ការវិភាគទីតាំងរបស់អចលនទ្រព្យ គឺជាគោលការណ៍មូលដ្ឋានសម្រាប់ការវិនិយោគ ព្រោះរឿងសំខាន់នៃភាពជោគជ័យក្នុងការវិនិយោគ គឺទីតាំង ។ អ្នកជំនួញភាគច្រើនចាត់ទុកថា អចលនទ្រព្យដែលស្ថិតក្នុងទីតាំងល្អ នឹងអាចបង្កើតផលតបស្នងបានដោយងាយ និងជាតម្រូវការរបស់ទីផ្សារ ។ ហេតុនេះ ការជ្រើសរើសវិនិយោគគ្រប់ពេលវេលា ពួកគេតែងប្រុងប្រយ័ត្ន និងផ្តល់ភាពសំខាន់ជាមួយការជ្រើសរើសទីតាំងល្អ រហូតដល់មើលរំលងទីតាំងដែលបង្កើតប្រាក់ ខណៈពួកគេភាគច្រើនមិនបានចាប់អារម្មណ៍ ។
ការវិនិយោគអចលនទ្រព្យ អាចនឹងមិនស្ថិតនៅលើទីតាំងដែលគួរឱ្យចាប់អារម្មណ៍ជានិច្ចនោះទេ ។ អ្នកវិនិយោគមានវិជ្ជាជីវៈអាចសម្លឹងឃើញឱកាស និងស្វែងរកការវិនិយោគផ្នែកអចលនទ្រព្យទៅលើ៣ទីតាំងដូចជា ៖
១-ទីតាំងមិនល្អ ប៉ុន្តែមានអនាគត ៖
អចលនទ្រព្យស្ថិតនៅលើទីតាំងដែលហៅថា មិនល្អ គឺមានលក្ខណៈច្រើនដូចជា ផ្ទះចាស់ស្ថិតនៅក្នុងតំបន់មានទឹកជំនន់រាល់ឆ្នាំ ឬធ្លាប់មានទឹកលិចពីមុន, ដីស្ថិតក្នុងតំបន់ទំនាប និងត្រូវចាក់ដីបន្ថែម ដែលធ្វើឱ្យមានការចំណាយស្ទើរតែស្មើ ឬស្មើនឹងតម្លៃដី និងមិនទាន់មានសេវាសាធារណៈចូលទៅដល់ ។
ទាំងនេះចាត់ទុកជាទីតាំងមិនល្អ ដែលអ្នកជំនួញភាគច្រើនមិនចាប់អារម្មណ៍ ។ ប៉ុន្តែវាជាទីតាំងដែលអាចបង្កើតប្រាក់ ឬផ្តល់ផលតបស្នងដ៏ល្អបាន ប្រសិនជាតំបន់ស្ថិតក្នុងផែនការអភិវឌ្ឍន៍ ឬជាដីទំនេរដែលកំពុងក្លាយជាតំបន់ឧស្សាហកម្ម ទោះបីជាស្ថិតក្នុងដីទំនាបត្រូវចាក់បំពេញក្តី ។ ប៉ុន្តែនៅពេលក្លាយជាអចលនទ្រព្យល្អនាពេលអនាគត វាអាចបង្កើតប្រាក់ចំណូល និងផលតបស្នងដ៏ល្អបានដូចគ្នា ។
២-ដីគ្មានផ្លូវចេញចូល ៖
អចលនទ្រព្យប្រភេទនេះ គឺពិបាកក្នុងការទិញលក់ ក្រៅពីវាគ្មានផ្លូវចេញចូល ក៏ជាទីតាំងដែលអ្នកជំនួញ និងអ្នកត្រូវការស្វែងរកទិញដីដើម្បីធ្វើជាប្រយោជន៍មិនសូវចាប់អារម្មណ៍ ។ ប៉ុន្តែសម្រាប់អ្នកជំនួញមានអាជីព ប្រសិនបើដឹងថា ដីត្រង់បរិវេណនោះកំពុងមានតម្រូវការពីទីផ្សារ ឬមានគម្រោងទិញលក់ ពួកគេនឹងដាក់ផែនការទិញដីតំបន់នោះទុកជាមុន ។
៣-សភាពអចលនទ្រព្យដុនដាប ប៉ុន្តែស្ថិតក្នុងទីតាំងល្អ ៖
អចលនទ្រព្យដែលស្ថិតនៅក្នុងទីតាំងល្អ តែងទទួលបានការចាប់អារម្មណ៍ពីអ្នកជំនួញ ប៉ុន្តែក្នុងករណីនេះ បើសិនជាអចលនទ្រព្យនោះមានសភាពមិនល្អ ឬទ្រុឌទ្រោមរហូតដល់ខ្វះការចាប់អារម្មណ៍ និងអាចមិនសមនឹងតម្លៃសម្រាប់ការវិនិយោគដូចជា ផ្ទះត្រូវបានគេទុកចោល ប៉ុន្តែបរិវេណក្បែរនោះជាទីតាំងប្រកបរបរលក់ដូរ អ្នកជំនួញដែលសម្លឹងឃើញឱកាសវិនិយោគ ពួកគេនឹងផ្លាស់ប្តូរវាជាតំបន់ប្រកបអាជីវកម្ម ដោយមិនគ្រាន់តែសម្រាប់រស់នៅប៉ុណ្ណោះទេ ប៉ុន្តែធ្វើឱ្យអចលនទ្រព្យដែលមិនគួរឱ្យវិនិយោគប្រែក្លាយជាមានតម្លៃកើនឡើងបាន ។
ភាពជោគជ័យលើការវិនិយោគវិស័យអចលនទ្រព្យ គឺកើតឡើងពីការសិក្សារកផ្លូវវិនិយោគទុន រួមទាំងការដាក់ផែនការដ៏ល្អ មិនថាអចលនទ្រព្យនោះស្ថិតនៅក្នុងទីតាំងបង្កើតប្រាក់ ឬទីតាំងមិនល្អក្តី ប្រសិនបើមានឱកាស វាអាចនឹងបង្កើតប្រាក់ចំណេញបានដូចគ្នា ៕
ចែករំលែកព័តមាននេះ