ខេត្តប៉ៃលិន ៖ ទោះបីជាប្រទេសកម្ពុជា នាំមកនូវសុខសន្ដិភាពក្រោមរូបមន្ដឈ្នះឈ្នះ របស់សម្ដេចតេជោ នាយករដ្ឋមន្ត្រីកម្ពុជាក៏ពិតមែន តែគាប់មីន និងគ្រាប់យុទ្ធភណ្ឌមិនទាន់ផ្ទុះ ដែលកប់ក្នុងដី បន្សល់កាលពីសមយ័សង្គ្រាម មិនបានផ្តល់សេចក្តីសុខសាន្តដល់ប្រជាពលរដ្ឋយើងនោះទេ ពីមួយថ្ងៃទៅមួយថ្ងៃបង្កឱ្យមនុស្សក្មេងចាស់ស្លាប់ និង ទទួលរងនូវការពិកាដៃជើងជាបន្ដបន្ដាប់។ ជាក់ស្ដែងសម្រាប់ខេត្តប៉ៃលិន គឺជាសមរភូមិជួរមុខប្រយុទ្ធយ៉ាងក្ដៅគគុកក្នុងការដណ្តើមកាន់កាប់ឈរជើងទៅវិញទៅមករបស់កងទ័ពរដ្ឋាភិបាល និងទ័ពខ្មែរក្រហម។
ដូចនេះហើយទើបសព្វថ្ងៃសម្បូរទៅដោយគ្រាប់មីនតោន និងគ្រាប់មីនប្រឆាំងមនុស្ស នៅរាយប៉ាយពាសពេញដីស្រែចម្ការ ដែលប្រជាពលរដ្ឋកំពុងកាន់កាប់បង្កបង្កើនផលអស់រយៈពេលជាយូរឆ្នាំមកហើយ។ ប្រជាពលរដ្ឋបានលើកឡើងថា គ្រាប់មីនទាំងនោះបានធ្វើឲ្យពួកគាត់មួយចំនួនស្លាប់ និងខ្លះទៀតទទួលរងគ្រោះថ្នាក់ ពិការអស់មួយជីវិត ដោយដាច់ដៃ ដាច់ជើង និងបំផ្លិចបំផ្លាញទ្រព្យសម្បត្តិ សត្វពាហនៈ ជាបន្ដបន្ទាប់នៅក្នុងខេត្តមួយនេះផងដែរ។ ខណៈដែលឃើញអង្គការបោសសម្អាតគ្រាប់មីនចូលទៅរាវរកនៅតំបន់ពួកគាត់រស់នៅ បានធ្វើឱ្យពួកគាត់មានភាពកក់ក្តៅយ៉ាងខ្លាំង។
បើតាមលោក ព្រីង បញ្ញរិទ្ទ ប្រធានស៊ីម៉ាក់កំចាត់មីន យោធភូមិភាគទី២ ប្រចាំខេត្តបាត់ដំបង ខេត្តពោធិ៍សាត់ និងខេត្តប៉ៃលិន បានឲ្យដឹងថា បច្ចុប្បន្ននេះនៅក្នុងប្រទេសកម្ពុជា គ្រាប់មីនតោនបានក្លាយទៅជាអាវុធសម្លាប់មនុស្ស និងធ្វើឱ្យពិការភាព បន្ទាប់ពីរងរបួសធ្ងន់ ស្រាល និងធ្វើការបំផ្លាញទ្រព្យសម្បតិ្តប្រជាកសិករ ដែលប្រើប្រាស់ដីធី្លក្នុងការបង្កបង្កើនផលកសិកម្មច្រើនជាងគេ។ លោកបានបន្ដទៀតថា គ្រាប់មីនតោនបានប្រើប្រាស់នៅកម្ពុជាចាប់តាំងពីសង្គ្រាមដណ្ដើមកាន់កាប់គ្នាទៅវិញទៅមកច្រើនជំនាន់មកម្លេះ ហើយគ្រាប់មីនតោនទាំងនោះ ត្រូវបានគេយកទៅប្រើប្រាស់ច្រើនបំផុត រហូតដល់សង្គ្រាមបានបញ្ចប់ទាំងស្រុងនៅកម្ពុជា។
លោកបញ្ជាក់ថា គ្រាប់មីនតោនច្រើនប្រភេទ ត្រូវបានយកប្រើប្រាស់នៅក្នុងកម្ពុជា គឺមានគ្រាប់មីនតោនផលិតនៅប្រទេសឆេកូស្លូវ៉ាគី សហរដ្ឋអាមេរិក សហភាពសូវៀត ប្រទេសចិន វៀតណាម ជាដើម ។ គ្រាប់មីនតោន ត្រូវបានដាក់កប់ដីសម្រាប់ប្រឆាំងនឹងរថយន្តដឹកជញ្ជូនធន់ធ្ងន់ រថក្រោះ។ ប៉ុន្តែនៅកម្ពុជាបានកែច្នៃជាមីនវាយបំបាក់ខាងស្មារតី ដោយបន្ថែមគ្រាប់មីនប្រឆាំងមនុស្ស កប់ជ្រៅៗ រួចតភ្ជាប់ឈើគ្រាក់ មកខាងលើដាក់ច្រើនគ្រាប់ត្រួតពីលើគ្នាជាដើម។ សោកនាដកម្ម ដោយសារគ្រាប់មីនតោន និងគ្រាប់មីនគ្រប់ប្រភេទនេះនៅតែបន្តការគំរាមកំហែងយ៉ាងធ្ងន់ធ្ងរដល់អាយុជីវិតប្រជាពលរដ្ឋខែ្មរ ជាពិសេសកសិករ ដែលកំពុងរស់នៅក្នុងតំបន់អតីតសមរភូមិប្រយុទ្ធ។ ទន្ទឹងនឹងនេះវាក៏ជាឧបសគ្គរាំងស្ទះដល់ការអភិវឌ្ឍន៍ហេដ្ឋារចនាសម្ព័ន្ធរូបវ័ន្ត និងការអភិវឌ្ឍន៍សេដ្ឋកិច្ចជាតិនៅក្នុងប្រទេសកម្ពុជាផងដែរ។
លោកបានសង្កត់ធ្ងន់ថា ទោះបីជាដីស្រែចម្ការ ដែលប្រជាពលរដ្ឋកំពុងកាន់កាប់ បង្កបង្កើនផលជាយូរឆ្នាំមកហើយក្ដី បើអង្គភាពកំចាត់គ្រាប់មីនកម្ពុជា(ស៊ីម៉ាក) មិនទាន់ធ្វើការបោសសម្អាតនោះទេ ទីតាំងចម្ការនោះ មិនប្រាកដថាគ្មានគ្រាប់មីននោះឡើយ។ ម្យ៉ាងវិញទៀត ប្រជាពលរដ្ឋយើងមួយចំនួន បានទទួលរងនូវគ្រោះថ្នាក់ដល់អាយុជីវិត ដោយសារតែភ្ជួររាស់ដី លុះកិនចំគ្រាប់មីនដែលកប់នៅក្នុងដីចម្កានោះឯងតែម្ដង។ លោកបានសំណូមពរដល់ប្រជាពលរដ្នទាំងអស់មិនត្រូវរុករកកាន់ដីព្រៃដែលមានដាក់ស្លាកសញ្ញាគ្រាប់មីននោះជាដាច់ខាត ព្រោះតាមការសិក្សាស្រាវរបស់មន្ដ្រីស៊ីម៉ាកបានកំណត់រួចហើយថា ដីនោះប្រាកដមានគ្រាប់មីន៕
ចែករំលែកព័តមាននេះ