ប្រទេសមីយ៉ាន់ម៉ា ៖ នាយកដ្ឋានរដ្ឋាភិបាល ពាណិជ្ជករ ម្ចាស់រោងម៉ាស៊ីនកិនស្រូវ និងអ្នកនាំចេញបរទេស បានមកជួបជុំគ្នាកនៅការិយាល័យនាយកដ្ឋានកិច្ចការអតិថិជននៅក្រុង Mandalay ក្នុងគោលបំណងជំរុញចំណេះដឹង ស្តីពីសន្តិសុខស្បៀងអាហារ ការប្រើប្រាស់ថ្នាំសម្លាប់សត្វល្អិត ព្រមទាំងកែលម្អគុណភាពការនាំចេញក្នុងវិស័យនេះ។
ការជួបជុំគ្នានេះ មានកសិករប្រមាណ២០០នាក់, ម្ចាស់រោងម៉ាស៊ីនកិនស្រូវ២០នាក់, អ្នកផលិត១០នាក់, ក្រុមហ៊ុននាំចេញ៥០ និងអ្នកជំនាញសុវត្ថិភាពអាហារ១០នាក់មកពីក្រុង Mandalay, Sagaing និង Magwe ។
អ្នកគ្រប់គ្រងគម្រោង លោក Thit Thit Lwin មកពីនាយកដ្ឋានកិច្ចការអតិថិជនក្រុង Mandalay ឱ្យដឹងថា ឧស្សាហកម្មក្នុងស្រុកនឹងត្រូវបានពង្រឹងសមត្ថភាព ហើយការបណ្តុះបណ្តាលនាពេលនេះ គឺគ្រាន់តែជាការចាប់ផ្តើមប៉ុណ្ណោះ ប៉ុន្តែនឹងអាចត្រួសត្រាយផ្លូវសម្រាប់ការបង្កើនទីផ្សារអន្តរជាតិ ។ លោកនិយាយថា ៖ « បន្ទាប់ពីបញ្ចប់ការបណ្តុះបណ្តាលនេះ យើងនឹងបន្តផ្តល់ជូននូវវគ្គអប់រំ១ថ្ងៃនៅទីក្រុង Mandalay និង Magwe ដល់កសិករ និងអ្នកទិញពាក់ព័ន្ធនឹងអាជីវកម្មកសិកម្ម ។ វគ្គបណ្តុះបណ្តាលនេះនឹងបង្កើនសុវត្ថិភាពក្នុងការផលិតអាហារ » ។
« បន្ទាប់ពីបញ្ចប់គម្រោងក្នុងឆ្នាំ២០១៨ ពួកគេអាចបន្តការបណ្តុះបណ្តាលនៅក្នុងទ្វីបអឺរ៉ុប ដើម្បីទទួលបានវិញ្ញាបនបត្រដែលគេទទួលស្គាល់ បន្ទាប់មកអាចនាំចេញទំនិញជាអន្តរជាតិ ។ ក្នុងនាមជាតំបន់ផលិតប្រេង និងដំណាំយ៉ាងសំខាន់ មីយ៉ាន់ម៉ានឹងមានកំណើនយ៉ាងពិតប្រាកដ » ។ នេះបើតាមលោក Kyaw Kyaw អនុប្រធានរដ្ឋបាលចំណីអាហារ និងឱសថតំបន់ Mandalay ។
លោកបន្តថា ៖ « ៨២%នៃផ្ទៃដីកសិកម្មនៅតំបន់ Mandalay, Sagaing និង Magwe គឺជាវាលដំណាំប្រេង ។ ល្ង និងសណ្តែកដី គឺជាដំណាំប្រេងយ៉ាងសំខាន់ » ។
សុវត្ថិភាពនៃការនាំចេញ និងនាំចូលម្ហូបអាហារ គឺជាបញ្ហាប្រឈមចម្បងនៅពេលដែលផលិតផលប្រេងត្រូវបាននាំចេញទៅក្រៅប្រទេស ។ វគ្គបណ្តុះបណ្តាលនឹងជួយដោះស្រាយបញ្ហាប្រឈមទាំងនេះ ។
អង្គការពាណិជ្ជកម្មពិភពលោក និងកម្មវិធីអភិវឌ្ឍន៍ពាណិជ្ជកម្មបានផ្តល់មូលនិធិដល់សិក្ខាសាលានេះ ។ មជ្ឈមណ្ឌលពាណិជ្ជកម្មអន្តរជាតិ (ITC) កំពុងអនុវត្តគម្រោងនេះ ដែលបានចាប់ផ្តើមនៅខែតុលា ឆ្នាំ២០១៥ ក្នុងកិច្ចសហប្រតិបត្តិការជាមួយរដ្ឋាភិបាល ដែលគ្រោងនឹងបញ្ចប់នៅចុងឆ្នាំ២០១៨ ៕
ចែករំលែកព័តមាននេះ