ខេត្តកោះកុង ៖ កាលពីវេលាម៉ោង៤ និង៣០នាទីព្រឹក ថ្ងៃទី៩ ខែធ្នូ ស្ត្រីម្នាក់ដែលប្រកបរបរអូសរទេះដឹកអីវ៉ាន់សព្វសារពើឆ្លងដែននៅច្រកចូលអន្តរជាតិ ត្រូវបានតម្រួតថៃចាប់ខ្លួន ខណៈដែលកម្មករអូសរទេះនេះដឹកវ៉ាលីជនបរទេសម្នាក់ឆ្លងដែនពីដីខ្មែរចូលទៅដល់ដីថៃ ហើយត្រូវបានតម្រួតថៃធ្វើការឆែកឆេរវ៉ាលីនៅលើរទេះឃើញមានគ្រឿងញៀនកញ្ឆាក្រៀមចំនួន៦គីឡូក្រាម និងដបជ័រផ្សេងៗដាក់ម្សៅកញ្ឆាជាច្រើនដប។ តាមសមត្ថកិច្ចប៉ូលីសច្រកទ្វារបានឱ្យដឹងថា ស្ត្រីជាកម្មករអូសរទេះខាងលើឈ្មោះ ហួត ភឿន អាយុ៥៤ឆ្នាំ មានទីលំនៅភូមិចាំយាម ឃុំបាក់ខ្លង ស្រុកមណ្ឌលសីមា។
ប៉ូលីសបញ្ជាក់ទៀតថា បន្ទាប់ពីតម្រួតថៃចាប់ខ្លួន កម្មកររូបនេះបានសារភាពថា កញ្ឆាទាំងនេះពុំមែនជារបស់ខ្លួនទេ ហើយវ៉ាលីដែលគាត់ដាក់លើរទេះអូសចូលទៅក្នុងទឹកដីថៃនោះ ជារបស់ជនបរទេសម្នាក់ ហើយនៅពេលបែកការណ៍ក៏បានគេចខ្លួនត្រឡប់ក្រោយបាត់ស្រមោលតែម្តង។ ប្រភពដដែលបញ្ជាក់ថា បន្ទាប់ពីឃាត់ខ្លួនអស់រយៈពេល២ម៉ោងតម្រួតក៏បាននាំខ្លួនកម្មករខាងលើចូលមកចង្អុលមុខជនបរទេសដែលប៉ូលីសអន្តោប្រវេសន៍ខ្មែរបានថតទុកនៅក្នុងម៉ាស៊ីនកុំព្យូទ័រមុនពេលប្រថាប់ត្រាលើលិខិតឆ្លងដែនមុនពេលចេញដំណើរទើបដឹងថា ជាជនជាតិរុស្ស៊ីហើយបានប៉ាវរថយន្តតាក់ស៊ីត្រឡប់ទៅភ្នំពេញវិញបាត់ទៅហើយ។
ប៉ូលីសអន្តោប្រវេសន៍ច្រកទ្វារចាំយាមបញ្ជាក់ថា ម្ចាស់វ៉ាលីដែលបានផ្ទុកកញ្ឆាខាងលើឈ្មោះ GARASHAHENKOជនជាតិរុស្ស៊ី អាយុ២៨ឆ្នាំ កាន់លិខិតឆ្លងដែនលេខ ៧១៥៦៥៣៥៩៩ ចូលស្រុកខ្មែរថ្ងៃទី១៨ វិច្ឆិកា ២០១៦ ត្រឡប់ទៅថៃវិញថ្ងៃទី៩ ធ្នូ ២០១៦។ សមត្ថកិច្ចប៉ូលីសអន្តោប្រវេសន៍បានបញ្ជាក់ថា ពេលនេះស្ត្រីជាកម្មករខ្មែររូបនេះត្រូវបានតម្រួតថៃបញ្ជូនទៅឃុំខ្លួននៅឯខេត្តត្រាត ហើយបានដាក់បន្ទុកថា បើសសមត្ថកិច្ចចាប់ខ្លួនជនជាតិរុស្ស៊ីជាម្ចាស់់កញ្ឆានោះបាន ភាគីថៃនឹងដោះលែងស្ត្រីជាកម្មករអូសរទេះខាងលើនេះត្រឡប់មកវិញ តែបើចាប់មិនបានស្ត្រីជាកម្មករខាងលើនឹងត្រូវឃុំខ្លួនក្នុងប្រទេសថៃអស់មួយជីវិត។ ប្រភពជាច្រើនបានរិះគន់ថា ករណីនេះកើតឡើងបានដោយសារតែការធ្វេសប្រហែសរបស់សមត្ថកិច្ចខ្មែរមិនបានធ្វើការត្រួតពិនិត្យឱ្យបានល្អិតល្អន់៕
ចែករំលែកព័តមាននេះ