា និងក្រុមវៀតណាម ដែលបានឡើងមកដល់វគ្គពាក់កណ្តាលផ្តាច់ព្រ័ត្រ បានទទួលទឹកប្រាក់ចំនួន៥ម៉ឺនដុល្លារក្នុងមួយក្រុម៕
ចែករំលែកព័តមាននេះ