ប្រទេសសិង្ហបុរី ៖ យោងតាមក្រុមហ៊ុន CapitaLand Commercial Trust ឲ្យដឹងថា ការជួលការិយាល័យក្នុងប្រទេសសិង្ហបុរី នឹងបន្តទន់ខ្សោយបន្តិចរហូតដល់ឆ្នាំ២០១៧ ហើយអាចនឹងកើនឡើងវិញនារយៈពេលចុងឆ្នាំ ខណៈបរិមាណផ្គត់ផ្គង់ចុះទាប ។
លោកស្រី Lynette Leong អគ្គនាយក លើកឡើងថា មានកន្លែងទំនេរដល់ទៅ២,៣លានហ្វីតការ៉េត្រូវបានបន្ថែមក្នុងឆ្នាំនេះ ដែលធ្វើឲ្យការជួលធ្លាក់ចុះ១៥% ។ លោកស្រីថ្លែងថា ៖ « ព្រោះតែមានការិយាល័យថ្មីៗបន្តលក់ចេញដដែលក្នុងឆ្នាំក្រោយ ពួកយើងព្យាករថា ការជួលនឹងបន្តធ្លាក់ចុះ ។ ប៉ុន្តែវាគួរតែប្រសើរឡើងវិញនាចុងឆ្នាំក្រោយ ព្រោះគ្មានការិយាល័យថ្មីៗច្រើននឹងចេញលក់នាពេលនោះទេ » ។
យោងតាមទិន្នន័យរបស់អាជ្ញាធរអភិវឌ្ឍន៍ទីក្រុងឡើងវិញឲ្យដឹងថា ការជួលការិយាល័យក្នុងតំបន់កណ្តាលបានធ្លាក់ចុះអស់៦ត្រីមាសជាប់ៗគា្នមកហើយ ។
លោក Derrick Heng អ្នកវិភាគក្នុង Maybank Kim Eng និយាយថា ៖ « រយៈពេលនៃការទម្លាក់ការផ្គត់ផ្គង់ពីឆ្នាំ២០១៨ ដល់២០១៩ នឹងជួយដល់ទីផ្សារការិយាល័យឲ្យប្រសើរឡើងវិញ » ។
លោកស្រី Leong បន្ថែមថា ៖ « ប្រទេសសិង្ហបុរី មិនត្រឹមតែពឹងផ្អែកលើវិស័យសេវាកម្មហិរញ្ញវត្ថុ និងធនាគារប៉ុណ្ណោះទេ គឺមានវិស័យផ្សេងទៀតមានសកម្មភាពខ្លាំងជាងមុន ដូចជា ក្រុមហ៊ុនបច្ចេកវិទ្យាជាដើម » ។
CapitaLand Commercial Trust ក៏មានគម្រោងអភិវឌ្ឍន៍ចំណតរថយន្តមួយឈ្មោះ Golden Shoe Car Park ឲ្យទៅជាអគារការិយាល័យផងដែរ ដែលនឹងបន្ថែមកន្លែងទំនេរដល់ទៅ១លានហ្វីតការ៉េក្នុងឆ្នាំ២០២១ ៕
ចែករំលែកព័តមាននេះ