រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់អង្គការសមាគមអភិរក្សសត្វព្រៃនៅកម្ពុជា (WCS) កាលពីថ្ងៃទី៩ ធ្នូ ឆ្នាំ២០១៦ ឱ្យដឹងថា ការស្នើសុំសាងសង់ខ្សែបញ្ជូនអគ្គិសនីនៅជាប់តំបន់ការពារទេសភាពទំនាបខាងជើងទន្លេសាបដែលប្រហែលជាដំណើរការសាងសង់នៅដើមឆ្នាំ២០១៧ នឹងក្លាយជាការគំរាមកំហែងថ្មីមួយចំពោះសត្វខ្សឹប ។
សត្វខ្សឹប (ឬទ្រមាក់អណ្តើក) ស្ថិតនៅក្នុងបញ្ជីក្រហមរបស់អង្គការ IUCN ជាប្រភេទរងគ្រោះជិតផុតពូជបំផុត ខណៈចំនួនរបស់វានៅលើសាកលលោកមានតិចជាង៨០០ក្បាល។ កម្ពុជាគឺជាប្រទេសដ៏សំខាន់បំផុតនៅលើសាកលលោកដើម្បីអភិរក្សសត្វខ្សឹបកុំឱ្យបាត់បង់ ។ នៅក្នុងឆ្នាំ២០១២ ក្រុមស្រាវជ្រាវមកពីសាកលវិទ្យាល័យ East Anglin បានរកឃើញថា មានសត្វខ្សឹបប្រមាណ៤៣២ក្បាលកំពុងរស់នៅក្នុងប្រទេសកម្ពុជា ។
បណ្ឌិត Paul Dolman ពីសាកលវិទ្យាល័យ East Anglan និយាយថា «តាមរយៈការបំពាក់ឧបករណ៍តាមដានជាមួយសត្វខ្សឹបចំនួន១៥ក្បាល ពួកយើងរកឃើញថាសត្វខ្សឹបហើរឆ្លងកាត់ទីតាំងដែលបានស្នើសុំសាងសង់ខ្សែបញ្ជូនអគ្គិសនីនេះចំនួន២ដងរៀងរាល់ឆ្នាំដើម្បីទៅកាន់កន្លែងពងកូន និងត្រឡប់មកកាន់ទីជម្រកវិញ ។
សត្វខ្សឹបមួយចំនួនប្រហែលជាធ្វើដំណើរឆ្លងកាត់កន្លែងស្នើសុំនេះច្រើនដងជាងនេះ ខណៈគម្រោងខ្សែបញ្ជូនអគ្គិសនីនេះនឹងត្រូវគេសាងសង់នៅជិតតំបន់ការពារទេសភាពទំនាបខាងជើងទន្លេសាបដែលគាំទ្រលើការរស់នៅរបស់សត្វខ្សឹបច្រើនជាងគេបង្អស់នៅលើសាកលលោក » ។
ខ្សែបញ្ជូនអគ្គិសនីរមែងតែងតែជាបញ្ហាសម្រាប់សត្វស្លាបមានមាឌធំ និងហើរយឺតដែលពិបាកក្នុងការឆ្លងកាត់ដូចជាប្រភេទសត្វត្រដក់ ក្រៀល និងមំសាបក្សី ដែលប្រភេទសត្វទាំងអស់នេះកំពុងរស់នៅ និងពឹងអាស្រ័យលើតំបន់ការពារទេសភាពទំនាបខាងជើងទន្លេសាប។ ខ្សឹបគឺជាសត្វស្លាបដែលរងការប៉ះពាល់ខ្លាំងបំផុតចំពោះការបម្លាស់ទីដែលមានខ្សែបញ្ជូនអគ្គិសនីនៅកាត់មុខ ដោយសារតែពួកវាមិនអាចមើលឃើញបានធំទូលាយ ។ ក្រុមអ្នកស្រាវជ្រាវមកពីសាកលវិទ្យាល័យ East Anglia និងសាកលវិទ្យាល័យ Lisbon បានរកឃើញផលប៉ះពាល់ធ្ងន់នៃខ្សែបញ្ជូនអគ្គិសនីចំពោះសត្វស្លាបមាឌធំរស់នៅតំបន់អាស៊ីកណ្តាល អាហ្វ្រិកខាងត្បូង និងអឺរ៉ុប ហើយក៏បង្ហាញផងដែរអំពីផលប៉ះពាល់ដែលអាចកើតមានចំពោះសត្វខ្សឹបនៅក្នុងកម្ពុជាផងដែរ ។
លោកហុង ចំណាន ប្រធានគម្រោងអភិរក្សសត្វខ្សឹប និយាយថា ៖ «ការការពារចំនួននៅសេសសល់របស់សត្វខ្សឹបនៅក្នុងប្រទេសកម្ពុជា ពិតជាចាំបាច់ខ្លាំងណាស់សម្រាប់ការរស់រានមានជីវិតរបស់ប្រភេទសត្វដ៏កម្រនេះ។ ក្រុមហ៊ុនសាងសង់ខ្សែបញ្ជូនអគ្គិសនី ត្រូវតែប្រាកដថាសត្វខ្សឹបធ្វើបម្លាស់ទីបានដូចធម្មតា ទោះបីជាមានការសាងសង់ខ្សែបញ្ជូនអគ្គិសនីនេះក៏ដោយ ។
តំបន់ការពារទេសភាពទំនាបខាងជើងទន្លេសាប (អតីតតំបន់អភិរក្សសត្វខ្សឹបដែលគ្រប់គ្រងដោយរដ្ឋបាលព្រៃឈើ) ត្រូវបានបង្កើតឡើងនៅក្នុងឆ្នាំ២០១៦ និងគ្របដណ្តប់លើផ្ទៃដី៣១.១៥៩ហិកតានៅក្នុងខេត្តកំពង់ធំ និងសៀមរាប ។ អង្គការសមាគមអភិរក្សសត្វព្រៃ(WCS) កំពុងធ្វើការយ៉ាងជិតស្និទ្ធជាមួយក្រសួងបរិស្ថាន ដើម្បីអភិរក្សតំបន់ការពារទេសភាពទំនាបខាងជើងទន្លេសាប និងសត្វស្លាប សំខាន់ៗដូចជាសត្វខ្សឹបជាដើម តាមរយៈសកម្មភាពជាច្រើនដូចជាការអនុវត្តច្បាប់ ការការពារសំបុកសត្វខ្សឹប និរន្តរភាពស្រូវ និងការលើកកម្ពស់ការយល់ដឹងដល់ប្រជាសហគមន៍ជាដើម ។
លោក Simon Mahood ទីប្រឹក្សាប្រឹក្សាបច្ចេកទេសជាន់ខ្ពស់នៃអង្គការសមាគមអភិរក្សសត្វព្រៃនិយាយថា ៖«មធ្យោបាយដ៏មានប្រសិទ្ធភាពបំផុតមួយដើម្បីការពារ ឬកាត់បន្ថយឱកាសសត្វខ្សឹបអាចស្លាប់ដោយសារការហោះទៅបុកនឹងខ្សែបញ្ជូនអគ្គិសនី គឺសាងសង់ខ្សែបញ្ជូនអគ្គិសនីវាងកន្លែងដែលសត្វខ្សឹបធ្វើបម្លាស់ទីដើម្បីពងកូន » ។
គួររៀបចំរបាំងការពារ ដាក់ឌីស ឬរុំព័ទ្ធខ្សែបញ្ជូនអគ្គិសនីដែលសត្វស្លាបអាចងាយមើលឃើញនៅពេលពួកវាហើរឆ្លងកាត់ ដើម្បីកាត់បន្ថយចំនួនសត្វស្លាបដែលអាចហោះបុកនឹងខ្សែបញ្ជូនអគ្គិសនីនោះ » ។
គម្រោងអភិរក្សសត្វខ្សឹបទទួលបានការគាំទ្រថវិកាពី John D. and Catherine T. MacArthur Foundation, Critical Ecosystem Partnership Fund, Mohammed bin Zayed Species Conservation Fund, Chester Zoo, North Srar Scienec & Technology, Ford Motor Company, National Avian Research Centre International Fund For Houbara Conservation ៕
ចែករំលែកព័តមាននេះ